Lettre de Catherine de Médicis adressée aux maire et échevins de Tours ordonnant que justice soit faite suite à une sédition servenue en ville.



Messieurs, nous avons entendu ce qui est advenu en la ville de Tours par l’insolence et temerité d’aucuns des habitans d’icelle et comme ils se sont tant oubliés que d’avoir attenté en la personne du lieutenant general du Roy, monsieur mon filz, et tué le cappitaine Sainct Martin et faict grand effort de faire le semblable de tous les soldats ordonnez en ladite ville pour le salut et deffence des habitants d’icelle, qui sont choses de si pernicieuse consequence qu’il est necessaire, pour oster la cause a toutes personnes et la hardiesse d’entreprendre chose si malheureuse, d’en faire tres griefve et exemplaire punition. Et, d’autant que c’est chose dont le Roy, monsieur mon filz, et nous avons receu très grand deplaisir et malcontentement, et que nous voulons justice en estre faicte, vous ne faudres, suivant ce qu’il vous escript, de mectre, incontinant la presente receue, les principaulx autheurs de ladite sedition, ensemble les fauteurs et adherans, es mains dudit sieur de la Chastre pour leur estre faict et parfaict leur proces par les juges qui luy ont esté ordonnez prendre pour cest effect, sur peyne, ou vous feries difficulté d’y obeir, de s’en prendre a voz propres personnes et au corps de ladite ville, comme vous entendrez plus au long par ledit sieur de la Chastre; priant dieu, Messieurs, vous tenir en sa saincte garde. Escript au chasteau de Bouloigne, le XXIIIe juillet 1568 (1).
[Signé] Caterine
[Signé] Fizes

[Suscription] A Messieurs les maire, eschevins, manans et habitans de la ville de Tours .





Notes :

(1) Lettre identique, à quelques mots près, à celle de Henri datée du même jour.



text encoding initiativePowered by XTF
Centre d'Études Supérieures de la Renaissance
Cette œuvre est mise à disposition selon les termes de la Licence
Si vous utilisez ce document dans un cadre de recherche, merci de citer cette URL :
http://renumar.univ-tours.fr/xtf/view?docId=tei/TIPO634157.xml&doc.view=print;chunk.id=n1
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0).
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0)