Procuration passée par Françoise Bourdichon, fille de feus Jean Bourdichon, ancien peintre et valet de chambre du roi, et Barbe Colleberde, à Jean Perrigault, licencié en Droit et conseiller en la cour royale de justice de Tours 
, pour se charger de ses affaire, et auquel elle cède l'intégralité de ses droits sur les biens dont elle a hérité de ses défunts parents afin qu'il pourvoit à leur revente, mais au bénéfice de la constituante, ce en présence des témoins Guillaume Lebrethon, armurier, et Laurent Bourdaize, clerc, de Tours .
[fol. 70] Le XIXe jour de juillet mil cinq cens XXI, en la court du roy nostre seigneur a Tours , etc. Personnellement establye.
A tous ceulx qui ces presentes lectres verront, Jacques de Beaune, chevalier, viconte de Tours , baron de Semblancay , seigneur de La Quarte, conseiller et chambellain ordinaire du roy nostre seigneur, son bailly et gouverneur de Touraine , salut. Savoir faisant que par davant Jacques Foussedouaire, notaire royal audit Tours , s'est comparu et personnellement establye en court du roy nostredit seigneur audit Tours , honneste femme Francoise Bourdichon, fille de feu sire Jehan Bourdichon, en son vivant paintre et varlet de chambre du roy, femme, espouse de honnorable homme maistre Jehan Perrigault, licencié en loix, conseiller en la court royal de Tours , dudit maitre Jehan Perrigault sondit mary suffisaument auctorisee en court en la presence dudit notaire quant adce, demourans audit Tours . Laquelle deuement soubzmise, elle, ses biens hoirs et tous et chacuns ses biens et choses meubles et immeubles, presens et avenir, au povoir, ressort et juridicion de ladite court quant au fait qui s'ensuit. De bon gré et volunté a congneu et confessé en ladite court avoir ce jourduy fait, constitué, ordonné et estably, et par ces presentes fait, constitue, ordonne et establist son chier et bien amé ledit maistre Jehan Perrigault, son espoux, son procureur general et certain messagier especial en toutes ses negoces et affaires. Auquel maistre Jehan Perrigault, sondit espoux et procureur, ladite Francoise Bourdichon constituant de l'auctoritee que dessus ordonne et donne par ces presentes plain povoir, puissance, auctoritee et mandement especial de, pour et ou nom d'elle dispousee, vendre et alienner, cedder et transporter a j a tousioursmais, perpetuellement, les sixiesme partie d'une partie de la douziesme partie des acquestz et patrimoigne des heritaiges a elle echeuz, advenuz et descenduz par le [fol. 70, v°] deceps, mort et trespas de feuz Jehan Bourdichon et Barbe Colleberde, ses pere et mere, et ce pour fournir au rapport de son mariage, en faisant les partaiges avecques ses coheritiers et composer avecques eulx touchant le fait de ladite succession, ses appendances et deppend deppendances. Et d'icelle sixiesme parties faict vendicion et transport a sesdits coheritiers, ou a autres qu'il verra estre affaire par raison, au prouffict de ladite constituant. Et d'icelles d'icelle vendicion ou vendicions, qui ainsi seront faictes desdites choses, donner, faire et passer lectres bonnes et vallables soubz tel seel ou seaulx de contractz et forme de parolles qu'il appartient. Lesquelles lectres qui ainsi seront faictes, ledit constituant, en tant qu'elle peult et auctorisees et auctorise, par ces presentes vieult et conscent estre d'un tel effect, valleur, force et vertu comme si elle mesmes les avoit faictes et passees, et recevoir les deniers yssans d'icelles en sa propre personne. Et generalement, de faire et procurer en ce que dit dessus toutes et chacunes les causes choses que procureurs deuemat estably peult et doyt faire, et que ladite constituant feroit et faire pourroit si present en sa personne y estoit, jacoit ce que la chose requiere mandement plus especial. Promectant, etc. Fait es presence de Guillaume Lebrethon, armurier, et Laurens Bourdaize, clerc demourant audit Tours , tesmoings. Le XIXe jour de juillet mil Vc XXI.
[fol. 71] Francoyse Bourdichon, fille de feu sire Jehan Bourdichon, en son vivant paintre et varlet de chambre du roy, a ce jourduy commis plein povoir, procuration special a maistre Jehan Perrigault, son mary, de disposer, vendre et aliener les heritaiges, pour la sixiesme d'une part et pour la XIIe des acquestz d'autre part, a elle escheuz par le deces dudit Bourdichon, son feu pere, et de feue Barbe Colleberde, sa feue mere, pour fournir et au rapport de partages de son mariage, en faisant les partages avec sesdits coheritiers et aultres qu'il apartiendra ainsi que de raison touchant ladite succession susdite, deppendances et appendances, et aultres qu'il apartiendra par raison. Presens Guillaume Lebrethon, armeurier, et Laurens Bourdaize, clerc, demourant audit Tours , tesmoings. Le XIXe jour de huillet mil Vc XXI.
