Enregistrement dans un registre de délibérations de lettres de Charles VIII aux maire et échevins de Tours 
au sujet du différend qui existe au sein du couvent des Cordeliers de la ville avec les frères de l'Observance et qui demandent d'exclure les frères frères de l'Observance.
De par le roy.
Coppie
Chers et bien amez, nous avons esté advertiz de la violence et desordonnee execucion que a esté faicte contre les pouvres freres de l'Observance que tousjours avons eu et avons en recommandacion comme vous savez, car par plusieurs foiz vous en avons escript dont n'avez pas tenu grant compte. Toutesvoyes, aucuns de notre ville de Tours nous ont fait remonstrer les causes de votre excusacion, nous avons fait mectre ceste deliberation matiere en deliberacion par notables clercs et grans personnaiges en la presence de nous et de plusieurs seigneurs de notre sang et lignaige par l'advis, deliberacion et conseil desquelz avons ordonné provision pour gecter et mectre hors du couvent tous les freres tant de l'Observance que conventuelz, jusques a ce que autrement en soit ordonné. Si vous mandons et expressement enjoignons une foiz pour toutes que ladite provision soit promptement executee et y donner telle aide et faveur que a ceste foiz congnoissons le bon vouloir que avez de nous obeir et en maniere que l'auctorité nous en demeure mais gardez bien sur tant que doubtez mesprandre envers nous que en ce n'ait faulte, toutes excusacions cessans car tel est notre plaisir. Donné a Meaulx , le XXIIe jour de may. Ainsi signé Charles et Charbonnier. Et dessus, A noz chiers et bien aimez les maire, eschevins, bourgeois, manans et habitans de notre ville de Tours .
Publiees en l’hotel de la ville par monseigneur l’eslu, René Sireau, le XXVIe jour de may l’an mil IIIIc IIIIxx et quatre, l’original desquelles es mains de monseigneur le maire Martin d’Argouges(1).
Notes :
(1) Lettre intégrée après la délibération du 26 mai 1484.
