Poitiers : 1420, 20 mars

[Acte]

[Analyse]

Lettre de Charles, dauphin du Viennois, futur Charles VII, adressée aux habitants de Tours pour les remercier de leur soutien face aux Anglais et leur demander de le tenir informé de l’évolution de la situation.

[Transcription]De par le Regent le royaume, delphin du Viennois.
Tres chers et bien amez, nous sçavons certainement que, de toutes vos puissances, vous avez monstre et monstrez par effect la bonne et loyale voulenté que avez a Monseigneur et a nous, a l’encontre des Anglois, noz ennemiz, dont nous vous mercions, et soyez certains que le recongnoistrons envers voz, en temps et en lieu, et vous prions tres acertes que continuez, en vous tousjours tenant en l’obeyssance de mondit seigneur et de nous et en resistant, de toute force, a l’encontre de nosdiz ennemiz et en donnant toute aide et faveur a noz genz estans et alans entre les rivieres du Loir et de Loire, en esperance de iceut combatre nos diz ennemiz; et souvent nous rescripsiez des nouvelles et nous vous en saurons bon gré. Tres chiers et bien amez, Notre Seigneur soit garde de vous. Notre entencion est d’estre briefment, au plaisir de Notre Seigneur, a toute puissance, par delà, pour donner confort a vous et aux autres bons et loyaulx subgiez de monseigneur et de nous et pour guerroyer nosdiz ennemiz. Escript, en notre chastel de Poictiers, le XXe jour de mars.
[Signé] Charles.
[Signé] Chastenier

[Suscription] A noz tres chers et bien amez les bourgois, manans et habitans de notre ville de Tours.
Presentees par Colin Fremon, le XXe jour de mars M CCCC et XX.