Délibérations des représentants de la communauté des habitants de Tours 
sous la direction du procureur du roi au baillage de Touraine, relatives à l'accueil de Marie d'Anjou et son fils Charles, les représentants hésitent sur la nature du don (une nef ou des pièces de vaiselles), décident de faire un dais blanc et rouge, de tendre les rues, de faire des échaffauds, et de porter les clefs de la ville au roi (si il vient), et renvoient au prochain conseil un certain nombre de point notamment celui relatif au nombre de personnes qui doivent se trouver en livrée.
[f° 343 r°]
Le XXIIIme jour de septembre, l'an mil IIIIc LXI, en l'ostel de la ville, en la presence de honnorable homme maistre René Dreux, procureur du roy nostresire ou bailliage de Touraine, se sont assemblez :
Les deux esleuz de ladicte ville de Tours ;
maistre Pierre Le Roy, vicaire de tres reverend Pere en Dieu monseigneur de Tours, et soy representant pour ledit tres reverend ;
Ledit maistre Pierre Le Roy et maistre Jehan Panin, chanoines de l’eglise de Tours, et eulx representans pour chapictre de ladicte eglise ;
maistre André Dubeuf et messire Lois Le Roy, chanoines de l’eglise de Saint-Martin de Tours, et eulx representans pour chapictre de ladicte eglise ;
Pierre Brete, Jehan Ruzé, maistres Jehan Dupuiz, Jehan Bonnart, Jehan Bernard et Berthelemi Baudet, Piret Castellain, Jehan Garnier, Gilbert Jehan, Martin De Argouges, Jehan Belin .
Pour dire leurs opinions et deliberer sur les choses qui s'ensuivent.
Et premierement, sur le fait du don qu'il fault faire a la royne, qui derrenierement fut mis en deliberacion, et non pas au roy, soit avisé se lui sera fait don de une nef ou I XIIne de tasses belles, de chacune III marcs d'argent, II grans potz de chacun VI marcs et II beaux bassins de chacun VI marcs, deux dragouers de chacun (blanc).
Item, pour le poesle, savoir se on le fera bleu et les franges blanc et roge, et aux quatre coings s'il y aura IIII anges qui porteront l'escuson du roy, et aussi se il aura IIII chafaulx pour les misteres que on vieult faire, se on tendra les rues, combien de gens a aler au devant du roy porter les clefz en la compeignie de monseigneur de Tours, s'il y aura point de gens de livree ou au moins ceulx qui porteront le poesle, ou aura VIII personnes des plus notables et les IIII clercs de la ville, s'ilz auront chacun II aulnes et demie de drap pour faire robe de livree, aussi a autres gens pour estre a garder la presse du devant du roy et des rues foraines, et le tout s'il sera aux despens de ladicte ville.
Sur quoy a esté deliberé que ledit Gilbert a ce present advisera et parlera a ses serviteurs savoir s'ilz pouront a temps que la royne viendra en ladicte ville faire ladicte nef, ou s'ilz ne pevent, aportera par declaracion le nombre de la plus belle vesselle qui poura en lieu de ce estre a elle donnee et presentee.
Item, pour le seurplus du fait dessusdit pour ladicte entree sera aporté a vendredi a rassemblee la declaracion de tout le fait par escript, et combien tout coustera, et par escript le nombre des gens pour aler au devant et a porter ledit poesle, et a l'autre assemblee en sera sur tout ce deliberé.
