Accord passé entre Jacques Delalende, d’une part, les chanoines du Plessis-lès-Tours, représentés par maitres Loys Heau et Denys Deguignez, d'autre part.



[En-tête :] du IIme sepembre mil Vc IIIIxx III
Comme ainsi soit que Marthe Colesse, veufve de feu Jehan Huger, ayt par son testament et ordonnance de derniere vounté entre autres choses donné et legué a venerables personne maitre Jacques Delalende, chanoyne en l’eglise colegialle et chapelle royal monsieur Saint-Jehan-L’Evengeliste du Plessis du parc lez Tours sa maison jardrin et apartenances et en laquelle elle faisoit lors sa demeure monnant de son acquest joignant d’un long a la maison et jardrin dependant du chappitre de ladite eglise ou demeure encores de present venerable personne maitre Loys Heau, aussi chanoyne de ladite eglise d’autre long et d’un bout ala maison et jardrin de André Bourdon, lavandier de madame la princesse de Navarre et d’autre bout par le devant aux pavez tendant dudit Plessis au pont Saincte-Anne ou fief dudit Plessis chargee de quinze sols de rente a la charge que ledit Delalende seroit tenu de payer et aquiter ladite rente par chacun an au jour de noel tant et se longuemant qu’il seroit detenteur de ladite maison et oultre de faire dire et celebrer sa vye durant en ladite eglise du Plessis vigilles et une messe haulte de requian par chacun an a tel jour qu’elle decedderoit / pour d’icelle maison et jardrin joyt par ledit Delalende apres le deces d’icelle veufve sa vye durant seull. et apres le deces dudit Delalende ladite maison [...]stre et apartenir en don perpetuel audit de chappitre aux charges susdit ainsi que le tout est plus a plain mentionné et speciffié par l’article de ce faisant mention par ledit testament receu et passé par devant nous le notaire soubz signé le vingt et ungme jour de febvrier mil Vc soixante et seze insignné et enregistré au greffe royal de ce bailliage par acte du vingtdeuxme mars oudit an signé Bourru signé Bourru, depuis lequel testament et pris le dixneufme jour de juillet dernier passé […]ant ladite Marthe allé de vye a trepas se seroit peu de temps [1v°] apres ledit Delalende transporté pardevers mesdits sieurs de chappitre auquel il auroit fait entendre ledit testament et don et laigs cy dessus et icelluy communiqué suppliant ledit chappitre par icellui voulloir accepter aux charges cy contenues lesqu a quoy ils me lesdits de chappitre n’auroient voullu enfondre disant que synon que pour le regard dudit service de vigilles et messe haulte de requyan Et non a la charge de l’intention de l’ame de ladite deffuncte et non a la charge de pareil service de vigilles et messe haulte a l’intention dudit Delalende apres son deces ainsi qu’il est porté par l’article dudit testament de ce faisant mention comme dessus est dit Et surquoy ce jourd’huy vendredy deuxme jour de septembre l’an mil Vc quatre vingts et trois en la court du roy nostre sire et de monseigneur a Tours par devant nous Jehan Foucher, notaire royal audit Tours , furent presens en leurs personnes establiz et deuement soubzmis ledit maitre Jacques Delalende d’une part et lesdits de chappitre du Plessis ces personnes de venerables personnes maitres Loys Heau et Denys Deguignez chanoynes de ladite eglise commissaires dudit chappitre quant ad ce comme est aparu par acte dudit chappitre en datte du cinqme jour d’aoust dernier passé de ce jourd’huy signé par chappitre marche d’autre part lesquelles parties de ce que dessus circonstances et dependances ont transigé et acordé ainsi et en la forme et maniere qui s’ensuit. C’est assavoir que ledit Delalende pour aucunes bonnes et justes causes ad ce le monnans et que ainsi luyu a pleu et plait sans aucune sedu.on ne persuation pour le regard de ce qui luy conserne du don et lege contenue oudit article de testament a renoncé et renonce a l’ususfruict de ladite maison jardrin et apartenances ainsi a luy donnee par ladite Marthe au proffit dudit chappitre veult et consent que de ce jourd’huy [2r°] ledit chappitre en joysse pregne et parcoure les fruicts revenuz et loyers et emolumens des le jour du deces de ladite Marthe a la charge que a l’advenir par chacun an ledit chappitre sera tenu dire et celebrer ung anniversaire seullemant pour l’ame de ladite deffunct Marthe au jour qu’elle est deceddee si possible est sinon a autre prochain jour commode et de descharger ladite maison de ladite rente de quinze solz ce que lesdits de chappitre es personnes des susdits commissaires ont acepté et promis faire ledit service audit jour de Noel par chacun an a parpetuité et deschargee ladite maison de ladite rente de quinze solz faisant partie de vingt solz dont l’outre plus que est cinq solz avec le censif est deu par ledit André Bourdon, lavandier susdits a cause de sa maison et apartenances estant pres et joignant celle cy dessus le tout en presens en asistances dudit maitre Loys Heau et de maitre René du Verger, executeurs du testament de ladite deffuncte et de leur consentement et sans prejudice toutesfoys audit Delalende es autres choses a luy donnees et leguees par ladite Marthe tant par ledit testament que autrement et quant a tout etc. obligent lesdites parties respectivemant l’une a l’autre eulx leurs successeurs et biens presens et advenir et encores lesdits commissaires en vertu dudit acte tous et chacuns les biens et revenu temporel dudit chappitre presens et advenir requierans etc. fid. etc. fait audit Tours au tablier dudit notaire heure de deux heures avant midy apres midy es presences de Jacques Launay, Anthoine Choffier, Jehan Frenion et René Ballan, clercs demeurans audit Tours , tesmoins. Constat en gloze ses mots du cinqme jour d’aoust dernier passé avec le censif / que appert.
[Signé :] Delalende, L. Heau, Duverger, Deguigne, Choffier, J. Launay pour present, J. Frenion, Ballan, Foucher.





text encoding initiativePowered by XTF
Centre d'Études Supérieures de la Renaissance
Cette œuvre est mise à disposition selon les termes de la Licence
Si vous utilisez ce document dans un cadre de recherche, merci de citer cette URL :
http://renumar.univ-tours.fr/xtf/view?docId=tei/TIPO639961.xml&doc.view=print;chunk.id=n1
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0).
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0)