1526, 20 octobre —

[f. 44r°] Aujourduy XX^e octobre [mil] V^c XXVI, la femme Pierre Fontenetes, nommee Marion, a declaré au greffe que son mary avait bien de quoy paier les amendes en quoy il avait esté condempné et qu'il avait une bonne maison et des chevaulx.
Jehan Chabot le vieulx a declaré qu'il n'avait de quoy paier.
Mathurin Fallou a declaré qu'il a ung mestier a faire thoilles.
Perrine, femme de Mathurin Benoist a declaré n'avoir riens ; depuis a dit que demy-an en ça, a esté payé quatorze solz a Degand pour amendes.
Morassete, vefve de feu Jehan Poictou, a declaré que depuis cinq ou six ans en ça, led. feu Jehan Poictou et lad. Morissete ont payé les amendes en quoy ilz ont esté condempnez par le verdier de la forest de Loches ; lesd. amendes ont esté baillees a Beauvais, sergent, quant il les a demandez et que lors du trespas de sond. mary Poictou, il estait riche de plus de troys cens livres. [f. 44v°] Raoulland Dupont, sergent de la forest de Loches a declaré au greffe de la court de ceans que puis dix ans en ça, quant il a rendu ses comptes au verdier, il a baillé par extraict les mauvais deniers aud. verdier ; neantmoins depuis huit ou dix jours en ça, Jehan Thouart et Jehan Deforges, a present prisonniers au chasteau de Loches , l’ont mandé querir par devant eulx et luy baillerent certains extraiz du registre qu’ilz luy firent signer pour deniers mauvais ; et dit que les comprins esd. roolles, il les congnoist et n'ont de quoy paier. Dit oultre que Jehan Poictou avoit bien de quoy païer, mais pour ce qu'il avoit esté constitué prisonnier, ne l'executa, combien qu'il eust des biens assez. Mais le verdier luy dist et puis qu'il estait prisonnier, qu'il ne luy saurait que faire et qu'il couchast es deniers mauvais ou en faictes ce que vouldrez. Et dit que led. Jehan Poictou doit plusieurs amendes et quant il s'en sera question, se recouvra⁽¹⁾ bien sur la vefve ; dit qu'il croit bien que Jehan Pinon qui estait condempné en deux solz vj d.eust bien payé mais dit qu'il n'a riens ; a dit que Simon Pharon qui a esté condempné en dix deniers, luy, Raouland Dupont n'a trouvé que son mestier chez luy et neantmoins l'a couché en mauvais deniers ; oultre dit que Pierre Fonterolle a ung lict et avoit deux chevaulx et autres biens ; touteffois luy, Raouland Dupont, l'a couché en mauvais deniers pour ce qu'il y avoit d’autres sommes et le vouloit executer tout ensemble ; dit que le mesurays⁽²⁾ de chenes avait bien de quoy et neantmoins l'a couché en mauvais deniers [f. 45r°] par ce que le verdier luy dist qui le laissast là. Dit que Hillaire Rousseau a de quoy et qu'il recouvra bien l'amende sur luy, combien qu'il soit couché en mauvais deniers, pour ce que lors il estoit prisonnier et avoit des biens en sa maison pour fournir la somme de cinq solz. André Guirard a de quoy, combien qu'il soit couché en mauvais deniers et qu'il les recouvra bien, combien que pour lors il avoit riens ; dit que la vefve feu Jehannot Giroust a de quoy combien qu'elle soit couchee en mauvais deniers, mais que lad. vefve est cousine du verdier et ne vouloit qu'elle fust executee. Bien dit que quatre ou cinq jours, il dist au greffier qu'il ne la couchast point en mauvais deniers et qu'elle avoit bien de quoy, et dit que Jacques Sordeau a de quoy paier et a esté condempné en la somme de lxx s. d'amende et trente ·solz pour quatre fousteaulx, combien qu'il a esté couché en mauvais deniers par ce que le Sieur de Pontbriant⁽³⁾ dist au verdier que on ne luy demandast riens et led. verdier dist à il, Dupont : « Vous voyez qu'on vous a commandé, laissez le la. » Et oultre le dit Sordeau a esté comdempné en XXX s. d'amende et XV. s. pour l'interest et a esté couché comme dessus.
Aujourduy XX^e octobre V^c XXVI ès prisons de Loches , en la presence de Jehan Thouart, verdier de la forest de Loches , luy avons leu de mot a mot ung acte faisant mencion des mauvais deniers couchez en l'estat de Raouland Dupont, sergent de la forest de Loches , lequel acte icelluy Dupont dit contenir verite en la presence dud. verdier, lequel verdier a dit qu'il estoit véritable. Signez : Dupont et Thouart.
[f. 45v°] Depuis, led. Raouland Dupont est comparu par devant nous, lequel nous a dit que Colinet Doultremespuis en amende de vingt cinq livres et neantmoins l'a couché ès deniers mauvais, combien qu'il avoit de quoy paier lad. amende ; mais dit que le cappitaine Pontbriand deffendit au verdier Thouart et a luy Dupont de ne executer le dit Doultremespuis.

(1) Se recouvra : se recouvrera ; cf. Fouché, Le verbe français (Paris, 1967), qui cite les formes de futur : entera, delivera, mostera, § 199. — (2) Mesurays : mesureur ?— (3) François de Pontbriand fut capitaine du château de Loches de 1479 à 1521. En 1500 il était "maistre des eaues et foretz en la chastellenie de Loches " (cf. Boulay de la Meurthe, "Histoire des Guerres de Religion à Loches et en Touraine", dans Mémoire de la Société archéologique de Touraine. Tome XLV, Tours, 1907, p. 22).