Sommation de payer 2803 écus 1 tiers pour la pension de la reine de Navarre , faite par Jean Sance, marchand pourvoyeur de la maison de la reine de Navarre , demeurant à Paris (rue de La Martellerie, paroisse de Saint-Gervais), à Alexandre Servient, commis de Claude Feret, conseiller du roi et receveur général de ses finances à Tours . Ce dernier refuse à cause de la dépense déjà faite sur cette somme des rénovations au château d'Angers .



Aujourd’huy douzeme jour de may l’an mil VC quatre vingtz six, en la presence de moy, notaire royal a Tours soubzigné, et des tesmoings cy apres nommez, honorable homme Jehan Sance, marchant pourvoyeur en la maison de la royne de Navarre , seur unicque du roy, demourant a Paris , rue de La Martellerye, paroisse de Saint Gervais, s'est transporté au bureau de la recepte generalle des finances audit Tours au domicille de noble homme maitre Claude Feret, conseiller du roy et recepveur general de ses finances audit Tours , ou estant et en parlant a maitre Allexandre Servient, son commis, ledit Sance l'a pryé, requis, sommé et interpellé de luy payer, bailler et fournir compant la somme de deux mil quatre vingtz troys escuz ung tiers pour la pention de ladite dame royne de Navarre, a elle deue et dont elle est assignee [1v°] sur ladite recepte generalle, et ce pour et durant le quartier d'octobre, novembre et decembre mil VC quatre vingtz cinq dernier passé, offrant en faisant ledit payement, fournyr et delivrer presentement audit Servyent, oudit nom, le blanc en parchemyn, signé Charpentier, conseiller tresorier et recepveur general de ladite dame royne, pour luy servir de quictance de ladite somme, protestant par ledit Sance que en deffault dudit payement de tous ses despens, dommages et interestz et du sejour qu'il faict en ceste ville, en laquelle il est venu expres pour ceste occasion, et retardement du service de ladite dame royne #(a), dont audit Sance ce requierant avons octroyé le present acte pour luy servir et valloyr ce que de raison. Faict en ladite recepte generalle, avant midy, ès presences de René Bertrand et Jacob Boullay, clercs, tesmoings.
[2r°] #(b) Lequel Servyent a faict response ne pouvoir sertiffier au contenu de la presente sommation, d'aultant que le payement de ladite somme a esté surciz par ordonnance de messieurs du conseil jusques a la fin du present quartier d’apvril et de celuy de juillet prochain, auquel temps doibt estre remplacé la somme de VI M [écus] cy devant prinse ès deniers de ladite recepte generalle pour subvenir aux fraiz et despenses qu'il a convenu faire a la reprinse du chateau d'Angiers l'annee derniere qui sera composé sur les h[...] des [...] par dudit Angiers s[...], Chateau Gontier et Baugé , ladite ordonnance en dacte du XXIIIIme mars dernier, signé Guybert, dont il n'eust aparu et que ledit temps venu ledit sieur receveur general fera toutes dilligences pour le recouvrement de ladite somme et acquict de celle demandee par ledit Sance.
[Signé] Servyent, J. Sance, Bertrand.





Notes :

a. Signe de renvoi inscrit par une seconde main. — b. Le folio 2r° a été entièrement écrit par une seconde main et commence par le deuxième signe de renvoi.



text encoding initiativePowered by XTF
Centre d'Études Supérieures de la Renaissance
Cette œuvre est mise à disposition selon les termes de la Licence
Si vous utilisez ce document dans un cadre de recherche, merci de citer cette URL :
http://renumar.univ-tours.fr/xtf/view?docId=tei/TIPO639365.xml&doc.view=print;chunk.id=n1
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0).
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0)