Lettre de Henri IV adressée aux maire et échevins de Tours 
pour les remercier de leur soutien.
Chers et bien amez, on nous a bien clairement faict entendre le bon devoir duquel vous avez usé a la conservation de nostre ville de Tours en nostre obeissance, ayans esté les artifices de noz ennemis rendus infructueux et inulilles par vostre soing et diligence dont nous avons receu beaucoup de contentement, lequel nous vous avons bien voulu tesmoigner par la presente et vous convier a la continuation, aultant qu’il vous sera possible, resistans ausdits artifices qui ne tendent qu’a la ruine du pauvre peuple et subversion entiere de cest estat, comme vous avez desia tres bien commencé, vous asseurant que nous aurons souvenance de voz services pour vous gratiffier tous, tant en general qu’en particulier, aux occasions qui s’en offriront, avec aultant de bonne volonté que nous prions Dieu qu’il vous ayt, chers et bien amez, en sa sainte et digne garde. Au camp du Pont-Saint-Pierre, le XXIIIe jour d’aoust 1589.
[Signé] Henry
[Signé] Ruzé
[Suscription] A noz chers et bien amez les maire et eschevins de nostre ville de Tours .
[Au dos] Lettre du Roy, du XXIIIe aoust 1589, leue en l’hostel de ville, le XXXe dudit moys et an.
