Messieurs, je ne doubte poinct que le baron de La Chatre, s’estant aproché si pres de vous, n’ayt un dessein sur quelques unes de nos petites villottes, et avoict couru un bruict que Bleré 
estoict prins. Vous aves fort bien faict d’y avoir envoyé la moictyé de la compagnie du sieur de La Vallade et d’advertir toutes les autres petites villes qu’elles se tienent sur leurs gardes. N’eust esté une nouvelle qui est arrivee ce matin a sa majesté que le conte Charles avoict passé la riviere pour tascher d’entrer a Paris , il estoit resolu de me renvoyer. L’on negotie ce jourd’huy les articles de la treve; si elles se concluent, je ne croy pas la faire longue icy apres avoir le cours de vos affaires. Ce pendant je vous diray que ce jourd’huy le roy a esté a la messe, ayant protesté de vivre et mourir en la religion catholique, apostolique et romaine, au grand contentement tant de ceux de Paris , qui s’y sont trouvés au nombre de plus de mille, que de ses autres bons serviteurs; de sorte que chacun espère que cest effect produira beaucoup d’advancement au bien de ses affaires. Je suis tres aise du bon acheminement que faictes en nostre fortification ; je mettre peine d’obtenir ce que vous demandes pour la perfection d’icelle; ce pendant je vous supplie de me tenir adverty de tout ce qui se passera, vous baisant humblement les mains, et supplie le createur, Messieurs, vous donner bonne et heureuse vie. A Sainct Denis , ce XXVe juillet 1593.
J’avois oublié de vous dire comme chacun gouverneur advertist de faire le feu de joye et chanter le Te Deum laudamus ; je suis d’advis que vous facies le semblable avecq la plus grande demonstration de joye que vous pourez.
Vostre plus affectionné a vous servir.
[Signé] Souvré
[Suscription] Messieurs, Messieurs les maire et eschevins de la ville de Tours , a Tours .
