Lettres closes dans lesquelles Louise de Savoie donne des nouvelles au corps de ville de Bourges du roi prisonnier.



De par madame, regente en france .
Tres chers et bien amez, depuis les lettres que vous avons escriptes , nous avons eu lettres et nouvelles du roy notre tres cher seigneur et filz, par lesquelles il nous a fait savoir comme il est prisonnier ès mains du vis roy de Napples , en tres bonne santé et bien traicté, dont nous louons Dieu. Et mesmement qu'il y a plusieurs bons et grans moyens de sa delivrance et liberté. Et pour ce qu'il est besoing que tous les bons, vrays et loyaulx subgectz dudit seigneur et du royaume soient advertiz de ces nouvelles, nous avons bien voulu les vous escripre en vous priant, requerant et exortant prendre a cueur les affaires dudit seigneur et du royaume, et vous employer a tout ce que vous verrez et congnoistrez estre requis et necessaire, pour le bien, deffence et conservacion dudit royaume. Comme le roy, notredit seigneur et filz, et nous, avons en voz loyautez et prudences entiere confiance, comme plus amplement nous vous ferons entendre par homme expres que nous envoyerons devers vous pour ceste cause. Tres chers et bien amez, notredit seigneur vous ait en sa saincte garde. Escript a Saint Just sur Lyon , le IIIe jour de mars(1).

[Signé] LOYSE.


Robertet

.
A noz tres chers et bien amez les maire, eschevyns, bourgeois et habitans de la bonne ville de Bourges .





Notes :

(1) Lettre datée en fonction des événements qu'elle rapporte.



text encoding initiativePowered by XTF
Centre d'Études Supérieures de la Renaissance
Cette œuvre est mise à disposition selon les termes de la Licence
Si vous utilisez ce document dans un cadre de recherche, merci de citer cette URL :
http://renumar.univ-tours.fr/xtf/view?docId=tei/TIPO631723.xml&doc.view=print;chunk.id=n1
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0).
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0)