De par le roy.
Chers et bien amez, nous avons sceu la responce que avez faicte a noz amez et feaulx conseilliers les seigneurs de Voulhon et du Bourdet, touchant le fait des gens a pié qui ont esté ordonnez estre mis sus pour le bien, seureté et deffense de nous, nostre royaume et subgectz et pour obvier aux entreprinses d'aucuns noz ennemys quant l'affaire y seurviendra, auquel a present est grant apparance ainsi que avons esté advertiz. Et nous donnons merveilles de la dissimulacion et delaiz que y avez faiz car jamais ne l'eussions cuidé. Et pour ce que ceste matiere nous touche et qu'il est de neccessité qu'elle soit executee sans icelle tirer a conséquence, nous escripvons a nosdits conseillers vous en parler derechef, et voulons et vous mandons très expressement que en toute diligence entendez a ce faire sans plus y differer, ou autrement nous y pourvoyrons en maniere que congnoistrez qu'avez en ce failly et que n'avons cause d'en estre contens. Donné a Troyes 
en Champaigne , le XVIIIe jour de may [1486(1)] .
[Signé : ] Charles.
Parent.
[Au dos] A nos chiers et bien amez, les bourgeoix, manans et habitans de nostre ville de Bourges
.Notes :
(1) Lettre datée par le fait que le roi est mentionné à Troyes le 22 mai 1486.
