1474, 16 mai — Tours

Le XVI^e jour de may l’an mil IIII^c LXXIIII, personnes establyz Jehan Goupil et Jehanne, sa femme de luy suffisamment auctorisee quant ace parroissiens de Saint Pierre des Corps soubzmettants etc. Lesquelx ont confessé avoir vendu et vendent desapresent a toujours heritage a Jehan Rogier, tondeux, demourant en la parroisse de Saint Pierre du Boile de Tours ace present et achetant pour luy et Perrine, sa femme pour leurs hoirs etc demy arpent de terres assis au lieu de la milletiere en la parroisse de Mectré et ou fief des brosses. Joignant d’un long et d’un bout a la terre de Jehan Thomasseau et d’autre bout aux terres dudit Thomasseau et des hoirs feu Thibault Serclier, lequel demy arpent de terre est escheu avecques ung autre arpent de terre a ladite Jehanne establissante a cause de la succession de sa feue mere ainsi qu’elle est sondit mary disoient a autre etc. Ceste presente vendicion faicte pour le pris et somme de quatre livres tournois dont en a esté paié en court en notre presence par ledit acheteur ausditz vendeurs cinquante deux solz six deniers tournois en or et monnaie desquelx LII sous VI denirs ensemble du surplus de toute ladite somme de IIII livres qui est XXVII sous VI deniers et vendicion dessusdite lesditz vendeurs se sont tenuz et tiennent par devant nous contens et pour bien paiez quictent etc. Et ledit demy arpent de terre ainsi vendu comme du est lesditz vendeurs ont promis et promectent garantir, sauver et deffendre audit acheteur, a ses hoirs etc de tous vers tous etc a toujours etc en paiant doresenevant chacun an par ledit acheteur ses hoirs etc deux boesseaux de froment que iceulx vendeurs dient devoir pour icelui demy arpent de terre au sire du fief le jour Saint Michel pour tous devoirs. Obligeant etc renonçant etc foy etc. Presents ace Saudroyn Crestoie et Everart Hainelyne, tesmoings.
[Signé] Jaloignes J.