Tours : 1512 (n. s.), 11 mars

[Acte]

[Analyse]

Marché passé par François II d’Orléans, duc de Longueville, comte de Dunois, seigneur de Boisgency, gouverneur et lieutenant général du roi en Guyenne, auprès de Jean Fauvert, peintre à Amboise, pour le rafraichissement de 14 patrons sur toile de tapisserie relatives à la destruction de la ville de Troie et pour la peinture de plusieurs autres patrons narrant les exploits de Jason, Hercule, Priam et Hector lors de la prise de la ville antique, à destination du tapissier du duc à Paris, pour 196 écus d'or soleil, en présence des témoins Adam Leclerc, bailli de Gournay, Jean Sedille, contrôleur des finances du duc de Longueville, et Noël Beluche, secrétaire de la duchesse de Longueville.

[Transcription][fol. 148] Le unziesme jour de mars l'an mil cinq cens et unze, en la court du roy nostresire a Tours, etc. Personnellement establiz hault et puissant seigneur Francoys(1), duc de Longueville, conte de Dunoys, seigneur de Boisgency(2), gouverneur et lieutenant pour le roy nostredit sire du pays de Guienne(3), d'une part, et honnorable homme Jehan Fauvert, paintre demourant en la ville d'Amboise, d'autre part. Soubzmectant, etc. Lesquelz ont congneu et confessé en ladite court avoir fait et font entreulx les marchez et obligacions qui s'ensuivent. C'est assavoir, que ledit Fauvert a promis et promect de faire pour ledit seigneur les painctures de patrons sur toille et choses cu apres declairees. C'est assavoir, paindre et rafroichir quatorze vieilles pieces de listoire de la destruction de Troye en la forme et maniere que ledit Fauvert en a fait une desdites pieces par ci-davant, et fournir aussi fournir d'escripture sur lesdites pieces, tant en latin que francoys, aussi faire au meilleu de chacune desdite spieces les armes dudit seigneur. Item, plus sera tenu et a promis ledit paintre faire pour ledit seigneur ou lieu de parfournissement et des pieces qu'il estoit tenu faire de ladite ystoire de la destruction de Troye les patrons de toutes les ystoires et choses cy-apres declairees. Premierement, la descente de Jason et Herculles au pont de Troye, la grant assemblee que feist le roy Prian [fol. 148, v°] des gens qui trouva en son pays, aussi la grant assemblee que Hector, fils dudit Prian, feist de gens estrangiers qu'il amena devers son pere, la bataille de la mort du roy Laonnedon faicte par Herculles et Jason, la reedisficacion de Troye faicte par le roy Prian qui sera faicte pour servir sur une chemynee a cinq aulnes de longueur. Oultre sera tenu icelluy paintre faire la descente des ensfans de Hector a Troye et leur recueil qu'il leur fut fait des gens du pays, ladite piece faicte pour servir sur une chemynee a quatre aulnes et demy de long. La bataille contre Drual, neveu de Anthenor, ses gens et armee desfaicte et lui prins par l'un desdits ensfans, la dite piece a cinq aulnes de long. Aussi, comme ledit Drual est pendu a ung arbre et escorché tout vif, presens lesdits ensfans ; et en ladite ystoire fault faire calcas bien vieil trouvé par lesdits ensfans sortant d'une vieille cave, ladite piece de IIII aulnes de long. Comme lesdits ensfans de Hector arment par mer donnant ung assault sur le roy Menelans, lequel s'en fuyt en emportant ses tresors, ladite piece de IIII aulnes. La bataille contre le roy d'Armenye prins par lesdits ensfans en ladite bataille puis detenu prisonnier ; et lui doit on aporter a manger de ses tresors, cinq aulnes de long(a). [fol. 149] Une autre bataille contre le roy de Georgie lequel perdit son ar armee a l'encontre desdits ensfans, ledit roy de Georgie prenant la fuicte en leur laissant le pays, V aulnes. Pareillement, fera ledit paintre ung patron de parement de chemynee ouquel sera pourtraict l'estature dudit seigneur et de ma dame son espouse au vif avec ses armes, en ensuivant le devis qui lui en sera baillé. Et sera tenu ledit paintre touchant les patrons des histoires neufves les ren en rendre au tappicier dudit seigneur en la ville de Paris, a ses propres coustz et despens, deux pieces de six sepmaines en six sepmaines. Et pour faire lesdits patrons, celluy seigneur sera tenu de faire delivrer audit paintre de toute toille qui lui fauldra pour lesidtes pieces, tant pour les pieces neufves que pour le parfournissement des XIII vieilles pieces. Ce present marché fait pour le pris et somme de cent quatre vingts seize escuz d'or soleil a present ayant cours. Laquelle somme ledit seigneur sera tenu et a promis faire payer et delivrer audit paintre de troys moys en troys moys la somme de vingt escuz d'or soleil jusques a fin de paiement. Sur laquelle somme ledit seigneur a baillé et avancé audit paintre ainsi que ledit paintre a confessé par devant nous la somme de trente escuz d'or soleil d'une part, au lieu de Boisgency, vingt cinq escuz d'or au lieu de Chasteaudun(4), par les mains de Jehan Sedille, contreleur dudit seigneur, quinze livres par les mains de feu Robert Lasnier, en son vivant tresorier d'icelluy seigneur. Et ce jourduy, la somme de XXXII escuz soleil et XXXIII s. III deniers ddont ledit paintre s'est tenu pour contant, etc. [fol. 149, v°] Et quant a ce tenir, etc., lesdits seigneurs et paintre ont obligé et obligent l'un a l'autre, etc. Renoncant, etc. Foy, etc. Et s'il est rouvé ledit paintre avoir receu dudit seigneur autre payement que ce qu'il est contenu cy-dessus, ledit paintre sera tenu et a promis de desduire sur ledit duché. Et a ce tenir, etc. Obligeant, etc. Renoncant, etc. Foy, etc. Presens noble homme Adam Le Clerc, bailly de Gournay, et Jehan Sedille, contrerolleur des finances dudit seigneur, et Noel Beluche, secretaire de madame la duchesse de Longueville, tesmoings, etc. Constat en glose jusques a fin de paiement des finances, etc.
[Signé] Foussedouaire(a) Dans l'interligne inférieur.
(1) François II d'Orléans. — (2) Beaugency, dép. du Loiret. — (3) Guyenne. — (4) Châteaudun, dép. d'Eure-et-Loir.