Procuration en blanc d’Ysabeau Ribou, veuve de Julien Crosseau, garde-vaisselle de la reine de Navarre 
, sœur du roi (Chinon , paroisse Saint-Étienne), tutrice d’Ysabeau Crosseau, sa fille, pour résigner l'office de garde-vaisselle de son défunt époux homicidé et le vendre à Jean Rocher, comme cela est en son pouvoir, donné par la reine de Navarre en compensation de l'assassinat. L’acte est passé dans la maison de Charles Ribou, conseiller du roi et magistrat au siège présidial de Tours .
Le quatreme jour de juillet l'an mil VC quatre vingtz quatre, en la court du roy nostre sire a Tours , par devant Charles Bertrand, notaire royal juré et estably audit Tours , fut presente en sa personne, establie et deuement soubzmise au pouvoyr et jurisdiction de ladite court, honorable femme Yzabeau Ribou, veufve de feu Jullien Crosseau, vivant gardevaisselle de la royne de Navarre , seure unicque du roy, demourante en la ville de Chinon , paroisse de Saint Estienne, tant en son nom que comme tutrice naturelle de Yzabeau Crosseau, fille dudit deffunct son mary et d'elle, laquelle a faict et constitué son procureur (blanc), auquel ladite constituante et audit nom, en vertu du pouvoyr et brevet a elle expedié par la majesté de ladite dame royne de Navarre du vingt ungme jour de septembre mil VC quatre vingtz trois, signé de ladite dame et plus bas contresigné Le Court, qui sera transcript et inceré en fin de ces presentes, et soubz le bon plaisir de ladite dame royne, a donné et donne pouvoyr, puissance et mandement special de resigner purement et simplement ledit estat et office de gardevaisselle de ladite dame, duquel ledit deffunct Crosseau estoit pourveu de son vivant ès mains d'icelle dame et du premier maitre d'hostel de sa maison ou d'autre qu'il apartiendra, et consentir lettres de provision retenue et expedition necessaires en estre expediees pour au nom et au proffict de Jehan Rocher, demourant audit Tours , et non d'autre. Et generellement etc. Promectant etc. Obligeant etc. Faict et passé audit Tours , en la maison de noble homme [1v°] maitre Charles Ribou, conseiller du roy et magistrat au siege presidyal de Tours , apres midy, presences de honorable homme maitre Paul de Reugny, sieur de Boiscain, demourant audit Tours , et René Contantin, serruzier demourant au bourg et paroisse de Valliere, tesmoings a ce requis. Constat en interligne et soubz le bon plaisir de ladite dame royne que approuvons, retenir necessaires paroisse Saint Estienne que approuvons.
[Signé] Yzabeau Ribou, De Reugny present, René Contentin, Bertrand.
S'ensuyt la teneur dudit brevet, aujourd'huy vingt ungme jour de septembre l'an mil cinq cens quatre vingtz trois, la royne de Navarre , soeur unicque du roy, estant a Aigre , apres avoir entendu l'homicide commis en la personne de Jullien Croceau, son gardevaisselle, a en faveur de la veufve et enffens dudit deffunct Crosseau voullu et ordonné que ledit estat de gardevaiselle soyt et demeure a la disposition de ladite veufve et enffens s'ilz sont en eage, pour y estre par sa majesté pourveu a leur nomination de telle personne capable, resceant et sovable qu'ilz adviseront. En tesmoing de quoy sadite majesté m'a commandé en expedier ausdits veufve [2r°] et enffens le present brevet qu'elle a pour ce voullu signer de sa main les an et jour que dessus. Signé Marguerite et plus bas Lecourt.
[Signé] Bertrand.
