[f. 50 r°] Entre les religieux, prieur et convent de la Chartreuse près Loches , demandeurs en delivrance d'une part, et le procureur general du Roy es eaues et forestz ou son substitud deffendeur d’autre ; veue la requeste a nous presentee par lesd. demandeurs de laquelle la teneur s’ensuit :
« A Monseigneur Monsieur le lieutenant general de la Table de Marbre, refformateur de la forest royale de Loches . Supplient humblement les religieux, prieur et convent de la Chartreuse près Loches , comme par previlleges a eulx donnez par les roys de France deuement veriffiez et enregistrez en la Chambre des Comptes et confermez par le Roy nostre Sire qui a present est, ilz aient plain usage et droit de prandre du boys en lad. forest pour les necessitez de leurd. maison de Chartreuse et menbres qui en deppendent, tant acquis que [à] acquérir en la chastellenie dud. Loches . Pareillement quand il y a glandee et pesson en icelle forest, ilz ont droit d'y mectre cent bestes porcines sans en paier pour ce aucune chose et, pour ce que lesd. supplians ont esté advertiz que en usant de vostre office, avez mis lad. forest en la main du Roy, nostre Sire, et fait faire inhibicions en termes generaulx a tous ceulx qui y pretendent aucun droit, de non y entrer pour en user sans premier vous avoir deuement [f. 50v°] informé de leursd. droiz ; a ceste cause, iceulx supplians vous exibent et presentent leursd. previlleges et tiltres d’usage de boys et d’autres droiz qu’ilz ont en lad. forest ; ensemble les coppies d’iceulx qu’ilz requierent estre collationnez aux originaulx et lesd. originaulx leur estre renduz, vous requerant et suppliant très humblement, veu par vous leursd. tiltres· et enseignemens, la main du Roy nostre Sire mise sur lad. forest, prealablement levee et ostee à pur et à plain en tant que touche auxd. supplians et les laissez joir de leursd. droiz au long speciffiez en leursd. tiltres et tout ainsi qu'il est mandé par iceulx et vous ferez bien et justice, et obligerez lesd. religieux supplians a prier Dieu pour vous.
Soit monstré au procureur general du Roy sur le fait des eaues et forestz ou son substitud pour venir dire pour l'interest dud. Sire ce qu'il appartiendra. Fait a Loches , le XXV^e octobre V^c XXVI. »
Pour la verifficacion de laquelle ilz ont mis et produict par devers nous les lettres de chartres de Charles, Roy de France⁽¹⁾, esquelles sont inserees, autres lettres de chartres de plusieurs autres roys de France, mesmement unes dactees de l'an mil III^c LXIII, ou moys de juillet contenant la clause qui s’ensuit : “Et de gratia speciali, ac pro certa et noua fundacione per nos concessa tresdecim nouis monachiis ibidem de nouo creandis ac edifficandis cellis ipsorum, concedimus et donamus plenum usagium suum capiendum et habendum perpetua in ipsa foresta per manus gentium regiarum ;” [f. 51r°] ibidem existentium, exceptis defensionibus nemorum qui vocantur gallice « deffaiz », pro omnibus suis necessitatibus quibuscumque in dicto prioratu et membris in dicta castellania existentibus, videlicet tam acquisitis quam in postremum acquirendis in proximiori loco domorum et locorum suorum et utiliori dictoque domino nostro et nobis minus dampnoso sine eo quod dictum usagium suum possint vendere seu etiam permutare⁽²⁾.”
Ensuit la clause de l’autre chartre dactee de l'an mil III^c XLIIII, ou moys de juillet, “pour consideracion des choses dessusd., avons donné et par ces presentes donnons pour Dieu et en ausmone, usage en nostred. forest pour cens pourceaulx masles et femelles pour tout le temps advenir sans paier a nous ne a noz successeurs pour ce aucune chose, combien qu’il soit acoustumé en lad. forest que l'on paye ou temps qu'il y a pesson pour chascun porc troys deniers tournoys et quant il n’y a pesson pour chascun ung denier tournoys. Si mandons etc.”⁽⁵⁾.
Plusieurs aultres lettres, tiltres et enseignemens et confirmacions des Roys de France, mesmement la confirmacion de Françoys, Roy de France⁽³⁾ qui a present est, dactee ou moys de janvier mil V^c XIIII (1515 n.s.), le tout monstré et comunicqué par nostre ordonnance au procureur general du Roy esd. eaues et forestz ou son substitud pour venir dire pour l’interest dud. Sire, ce qu’il appartiendra ; lequel auroit baillé sur ce ses conclusions par escript. Et tout veu et consideré et eu grande et meure deliberacion aux sages, [f. 51v°] il sera dit que ausd. supplians demandeurs pleine delivrance et main levee sera faicte de leurs droiz d'usage et pennage pour en joir par eulx en lad. forest de Loches selon les clauses cy-dessus inscriptes et contenues en leursd. previlleges, et sans abuz, par marc et monstree des officiers de lad. forest ès lieux a eulx plus commodes et moins donmageables pour le Roy ; et partant, avons levé et osté la main du Roy nostre Sire mise et apposee en lad. forest en procedant par nous a la refformacion generalle d'icelle ; par nostre sentence, jugement et par droit. Signé : Hotman, Dargouges et Bizoton⁽⁴⁾. Prononcé à Loches en la presence de noble homme Ysaac Marron, esleu pour le Roy a Loches , procureur desd. supplians, demandeurs, et de maistre Estienne Munoys, substitud du procureur general du Roy ès eaues et forestz, deffendeur, le XVIII^e jour d'octobre, l'an mil V^c XXVI.

(1) Charles VIII, roi de France. — (2) Extrait d’une charte donnée par Charles V, fils aîné du roi de France à Crécy-en-Brie en juin 1363 et confirmée le mois suivant par Jean II son frère (cf. Ordonnances des Rois de France, t. XVIII, p. 344). — (3) Extrait d'une charte donnée à Espiers par Philippe VI en juillet 1344 (Ibid., p. 344 sqq.). — (6) François I^er, roi de France. — (4) André d'Argouges était déjà lieutenant général du bailli de Touraine au siège de Loches en 1502. Il mourut en 1529. Yves Bizoton appartient à une famille dont plusieurs membres exercèrent des fonctions municipales à Loches au XV^ème et au XVI^ème siècles. Yves fut élu de Noël 1491 à Noël 1494 ; il est ici désigné (ibid., f. 54 r°, 05/11/1526) comme lieutenant du Maître des eaux et forêts du comté de Loches . (cf. cf. Boulay de la Meurthe, "Histoire des Guerres de Religion à Loches et en Touraine", dans Mémoire de la Société archéologique de Touraine. Tome XLV, Tours, 1907, pp. 291 sqq.).