1580, 12 mars 1583, 2 mars 1589, 7 octobre — Tours

[Transcription partielle :] personellement establyz et deuement soubzmis nobles hommes Georges Legantyer, escuyer, sieur de La Borde et du Challen, demourant audit lieu du Challon, paroisse des Hermittes , tant en son nom que pour et au nom de damoiselle Jehanne Tesnyere, sa femme, de laquelle il s'est faict fort et a laquelle il a promis et sera tenu faire ratiffier et avoir pour agreable le contenu en ces presentes, et a ce garantaige des heritaiges cy apres venduz (...) en fournyr de ratiffication et obligation vallable a l'achapteur cy apres nommé, en sa maison audit Tours , dehs le jour et feste de Pasques prochain venant a peine etc., et pour ce faire l'a desapresent auctorisé et auctorise, et noble homme maitre Charles Bouet, sieur de La Noue, conseiller de mondit seigneur et maitre ordinaire en sa chambre des comptes audit Tours , soubzmectans etc. lesquelz (...) ont congneu et confessé avoir vendu (...) perpetuellement par heritaige a noble homme Gatien Marbault, conseiller et secretaire des roy et royne de Navere , a ce present et achaptant agré pour luy, ses hoirs etc. C'est assavoir ledit lieu, terre et seigneurye du Chaillon, en ladite paroisse des Hermittes , consistant en la maison seigneurial dudit lieu, jardrins, vignes, pré clostures, ousches, cheveuraulx, fuye, garenne, terres labourables, prez, vignes, boys, taillys et de haulte festaye, estang, moullin, mestairyes, fief, justice, cens, rentes, hommes, hommaiges, subiectz et vassaulx, droicts et apartenances, quelconques deppendances de ladite terre et seigneurye tenue a foy et hommaige du roy de Navere a cause de son chastel de Laverdin . Plus vende iceulx vendeurs et chacun d'eulx sollidairement comme dessus audit achapteur ledit lieu et mestairye de La Borde, ses apartenances et deppendances, situé en la paroisse de Chastillon pres La Chartre sur le Loir , consistant en maisons, grange, tetz a bestes, vergers, ousches, cheveraulx, terres labourables, prez et pastureaulx (...) que lesdits Legautyer et sa femme en jouissent du jourd'huy et sans aulcune chose en excepter (...), icelluy lieu de La Borde estant ou fief du sieur de La Vallee, fors les prez dudit lieu qui sont ou fief de la dame contesse de Sansere (...) de revenu annuel de la somme de trente troys escus ung tiers et plus (...) pour le pris et somme de quatre cens escuz (...) o grace retenue (...) troys ans (...) en la maison dudit acquereur (...). Et pour cest effect a esleu son domicille en ceste ville de Tours , en la maison de Laurens Nozieulx, maitre armurier demourant en la paroisse de Saint Pierre de Boille dudit Tours , (...). Faict audit Tours , ès presences de Legrier Pesson, marchant demourant en la paroisse de Trehet , pres La Chartre sur le Loir , et René Ganay, clerc dudit Tours , tesmoings.
[Signé] LeGantier, Marbault, Liger Pellon, Bouet, Digoys, Ganay pour present.
[Le 12 mars 1580] ledit Marbault baille a tiltre de ferme ausdits Legantyer et Bouet ledit lieu, fief, terre et seigneurye de Chaillon et ledit lieu et mestairye de La Borde durant le temps de troys annees, la somme de trente troys escuz ung tiers par les quatre quartiers de chacune desdites annees, aux douzeiesme jours des moys de juing, septembre, decembre et mars, rendu en la maison dudit acquereur, et pour le paiement et en[...] de ces presentes a ledit Legantyer faict pareille et semblable prorogation de juridicion et eslection de domicille audit Tours en la maison dudit Noaieulx, armuzier, selon et ainsi qu'il est (...) et conteu par ledit contract de vendaison cy dessus. Faict audit Tours , ès presences desdits Legier Pesson et René Ganay, tesmoings desnommez audit contract.
[Signé] LeGantier, Bouet, Marbault, Liget Pesson, Ganay pour present, Digoys.
[Le 2 mars 1583] ledit Marbault, acquereur cy dessus nommé, a prolongé ausdits Legautier, sieur de La Borde, et Bouet, sieur de La Noue, la grace et faculté de rachapter les lieulx, terres et seigneuryes de La Borde et du Challon par troys ans, pour en payer par chacune desdites annees la somme de trente troys escuz ung tiers. Faict audit Tours , en la maison de nous, notaire, a la mattinee de ce jour, ès presences de Guillaume Normendeau et Jehan Bothereau, clercs demourans audit Tours , tesmoings.
[Signé] LeGantier, Bouet, Marbault, Digoys, Bothereau pour present, G. Normendeau pour present.
[Le 7 octobre 1589] damoiselle Ysabeau Fallaiseau, veufve de deffunct noble homme Gatien Marbault, tant en son nom que comme tutrice des enfans d'elle et dudut deffunct, a confessé avoir receu acomtant de maitre Gatien Duperray, sieur des Brazillerye, (...) des le dernier jour d'aoust dernyer la somme de quatre cens escuz sol. pour la resolution du contract cy dessus, laquelle somme ledict sieur du Perray ce present a dict payer pour et en l'acquect de Georges Le Gantyer, escuier, sieur de La Borde, selon le contract faict avec luy, Duperray et ledict Legantyer pour raison de la vendition quilz a faicte du lieu du Chaillon, ensemble a ledit Duperray payé a ladite damoiselle presentement (...). Faict audit Tours , en la maison de ladite veufve avant midy dudit jour, ès presences de noble homme maitre Simon de La Roche conseiller du roy et esleu en l'election de Tours , maitre Jehan Digoys, procureur au siege presidial de Tours , et Pierre Maillé, clerc, tesmoings, ladite somme de huict escuz quarante cinq sols payé en escuz et le reste monnaye.
[Signé] Delaroche, Ysabeau Falaiseau, Maillé, Digoys, Normandeau.