Bail à ferme pour trois années par Matherye, veuve de Mathery Trascaille, pour elle et pour leurs enfants, à Guillaume Trascaille, son beau-frère, d'un demi arpent de vigne en trois pièces, aux clos du Vinier et de Chailloyau, pour quarante sous tournois annuels dus à la saint Remy.
Matherye, veusve de feu Mathery Trascaille, demourant a Luysant 
parroisse de Sainct Lomer pres Chartres , tant en son nom comme ayant la garde de ses enffans et dudit deffunct, baille a ferme et loyer d’argent, du jourduy jusques a troys ans prouchains venans etc, a Guillaume Trascaille, frere de ladite dudit deffunct, demourant audit Luysant , preneur, present etc, pour luy etc, demy arpent de vigne ou environ en troys pieces, l’une piece contenant ung quartier, assise au cloux du Vinier, juxte Robin Aubert d’une part et la femme Jehan Chiflet d’autre part, l’autre piece contenant une denree, assise au cloux de Chailloyau, juxte les hoirs feu Symon Le Blanc d’une, part et messire Guillaume de Vaucenin, prebstre, d’autre part, l’autre piece contenant demy quartier ou environ, assise audit cloux de Chailloyau, juxte Robin Trascaille d’une part, et la femme Aubin Virle d’autre part. Bail et prinse faiz pour [f° 58, v°] quarante solz tournois de ferme etc, a payer par chacun an au terme sainct Remy, premier payement a la sainct Remy prouchaine venant, et ainsy etc. Et sera tenu ledit preneur de labourer, cultiver, fumer et encharneller bien et convenablement lesdites vignes en saisons convenables, et en la fin dudit temps les rendre encharnellees et en bon et souffisant estat et valeur, comme vignes moisonnieres. Promectant et garantissant. Obligeant, renoncant etc. Presens a ce pour tesmoings Robin Trascaille et Jehan Trascaille, freres, demourans audit lieu de Luysant .
