Certification des commissaires du roi à Franchise (Arras ) de la réception et de l'inspection des qualités des quarante-sept ménagers de la ville de Tours venus sous la direction de Jean Bertrand et Jean de Bray, avec mention des tarifs et des sommes payées par la ville pour l'entretien pendant deux mois de tous ceux qui sont venus ou des femmes et enfants que les ménagers ont été obligés de laisser à Tours .



Les commissaires du roy notre seigneur etans a Franchise certiffions a tous a qui il appartient que Jehan Bertran et Jean de Bray commis et depputez de la ville de Tours , nous ont presenté cinquante mesnagiers tant pour ladite ville que autres villes adjournes, c'est a savoir, Chateaurenault, Ligueil , La Haye(1), Langés(2), Bleré , Montrichar(3), Monbaron (4) et Azay-le-Brullay(5), de divers mestiers les nons et seurnons desquelz avons fait enregistrer et iceulx veuz et examynez par diverses foiz et du nombre d'iceulx avons receu et retenu quarente-sept desdits mesnagers lesquelz lesdits commis nous ont affermé estre souffisans, puissans et industrieux pour eulx vivre et entretenir convenablement en ceste ville de Franchise. Et le residu comme insouffisant et inexpers, impuissant et inutilz avons renvoyez et reffusez en la presence desdits commis et depptuez eulx sur ce premierement par serment solempnel interroguez et oiz et leur avons ordonné en fournir d'autres souffisans ou lieu desdit ainsi reffusés en ensuivant et accomplissant ce que en ladite ville de Tours leur en fut et a esté commandé par les commissaires du roy notre seigneur lors y estans et ausquelz ainsi receuz et retenuz, nous avons par lesdits commis et depputez fait paier toute leurs despence depuis le jour de leur partement deladite ville de Tours jusques aujourd'hui ce jour compris ensemble la voicture d'eulx, leurs femmes, enffans, mesnaiges, et outilz des dessusdits sont encore a venir que lesdits commis et depputez les feroient incontinant amener aux despens de ladite ville de Tours et des autres dictes villes adjointes et aussi plus avons ordonné et appoincté que lesdits commis payeront auxdits mesnaigers ainsi receuz et retenuz pour leur vivre et entretenement de deux mois commancant le XVe jour de ce présent moys d'aoust c'est asavoir pour chacun chef de maison LX s., pour la femme XL s., pour chacun enffans XX s., et pour chacun suivant ou serviteur qu'ils ont amené avecques eulx autres XX s., pour chacun desdits deux mois. Et si lesdits mesnaigers ont laissé aucuns enffans a nourrisse par dela lesdits commis les feront nourrir juques a ung an au despens de la ville. Aussi, si il y a aucune femme grosse en aparence d'acoucher audedans desdits deux moys iceulx commis leur bailleront et delivreront ung escu d'or pour la relever. Et outre avons ordonné que iceulx commis feroient lesdits paiement en la presence de deux des grans marchans venuz icy de leurs pays qui en signeront les quictances et certiffiront lesdits payements avoir esté faiz en leurs presences. Donné en ladite ville de Franchise, le XIIIIe jour d'aoust l'an mil CCCC soixante dix neuf.

[Signature : ] J. Moreu, N. de Cerisay, [...].





Notes :

(1) La Haye-de-Touraine, aujourd'hui Descartes , ch.-l. com., dep. Indre-et-Loire. —(2) Langeais , ch.-l. com., dep. Indre-et-Loire.— (3) Montrichard , ch.-l. com., dept. Indre-et-Loire. — (4) Pour Montbazon , ch.-l. com., dep. Indre-et-Loire. — (5) Pour Azay-le-Rideau , ch.-l. com., dep. Indre-et-Loire.



text encoding initiativePowered by XTF
Centre d'Études Supérieures de la Renaissance
Cette œuvre est mise à disposition selon les termes de la Licence
Si vous utilisez ce document dans un cadre de recherche, merci de citer cette URL :
http://renumar.univ-tours.fr/xtf/view?docId=tei/TIPO631687.xml&doc.view=print;chunk.id=n1
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0).
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0)