Lettre de Louis de Bourbon, duc de Montpensier, aux maire et échevins de Tours 
leur reprochant la gestion d'une émeute qui a conduit à un incendie provoquant la mort de plusieurs personnes catholiques, notamment celle du capitaine Saint-Martin. Il ordonne également que les coupables soient recherchés et poursuivis en justice et que le corps de ville s'en remettre à Claude de La Chastre.
Messieurs, encores que j’aye esté des derniers adverty de la follye survenue en vostre ville, ce a neantmoings esté assez a temps pour en estre tres marry et y congnoistre plus de vostre mauvais debvoir que je ne vouldroys ; car, si du commancement vous eussiez eu recours à monsieur de la Chastre(1) pour retrancher la matiere de telle esmotion, le feu ne se feust pas allumé au dommaige des pauvres personnes catholicques qui y sont morts. Je plainctz, entre aultres, infiniment le cappitaine Saint Martin et suys seur que le Roy en sera tres mal content. Cela vous doibt rendre plus songneux d’aider la recherche des coupables de si grande malheureté et a tenir la main, aultant qu’il vous sera commandé par ledit sieur de la Chastre, qu’ils soyent prins et baillez a justice, afin que la punition en soyt faicte et serve d’exemple a leur semblable. Au demeurant, si le mal continuoit et que la presence de mon filz feust necessaire par dela, il ne fauldra, en estant adverty, de si acheminer incontinant; toutesfoys, j’espere que la discretion et auctorité dudit sieur de la Chastre suffiront a cela et a paciffier la querelle du cappitaine Gast et sieur de Vallemer, dont je luy escriptz, a ceste fin, et prie Dieu, Messieurs, vous faire aussi saiges, bons et obeissans subjectz de sa majesté que le desire.
Voustre bien bon amy,
[Signé] Loys De Bourbon.
De Champigny, ce XXIIe jour de juillet 1568.
[Suscription] A Messieurs les maire et eschevins de la ville de Tours .
Notes :
(1) Claude de La Chastre, nommé par lettres patentes du 14 avril 1568, comme lieutenant du « pays et duché de Touraine , bailliages de Bloys et Amboise , villes de Loches , Chastillon , Buzansees , Lodun el pays de Lodunois » (Boulay de La Meurhe, Histoire des guerres de religion à Loches et en Touraine, Mémoire de la Société archéologique de Touraine, t. XLV, 1906, p. 78.
