Contrat d'apprentissage de rubanier-passementier.



Le dix septiesme jour de febvrier mil cinq cens soixante et quinze, en la court du Roy nostre sire à Tours , furent presens en leurs personnes establys et deuement soubzmis etc. honneste personne Loys Groleau maistre rubanyer et passementier demourant en la paroisse Sainct-Venant de ceste ville de Tours d’une part, et Rene Moisant, vigneron demourant en la paroisse de Fondettes , et Jamet Moysant son filz aagé de douze ans ou environ ; lesquelles partyes ont fait et par ses presentes font entre eulx le marche d’aprentissage, accord et promesses et obligations qui s’ensuyvent. C’est assavoir que led. Jamet Moysan, o l’octorite, voulloir, conseil et consentement de sond. pere, a promis et promect estre et demourer avec et en la maison dud. Groleau et le servir comme aprentilz de l’estat de rubanyer et passementier, dont led. Groleau se mesle, et en toutes autres choses licites et honnestes, son honneur et proffit garder, son dommaige fuyr et esviter au mieux que luy sera possible du jourdhuy jusques à six ans prochains venans, consecutifs et suyvans l’un l’aultre sans intervalle, pendant [et] durant lequel temps led. Groleau a promis et promect luy montrer et apprendre sond. estat de passementerye en se dont il se mesle et l’en rendre à la fin dud. temps expert et ouvrier sy aud. aprentil ne tient. Ne fournyra oultre, led. temps durant, de boire, manger, feu, lit et de chausseure de soulier et sabotz seullement ; et sond. pere l’entretiendra pour tous ses vestemens et linges selon et ainsi que a son estat apartient et sans que pour raison dud. apprentissaige et service, lesd. partyes soient tenuz bailler et payer l’une à l’autre aucune chose et ce qui ainsi a esté convenu et acordé entre lesd. partyes ; et quand à tous etc. Obligent lesd. partyes l’une à l’autre, eulx, leurs hoirs et biens etc., mesme led. aprentis, quant à faire et parfaire led. aprentissage justement et loyaument led. temps durant, son corps a tenir prison fermee que comme pour faire. Renonçans etc. Fidem etc. Presens ad ce maistre Jehan Gaultier demourant aud. Tours , Michel Delin, demourant en la paroisse Sainct-Symphorien et Pierre Rou, tesmoings. Et ont lesd. partyes et tesmoing [declaré ne savoir signer].
[Signé] Foucher, Rou, Gaultier.





text encoding initiativePowered by XTF
Centre d'Études Supérieures de la Renaissance
Cette œuvre est mise à disposition selon les termes de la Licence
Si vous utilisez ce document dans un cadre de recherche, merci de citer cette URL :
http://renumar.univ-tours.fr/xtf/view?docId=tei/TIPO476197.xml&doc.view=print;chunk.id=n1
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0).
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0)