Contrat de mariage entre Gilles Charbonneau, marchand à Tours , fils de Guillaume Charbonneau, naguères maire de cette ville, sieur du Bouchet, bourgeois et échevin de Tours (paroisse Saint-Pierre-le-Puellier) d’une part, et Marguerite de Longuemort, fille d’Adam de Longuemort, sieur de La Goguerie, valet de chambre du roi de Navarre et de feu Lucrèce Marye sa première femme. Le mariage sera célébré en face de la sainte Eglise. La dot de la future est 666 écus sols 2/3. Les témoins du futur sont : son père, Macé Marchand, marchand à Tours , oncle maternel, Jacques Foucault marchand à Tours et Claude Charbonneau, sa femme, sœur du futur marié, Jacques Foucault le jeune, marchand à Tours , son neveu. Les témoins de la future sont : son père, Jehanne Sireau, femme de son père, Catherine Marye, veuve de Mathurin Javelle, tante maternelle, Gilbert Rousseau, sieur du Juscot, contrôleur ordinaire du roi de Navarre , cousin germain, à cause de Catherine Javelle sa femme, Marie Javelle, veuve de René Rouyer (?), sieur de Beauseullaye, cousine germaine.



Le mardy seziesme jour de decembre l'an mil Vc soixante dixhuict, en la cour du roy nostre sire et de Monseigneur a Tours , end.t par devant moy Charles Bertrand notaire royal et gardenotes en icelle, furent present en leurs personnes personnellement establyz et deuement soubzmis en ladite court Gilles Charbonneau, marchant maitre ouvrier en soyes audit Tours , filz de noble homme Guillaume Charbonneau nagueres maire de cestedite ville de Tours , sieur du Bouschet, bourgeoys et eschevyn de ladite ville, demourant en la paroisse de Saint-Pierre-le-Puellier dudit Tours , d'une part et Marguerite de Longuemort, fille d'honorable homme Adam de Longuemort, sieur de La Goguerye, varlet de chambre du roy de Navarre et de deffuncte Lucrece Marye, sa premiere femme, demeurant en la paroisse de Saint-Saturnyn dudit Tours , d'autre part. Entre lesquelles partyes a esté faict presentement faict les accordz traicté de mariage et conventions matrimonielles promesses et obligations comme s'ensuyvent, c'est assavoyr que ledit Gilles Charbonneau a l'authoricté voulloir et consentement dudit sieur de Bouschet son pere de Macé Marchand marchant en cestedite ville son oncle maternel Jacques Foucault, aussi marchand de cestedite ville et Claude Charbonneau, sa femme sere dudit Gilles et Jacques Foucault le Jeune, aussi marchand audit Tours son cousin nepvfeu a promis et promet prendre a femme et espouse paraillement ladite Marguerite de Longuemort et en soll? laquelle pareillement a le voulloyr auctorité et consentement dudit sieur de La Goguerye son pere de dame Jehanne Sireau a present femme dudit sieur de La Goguerye] dame Catherine Marye dame de Dobnon veufve de feu maistre Mathurin Javelle, vivant tresorier d'Alenczon tante de ladite Marguerite, d'honorable homme Estienne Gatien, marchant maistre ouvrier en soyes de cestedite ville et Catherine Langloys, sa femme sere uterine de ladite Marguerite de noble homme Gilbert Rousseau, sieur du Juscot, contrerolleur ordinaire de la maison du roy de Navarre cousin germain de ladite Marguerite a cause de dame Catherine Javelle, sa femme et d'honorable femme Marye Javelle, veufve de feu [barré] René Rivyere, vivant sieur de Beausoullage aussi cousine germayne de ladite Marguerite tous a ce present ont respectivement les dessusdits Gilles Charbonneau et ladite Marguerite de Longuemort promys et promectent se prendre en mariage l'un l'aultre et en sollempniser les espouzailles en face de Sainte Église si et quant l'un par l'aultre en sera sera sommé interpellé et requis en faveur et contemplant dudit mariage ledit sieur de La Goguerye a promys et promet bailler et payer ausdits futurs [1v°] espoux auparavant leur benediction nuptialle en adivancement? de droict naturel et successif d'icelle future espouze tant paternel que maternel et premierement sur le maternel la somme de six cens soixante six escus sol et deux tiers d'escu au lieu de deux mil livres tournois dont et de laquelle somme y en aura la somme de quatre cens soixante six escuz sol et deux tiers d'escu au lieu de quatorze cens livres qui seront et demouiront en nature de deniers dotaulx pour ladite future et espouse et le surplus montant deux cens escus sol revenant a la somme de six cens livres seront et demouerent en nature de meubles commungs entre lesdits futurs espoux. Et en cas de dissollution dudit mariage par la mort de l'un desdits futurs espoux ou autrement par la dissollution de la communauté de biens ou ils entreront incontinent leur mariage consommé est dict et accordé que ladite future espouze aura, levera et prendra premierement et preallablement icelle somme de quatre cens soixante six escus sol et deux tiers d'escu revenant a ladite somme de quatorze cens livres tournois sur la moityé de tous et chacuns les biens meubles et autres censez pour meubles et plus clairs et liquides deniers d'iceulx concernant le chef dudit futur espoux qui se trouveront lors de ladite communauté dissollue par entreulx, en chacun des cas cy dessus et ou il ny en auroyt a suffire sur les biens immeubles propres et maternelz dudit futur espoux et a luy apartenant a cause de deffuncte Jehanne Arcault, sa mere en son viviant femme dudit sieur de Bouschet lesquelz immeubles demeurent a cest effect dès a present ypothecques pour l'assignat et asseurance desdits deniers dotaulx payement et restitution d'iceulx et où lesdits meubles et immeubles dudit futeur espoux ne seroyent suffisant pour satissfaire a l'entier payment et resitution desd d'iceulx denyers dotaux ledit sieur de Bouschet pere les a assignez et assigne sur son lieu et mestairye du Preau apartenants et deppendants d'icellui lieu, consistant en maison, grange, tectz a bestes, bastiments et ediffices, terres labourables et non labourables contenant le tout soixante six arpens de terre situé et assys [2r°] en la paroisse de Cigongné près Bleré en ce pays de Touraine demourant neantmoings en l'option de ladite future espouse audit cas de dissollution dudit mariage et remener a la communauté de biens selon le beneffice de la coustume de Touraine auquel cas elle aura et prendra selon la forme que dessus ladite somme de quatre cens soixante six escus sol et deux tiers d'escu revenant a ladite somme de quatorze cens livres pour sesdits deniers dotaulx et envers la somme de deux cens escuz sol revenant à la somme de six cens livres faisant apres le deces toutesfoys dudit sieur de Bouschet pere et sur les plus clairs et liquides deniers meubles ou deniers ou biens immeubles qui se pourront les trouver et eussent apartenir audit futeur espoux s'il eust survescu ledit sieur de Bouschet son pere et neantmoings est accordé entre les au cas contraire que ladite future predeceddast ledit futeur espoux et sans hoirs procreez de sa chair en cest cas est accordé que ledit futeur espoux joyra sa vye durant desdits deniers dotaulx demeurant en leur force et vertu les assignatz et ypothecques d'iceulx pour les rendre et restituer audit sieur de La Goguerye ses hoirs et ayans cause apres le deces dudi futur espoux, lequel au surplus a donné et donne ladite future espouze de douaire coustumyer sur tous et chacun les biens immeubles qu'il a de present et aultres qu'il pourra avoyr lors de son deces mesmes sur la contingente part et portion des biens Immeubles qui luy pourront escheoyr [barré] qui se trouverroyent luy apartenir a cause dudit sieur de Bouschet sondit pere apres le deces d'iceluy encores et nonobstant que ledit futur espoux predeceddast ledit sieur de Bouschet son pere et de consentement expres d'iceluy sieur de Bouschet qui ainsi l'a voullu et accordé et quant a tous Etc. obligent lesdites partyes respectivement etc. renoncant etc. promys etc. foy etc. jugé etc. faict et passee audit Tours ès presence de nobles hommes Charles Falaiseau, maitre Mathurin Estenon, licencié ès loix, sieur de Langellimerye, Charles Falaiseau, sieur du Plessys, docteur en medecyne et maitre Jehan Huault, procureur au siege presidyal dudit Tours a ce requis et appellez constat en interligne ces motz promesses et obligations / pareillement / Marie dame de / tous a ce presents / pour lesdits deniers dotaux / requis et que approuvent et oultre constat en interligne son nepveu que approuvent.
[Signé] De Longuemort, Catherine Langloys, Charbonneau, Janne Sireau, Estenon, Foucault, Charbonneau, Charles Falaiseau, Huault, Rousseau, Marguerite de Longuemort, Bertrand, Marchant, Catherine Marie, Gacian, Foucault.
Et le mardy vingtiesme jour du moys de janvier l'an mil cinq cens soixante dixneuf, en presence de notaire Charles Bertrand notaire royale et gardenotes audit Tours susdit ledit Gilles Charbonneau tant pour luy que pour ladite Marguerite de Longuemort a present sa femme et espouse et a laquelle il aprouve faire rateffie ces presentes et pour ce faire l'a auctorisee et auctorise a presentement receu comptant dudit De Longuemort, sieur de La Goguerye pere de ladite Marguerite en presence dudit sieur de Bouschet pere d'iceluy Gilles ladite somme de six cens soixante six escuz sol et deux tiers d'escu [barré] prinse ausdits Gilles Charbonneau et sadite femme par le contract et accord de marige cy dessus et ce en trois cens quarante cinq doubles escuz pestelletz tournois d'espaigne qui ont esté receuz par Iceluy Gilles Charbonneau et dicelle somme s'est tenu pour comptant faict audit Tours en la maison dudit sieur de Bouschet qui a declaré ne pouvoyr presentement signer a cause de la malladye en laquelle Il est de present debout et constatant a ce que dessus lesdits Jacques Foucault l'esné gendre dudit sieur de Bouschet ledit Macé Marchant et ledit Jacques Foucault le jeune, filz dudit Jacques Foucault mesme et maistre Jehan Huault, procureur au siege presidyal de Tours a ce requis que approuvent.
[Signé] Charbonneau, Foucault, M. Marchant pour present, Foucault pour present, Bertrand, Huault pour present.





text encoding initiativePowered by XTF
Centre d'Études Supérieures de la Renaissance
Cette œuvre est mise à disposition selon les termes de la Licence
Si vous utilisez ce document dans un cadre de recherche, merci de citer cette URL :
http://renumar.univ-tours.fr/xtf/view?docId=tei/TIPO469493.xml&doc.view=print;chunk.id=n1
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0).
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0)