Vincennes : [...], 4 avril

[Acte]

[Analyse]

Lettre close de Charles VIII adressée au bailli de Tours et à son lieutenant informant de l’arrivée du sieur de Seglé, conseiller et grand maître d’hôtel de la reine, afin de mener à bien le recrutement de gens à pied.

Année non indiquée. Luzarche la situe dans les années 1480.

[Transcription]De par le roy,
Chiers et bien amez, vous savez comme puis nagueres, au moien de noz lettres de commission adrecans a nostre bailly de Touraine ou a son lieutenant, vous avez esté assemblez affin d’aviser la maniere et forme plus aisee de mectre sus aucun nombre de gens a pié pour nous fortiffier et tenir nostre royaume et noz bons et loyaulx subjectz d’icelui en paix et transquillité. En quoy vous estes bien employez et vous en scavons bon gré et, pource qu’il est besoing y donner et mectre conclusion, nous envoyons par dela nostre amé et feal conseiller et grant maistre d’ostel de nostre tres chere et tres amee compaigne la royne, le sieur de Seglé, porteur de cestes, auquel nous avons chargé vous dire et exposer nostre vouloir et entencion surce. Si vous prions et mandons que de ce qu’il vous en dira de par nous le veuillez croire et y adiouster foy, aussi nous servir en cecy et autres choses, comme tousiours avez fait et que en vous nous en avons nostre parfaicte fiance et vous nous ferez tres agreable plaisir et service, lequel ne mectrons en obly, ains le recongnoistrons, en temps et lieu, en maniere qu’on s’en deuve contenter. Donné au bois de Vincennes, le IIIIe jour d’avril.
[Signé] Charles.
[Signé] Primaudaye.

[Suscription] A nos chers et bien amez les gens des estatz du bailliage de Touraine.