Marché passé entre Adam de Longuemort, sieur de La Goguerie (Saint-Pierre-le-Puellier, Tours 
), et Macé Boutegourd, maître couvreur, pour la réalisation de travaux de réparation des toitures de la seigneurie de La Goguerie.
Le vingt cinqisme jour de janvier l'an mil cinq cens quatre vingtz huict, en la court du roy nostre sire a Tours , par devant Charles Bertrand, notaire royal en icelle, furent present en leurs personnes establyz et deuement soubzmiz au pouvoir et juridiction de ladite court noble homme Adam de Longuemort, sieur de La Goguerye, demeurant audit Tours , paroisse de Saint Saturnin Pierre Puellier, d'une part et Macé Boutegourd, maitre couvreur audit Tours de ladite paroisse, d'autre part. Lesquelz ont confessé avoyr faict et font entr'eulx les marché de repar(ati)ons de couverture promesses et obligations comme s'en suyt, c'est assavoyr que ledit Boutegourd a entrepris promys promect doibt et sera tenu de faire les besongnes de couverture necessaires estre faicts ès deux granges, corps de logys, estables, tectz a bestes, collombier et autres endroitz dudit lieu et apartenances de La Goguerye, pour lesquelles besongnes et reparations de couverture faire ledit Boutegourd fournira sur le lieu a ses despens jusques au montant et quantité de huict milliers d'ardoyse g de la grosse rousse noyre, plus de quatres milliers de latte loyalle et marchande / vingt toyses de chanlatte trente milliers de cloux tant à ardoyse que a latte troys cens de gros clou pour loyalx et chanlatte ung [1v°] cent de faisceaulx qui seront employez tant sur le grand logys que granges et autres lieux et endroictz ou besoing sera dudit lieu, trois poincons de sable et ung poincon de chaulx et où il se trouveroyt que lesdites matieres cy dessus et choses ne feussent a suffire pour faire et parfaire lesdites besognes de couverture et reparations d'icelles ledit Boutegourd en fournira du surplus a ses despens sans qu'il puisse oster ne transporter aulcune chose d'ediffice sy aulcun y a et lesquelles matieres cy dessus ledit Boutegourd a promys et sera tenu employer a faire lasdites besognes et reparations de couvertures esdits endroictz cy dessus declarez et chacun d'iceulx et icellesdites besognes et reparations de couvertures cy dessus rendra bons et deuement faites et parfaictes de sondit estat et subiect a veste[] dedans la my may prochain venant et ce pour et moyennant le pris et somme de soixante quatre escuz et demy sol. payable par ledit sieur de La Goguerye audit Boutegourd en besognant payant et en fin desdites besognes fin dudit payement et a ce tenyr etc. se sont lesdites partyes obligees et obligent corps et biens etc. respectivement etc. ren. etc. prom. etc. foy etc. jugez etc. faict et passé audit Tours en la maison dudit sieur de La Goguerye apres midy ès presence de noble homme Gillebert Rousseau, sieur de Juscot, André Bedouet, marchand audit Tours et Estienne Moussard, charpentier demeurant paroisse de [2r°] Saint-Cyre tesmoins au requis et ont declaré lesdits Boutegourd et Moussard ne scavoyr signer sur ce enquis constat en interligne et de marge qui seront employez tant sur le grand logys que granges et autres lieux et endroictz où besoing sera dudit lieu que approuvent.
[Signé] De Longuemort, Bedouet, Rousseau, Bertrand.
