Délibérations des représentants de la communauté des habitants de Tours 
, dans lesquelles sont décidées qu'il pourra être donné jusqu'a 200 livres pour aider à l'installation dans la ville de drapiers avec leur métier, alors que deux artisans d'Angers et Montoire propsent de s'installer et de faire venir en ville jusqu'à 50 personnes pour travailler à ladite draperie.
[f° 353 v°]
Le XXIIIe jour de may, l'an mil IIIIc LXII, en la galerie de monseigneur saint Martin de Tours, en la presence de honnorables hommes Jehan Briçonnet l'aisné et Jehan Gaudin, esleuz de la ville de Tours, se sont assemblez :
Jamet Chambellan, Gillet de Brion, Jaquet Sergent, maistre Guillaume Toreau, Pierre Quetier l'aisné, Geuffroy Travers, Piret Castellain, Jehan Galocheau, Julien Beauvarlet, Pierre Le Masle, Martin Marquet, Jehan Tremahain, maistre Jehan Saintier, maistre François Bernard.
Sur ce que a esté mis en deliberacion que vray est que ung nommé Gervaise Pineau, drapier d'Angiers , et ung tixerant en draps, et aussi ung nommé Yvonnet Macé, drapier, demeurant a Montrore , se sont tirez par devers lesdiz esleuz et ont dit et remonstré que qui leur vouldra aider et donner aucune petite somme de deniers tant a amener leurs femmes, biens meubles, marchandises et les deppendences de leur mestier, ilz viendront demourer en cestedicte ville pour user et besoigner oudit mestier de draperie, et en especial ledit Pineau qui a fait dire a ladicte ville que, qui luy vouldra donner une fois la somme de cent escuz, qu'il amenera quant et lui XL ou L personnes tous soubz lui besoignans oudit mestier a venir demourer en cestedicte ville, pour ce que il leur fauldra aider a leur amener leurs biens et mesnages.
Sur quoy a esté deliberé que pour recompenser ceulx du mestier de draperie qui viendront d'autrui païs demourer en icelle ville, il soit donné et distribué jusques a la somme de deux cens livres et au desoubz, et en soit prins ou eulx le meilleur marché que marché que faire se poura, et d'icelle somme soit baillé audit Gervaise Pineau jusques a C livres tournois, en faisant et acomplissant ce que dit est.
