1580, 13 décembre — Tours

[Transcription partielle :] noble homme Jehan Le Royer, sieur de Panchian, conseiller et secretaire des roy et royne de Navere , demourant en ceste ville de Tours , parroisse Sainct Venant, lequel a faict nommé (...) sa procuratrice generalle et specialle honorable femme Marye Le Royer, sa seur, a presant femme de honorable homme Jehan Mahondeau, marchant demourant audict Tours , a laquelle (...) ledit sieur constituant a donné et donne par ces presentes plain pouvoir, puissances, auctorité et mandemant special de pour et en son nom vendre (...) a perpetuité. C'est assavoir les vignes de chateau Rousset (...) contenant quatre quartiers de vigne ou environ assises en la paroisse de Fontainer Guerin , joignant d'une part aux vignes qui furent a Denis Lepelletyer, d'aultre part a la terre qui fut a René Passineau. Plus trois quartiers de vigne ou environ (...) que deffuncte Catherine Mignon, ayeulle dudit constituant en jouissoit, sises aus Luardieres ou fief des Montenses, joignant des deux costez aux vignes de la veufve et hoirs feu Pierre Gervais, abattant d'ung bout a la fosse tendant de la fosse Moreau a La Belluniere, d'aultre bout a la vigne feu Estienne Jolis et aux apartenances de feu René Bedasne. Plus une piece de terre contenant ung arpent ou environ assise pres Avrilly en la pairoisse de Saint Pierre du Lac, joignant d'ung costé a la terre des hoirs feu maitre Francois Dupuy, d'aultre costé a la terre des hoirs feu maitre Nicollas Courtin, d'ung bout a la terre des hoirs feu Jehan Migon et qui sont de present a Jacques Convueau^(a) [1v°] [...]^(b), et ainsi que touttes lesdites choses cy dessus se poursuivent et comportent et que ledit constituant ou ses fermiers et ses predecesseurs ont accoustumé d'en jouir et qu'ilz sont escheuz et advenuez audict constituant a cause des successions de feuz Yvonne Phelippeau, sa mere, et Denis Le Royer, son frere, et pareillement de ladite deffuncte Catherine Migon, son ayeulle, par reputation de ladite deffuncte Phelippeau, sa mere, fille et heritiere pour une quarte partie de ladite deffuncte Migon, et selon que icelles choses sont a plain disiquers^(c), par joignans et confrontations par les partaiges faictz entre ledit constituant et ladite Marye Le Royer, sa soeur, des biens immeubles a luy escheuz a cause desdites successions, icelluy partaige passé pardavant Perdriau, notaire royal audit Tours , le neufiesme jour de juillet mil VC soixante et onze, et icelles vendaison faire par ung ou divers contractz a telle personne ou personnes, et pour tel pris et somme de deniers que sadite soeur, procuratrice, verra bon estre aux charges des debvoirs seigneurialx et feodaulx et rentes antiennes^(d) et accoustumees estre payes, et que se trouveront estre et a ce pour raison desdites choses aux sieurs^(e) jours, lieulx et termes acoustumez des recepveoir le pris de ladite vendaison ou venditions de l'acquereur ou acquereurs desdites choses, et en bailler acquict et quictances vallable deue ou plusieurs a iceulx acquereurs ou acquereur, et en passer consentir et accorder tel contract ou contractz que besoing sera ou encores appariendra declarant ledit constituant comme il (...) [2r°] (...) l'acquest que sera par luy faict desdits deniers soient consez^(f) et reputez son propre et de pareille nature que sont lesdites choses cy dessus, sans que lesdits deniers entrent aucunement en la comunaulté d'entre luy et damoiselle Marguerite Brodeau, sa femme, suivant convention portee par leur contract de mariage (...). Faict audict Tours , en la maison de nous, notaire, a l'heure de une heure apres midy, ès presences de René Ganay et Jehan Aumont, clercs demourans audit Tours , tesmoings.
[Signé] LeRoyer, Aumont pour present, Ganay pour presant, Digoys.

a. Transcription incertaine. — b. Passage barré. — c. Terme incertain. — d. Terme incertain. — e. Terme incertain. — f. Terme incertain.