Inventaire après décès de Jacques Bigot (13).
Mercredi 9 décembre 1587 : suite et fin de l’inventaire du mobilier (bijoux, vaisselle d’argent, mobilier des autres résidences) ; inventaire des titres et enseignements (procédures)
La suite de l’inventaire après décès de Jacques Bigot se trouve sous la date du lundi 14 décembre 1587 matinée.
[p. 67, f. 34a, suite]
Advenu lequel jour de mercredi neufiesme dud. present moys de decembre 1587, a lad. assignation se sont lesd. partyes comparues en leurs personnes comme es assignations preceddantes par devant nous, commissaires dessusdits ; en la presence desquels avons proceddé à la continuation dud. inventaire comme s’ensuyt.
Ladicte dame Jehanne Caillouet a representé la vaisselle d’argent, bagues et joyaulx cy-après ; pour laquelle appretier et pezer, led. Delalande, maistre priseur et vendeur, a faict comparoir sire Loys Couppeau, maistre orfebvre en cestedicte ville de Tours , paroisse Saint-Saturnyn, duquel lesd. partyes ont pareillement convenu et declaré pour le fait de lad. pezee et duquel avons prins le serment au cas requis et accoustumé.
BAGUES, JOYAULX ET VAISSELLE D’ARGENT.
Premierement, une paire de patenostres de coural, gerbees et marquees d’or, appretié le tout ensemble a 12 escuz sol., cy : 12 escuz.
Item, une aiguière
une ecuelle oreille(1)
deux sallieres a griffes(2)
vingt troys cuillers d’argent
une douzaine de fourchettes
ung petit tastevin d’argent
Le tout poizant douze marcs deux onces, appretié chacun marc a six escuz dix solz t. rev[en]ant le tout a la somme de soixante quinze escuz, trente deux solz, six deniers t. cy : 75 escuz 32 solz 6 d.t.
Ce fait, lad. dame a declairé que, au lieu de Bois-Jhésus sont quelques meubles de boys de peu de valleur, lesquelz furent neantmoings acheptez par led. deffunct son mary avec led. lieu de Bois-Jhésus et font portion dud. lieu pour n’avoir esté separez du prys du contract ; tous lesquelz meubles, du consentement desd. partyes, demoureront aud. lieu pour l’usaige [p. 68, f. 34b:] et commodité d’icellui, sans autrement d’iceulx en estre faicte aulcune description et appretiation.
IIIIxx VII escuz XXXII solz VI deniers t. [87 écus 32 sols 6 deniers t.]
Aussi, a lad. dame déclairé qu’il y a au lieu et clozerye de Saint-Cyr :
deux charlitz de boys,
une table sur deux tresteaulx
six chezes
et sept escabeaulx
que lesd. parties ont pareillement accordé demourer aud. lieu et sans ce que, partant, il en soyt par nous fait autre description, ne qu’il soyt proceddé a aulcune appreciation d’iceulx.
Comme aussi a lad. dame declairé que, aud. lieu de Bois-Jhésus, sont troys vaches, lesquelles lesd. partyes ont dit avoir faict veoyr a Françoys Negrelier, maistre boucher, lequel, icelles partyes ont faict comparoyr, qui nous a rapporté avoir veu et visité lesd. vaches et icelles appretiees, le serment pour ce faict de luy prins en tel cas requis, a la somme de unze escuz deux tiers, cy : 11 escuz 2/3.
Et au lieu et mestayrie du Mortier, lad. dame a declaré qu’il y a ung porc qui a esté pareillement veu et appretié par icelluy Negrier [sic], lequel nous a declaré estre de la valleur de la somme de quatre escuz soleil, aussi le serment de luy pris comme dessus, cy : 4 escuz.
Daventaige, lad. dame a declaré avoir esté recueilly es lieulx de lad. comunité en la presente annee, le nombre et quantité de 23 septiers de blé mestail.
avoyne, six septiers six boesseaux.
Tout lequel bled cy-dessus a esté appretié par Jehan Boutard, maistre boulanger, pour cest effect mandé par lesd. parties et presenté par led. Delalande et de luy prins le serment comme des cy-dessus nommez, assavoir, chascun desd. septiers mestail a 2 escuz 1/3 qui seroit la somme de 53 escuz 40 s.t.
Et lesd. six septiers six boesseaux avoyne, a raison de ung escu 1/3 chacun septier, cy : 8 escuz 2/3.
LXXVIII escuz t. [78 écus]
[p. 69, f. 35a]
A aussy lad. dame declairé qu’il a esté recueilly en lad. presente anneee, es vignes et clozeryes de lad. comunité, le nombre et quantité de 10 pippes et demye, tant blanc que clairet ; assavoir, de blanc : 6 pippes et le reste clairet ; lequel vin a esté appretié par Jehan Carrant, maistre tonnelier en ceste ville de Tours , fait comparoyr par lesd. partyes et a nous presenté par led. Delalande, duquel avons prins le serment au cas requis. Et après, icellui a declairé led. vin valloir 10 escuz la pippe, l’un portant l’autre, qui seroit pour led. nombre la somme de 105 escuz.
Et pareillement, lad. dame a declairé appartenyr a lad. communité une jument a poil blanc ayent queue et oreilles, garnye de sa selle, bride et bast, appretiee par lesd. partyes et de leur accord et consentement, la somme de treze escus une livre : 13 escuz 1/3.
Item plus, une asnesse aussy garnye de son bast, appretiee par lesd. partyes comme dessus a 1 escu 2/3 : 1escu 2/3.
Somme toute que se monte le present chappitre desditz meubles est 671 escus 37 s. 6 d.t., cy : VIcLXXI escuz XXXVII s. VI d. [671 écus 37 sols 6 deniers]
[p. 71, f. 36a]
TITRES et ENSEIGNEMENS representez par lad. dame Caillouet, desquelz la teneur ensuyt :
Premierement, un sacq de toille eticqueté Contratz de bail a rentes et de rentes constituees dedans lequel ont esté trouvez les pieces cy après, assavoir :
Ung contract en parchemyn, receu et passé par Terreau, notaire royal a Tours , le 28e juing 1570, signé : Leblanc, Duverger, Duboys et Terreau(3), par lequel appert avoir esté vendu et constitué la somme de 25 l.t. de rente sur la recepte des tailles de cested. ville pour la somme de 300 l.t., que led. deffunt Bigot avoit payee ainsi qu’il apert par led. contract et en la suytte d’icelluy ; auquel contract est attachee une quittance en parchemyn de lad. somme de 300 l. t., signée Mesnager, datee du 28e juing. Cottee par A.
Item, ung autre contract en parchemyn, signé Lefebvre(4), Boutard et Joubert, en date du 11 mars 1574, par lequel appert avoir esté vendu, constitué, assys et assigné aud. sieur de Bois-Jhésus 37 l. 17 s.t., apprendre [i.e. à prendre] sur la recepte des deniers commungs de l’Hostel de cested. ville de Tours , pour la somme de 450 l.t. ; auquel contract est attaché une quittance aussy en parchemyn, signee De Lafons, en date du 13e octobre 1573, du receu de lad. somme de 450 l.t. par led. Delafons, comme recepveur des deniers commungs de lad. ville : cotté par B.
[p. 72, f. 36b]
Item, ung autre contract en parchemyn, du 22 juillet 1573, receu par Digoys et Denys notaires royaulx a Tours , signé De Fortia, Leblanc, Dechaurays et desd. Digoys et Denys(5), contenant la vendition et constitution faite par les commissaires du roy en ceste partye aud. deffunt sieur de Bois-Jhesus [de] la somme de 20 l. t. sur la recepte des tailles tant ordinaires que extraordinaires pour 240 l. t. ; auquel contract est attaché une quittance de parchemyn, signee Chaloppin, de lad. somme, en date du 20 février 1573, avec deux pieces en pappier, une qui est une ordonnance signee De Fortia et Leblanc, a l’effect et contrainte de payement de lad. somme de 240 l.t. ; et l’autre est un exploict de commandementz faitz aud. deffunt sieur par Bizieu, cotté led. contract par D.
Lesquelz contractz cy-dessus ont esté remys aud. sacq cotté par A.
Item, deux sacqz attachés ensemble, concernans 4 septiers froment et 2 septiers de blé de rente dus aud. defunt en la paroisse de Parçay ; ' lad. rente appartenait autrefois aud. deffunt controlleur Lussault ; on a trouvé en outre deux contrats en parchemin, le premier du 2 mars 1574, passé par devant [p. 73, f. 37a] Becquerel, notaire royal a Tours (6) contenant maistre Nicollas Lussault avoir vendu aud. deffunct le nombre desd. septiers de rente fonciere dont y en a 4 septiers de ble froment, bon ble, deux deniers moings que litte, et deux seigle, le tout mesure du Roy de rente a prendre le jour de la saint Michel, sur les detempteurs des lieux du Chaussoys, La Herissaudière et La Dyablerye, situez en la paroisse de Parçay , Chanceaulx et Monnoye, pour le prys et some de troys cens livres t. en principal et 10 escuz en vin de marché ; a la suite duquel contract est la prinse de possession de lad. rente et la quittance de parfaict payement dud. princippal ; sur le doz d’icellui contract aussi signé Becquerel.
Le 2e est ung autre contract en parchemyn du 30e jour de septembre 1577, passé par devant led. Becquerel, notaire royal, portant certain accord et transaction avoir esté faict entre led. Lussault et Pierre Guérin, d’une part, et led. deffunct Bigot, sieur de Bois-Jhesus, des differandz qui estoyent entre eulx pour raison de lad. rente, le tout ainsi que plus a plein apert par led. contract. Cottez au doz du premier par E.
Plus aud. sacq, sept tiltres en parchemyn antiens faisans mention de lad. rente, avec une declaration en pappier, attachees lesd. sept pieces.
[p. 74, f. 37b] Et en l’aultre sacq ont esté trouvez plusieurs autres pieces, tant en pappier que parchemyn, qui sont aussi tiltres anciens et proceddures faictes contre les detempteurs des hipothecques subjetctz a lad. rente et, entre aultres, ung jugement donné au siege presidial de Tours le 4 febvrier 1578. [Signé] Bourru.
Lesquelles pieces cy-dessus ont esté remises ausd. deux sacqz, qui ont esté cottez par B.
Ce faict et ce requerans lesd. parties, avons continué la presente assignation et comparution a lundi prochain, pareil lieu et heure que dessus, pour procedder au faict et execution de nostred. commissiion ; auquel jour, lieu et heure demeurent icelles parties inthimees.
1. écuelles : voir Lehoux, op. cit. p. 304. — 2. salières : ibid. p. 306 note 214. — 3. On ne conserve pas les minutes Terreau pour 1570 ; ces constitutions de rente ont sans doute été passés indépendamment des autres contrats. — 4. Lefebvre : ce nom est vraisemblablement celui du notaire ayant exercé à Tours de 1552 à 1579. — 5. Ce contrat existe encore dans les minutes Digois (1573) sous la mention ' actes De Fortia '. — 6. Ce contrat existe encore dans les liasses du notaire Becquerel (1574) ; on en trouvera la transcription sous le nom de ce notaire à cette date.