Lettre close de Charles VIII adressée aux échevins et habitants de la ville de Bourges 
leur annonçant la venue de son conseiller et chambellan Robert de Bar, seigneur de Baugy , pour aider les échevins dans la gestion des affaires communes, et leur rappelant les ordres précédemment donnés concernant le filtrage des soldats et des messagers passant par la ville.
De par le roy.
Tres chers et bien amez, nous envoions presentement en nostre bonne ville de Bourges nostre amé et feal conseiller et chambellan le seigneur de Baugy (1) pour vous conseiller, conforter et aider en tout ce qu'il pourra touchant les affaires de ladite ville. Pour quoy vous prions et neantmoins mandons que nostredit conseiller vous recevez dedans nostredite ville de Bourges et avec lui conseilles et consultes les affaires d'icelle en l'y convocquant et appellant, et de tout ce qui y surviendra nous advertissez en toute diligence et en ensuivant la bonne loyaulté que touzjours avez eue envers nous, gardez si bien nostredite ville en nostre bonne obeissance ainsi que avez fait par cy devant en maniéré que aucun inconvénient n'en puisse avenir. Et garder sur tant que creignez nous desobeir que pour quelque priere et requeste qui vous soit faicte par aucuns seigneurs ou autres, ne souffrez et permectez nulz gens de guerre entrer en nostredite ville de Bourges sans nostre expres commandement et ordonnance. Et aussi ne souffrez passez ne repassez par nostredite ville aucunes personnes portans lettres que ne saichez que c'est, et se voiez que les lettres soient de consequance envoiez les nous, et vous tenez seurs des porteurs en les faisant bien garder. En quoy faisant nous ferez service très agreable, si ne vueillez en ce faire faulte. Donné aux Montilz-soubz-Bloys, le XXVIIIe jour de septembre.
[Signé] CHARLES
.Damont
.[Au dos] A nos chers et bien amez les eschevins, bourgois, manans et habitans de nostre bonne ville de Bourges
.Notes :
(1) Il s'agit de Robert de Bar, seigneur de Baugy (dép. du Cher ) et capitaine des francs-archers du roi. — (2) Ancien château et domaine royal détruit sous Louis XIV, aujourd'hui situé dans la commune des Montils , dép. du Loir-et-Cher .
