Lettre close de Louis XII aux maire, échevins et habitants de la ville de Bourges 
qui confirme la nouvelle de la prise de Ludovic Sforza, duc de Milan , et annonce la modération à 2000 livres tournois de la somme que devait fournir la ville.
De par le roy.
Tres chers et bien amez, vous avez sceu la victoire qu'il a pieu a Dieu nostre Createur nous donner touchant la prinse du seigneur Ludovic(1) et autres noz principaulx adversaires et rebelles de nostre duché de Millan et la rompture et département de la grant armee qu'ilz avoient oudit duché, dont avons rendu et rendons grâces et louenges a Dieu nostredit Createur, ainsi que bien tenuz y sommes. Au moyen de quoy, nous esperons en bref la totalle redduction et pacifique de nostredit duché et si ne nous sera besoing fournir si longuement a la despense de l'entretenement de nostre armee de delà que nous cuidions, et a ceste cause nous mandons a noz commissaires que avons envoyez devers vous et autres bonnes villes franches de nostre royaume pour vous requerir de nous faire quelque prest qu'ilz vous moderent la somme qu'ilz avoient charge vous demander a la somme de deux mil livres tournois seullement, de laquelle encores si noz affaires se feussent peu conduire sans icelle, nous en feussions tres voulentiers passez, mais il ne nous est possible parce qu'il nous convient entretenir pour quatre moys le grant nombre de Suysses qui sont venuz nous servir en nostredite armee, a quoy noz finances ne pourroient si tost fournir. Si ne a faire ce petit prest car autrement nous y pourrions avoir dommaige ainsi que escripvons a nosdits commissaires vous dire que croirez. le XXIIe jour d'avril [1500(2)].
[Signé] LOYS.
Robertet.
[Au dos] A noz tres chers et bien amez les maire et eschevins, bourgeois, manans et habitans de nostre bonne ville de Bourges
. Notes :
(1) Ludovic Sforza, dit Le More, duc de Milan . — (2) La prise de Novare eut lieu le 8 avril 1500.
