1498, 24 octobre — Tours

Le XXIIII^e jour d’octobre l’an mil IIII^c IIII^xx XVIII, en la court du Roy notre sire a Tours , personne estably Anthoine Rancher, boucher de la boucherie des Arciz de ceste ville de Tours soubzmettant etc lequel a cougneu et confessé en ladite court que moyennant certain transport a lui ce jourdui fait par Pierre Guillemeaux et Jehan Lullier aussi boucher de certaine rente que la vesve feu Jehan Tillier l’esné et Jehan Tillier le jeune son filz leur devoient. Et nonobstant que de ce dont cy apres est touché ne soit en icelui fait mencion. Il a promis et encore par ces presentes promet de bonne foy de acquicter, descharger et rendre indempnes des a present a tousjoursmais lesditz Guillemeaux et Lullier ace presens et pareillement Pierre Le Maistre, Gillet Bretault et la vesve feu Jehan Lucas et chacun d’eulx leurs hoirs et biens quelzconques de toutes les obligacions en quoy lesditz Guillemeaux et Lullier et aussi ledit feu Jehan Lucas, Le Maistre et Bretault s’est austreffois obligez avecques ledit Rancher et autres bouchers de ladite boucherie envers sire Jehan Beraudeau, Victor Gaudin, Gacian Nouveau et maistre Pierre Duban pour la somme de cinq cens livres t. que lesditz Beraudeau, Gaudin, Nouveau et Duban leurs baillerent pour aider a avoir leurs franchises et pour lesquelx VC livres ilz vendirent et constituerent sur certains leurs biens et heritages a iceux Beraudeau, Gaudin, Nouveau et Duban L livres tournois de rente ensemble desdites somme de VC livres et rente de L livres tournois a ledit estably obligé et oblige soy ses hoirs etc renonçant etc foy etc. Presens Jehan Bonnet et Georget Berger, tesmoings ace appellez.
[Signé] Jaloignes J.