Epernon : 1591, 22 avril

[Acte]

[Analyse]

Lettre close de Henri IV adressée aux habitants de Tours par laquelle il autorise la construction d’une nouvelle fortification autour de la ville de Tours.

[Transcription]De par le Roy,
Chers et bien amez, encores que nous ayons assez congnu et congnoissions tous les jours le prejudice qu’apporte, au bien de nos affaires les places fortes qui sont dans nostre royaume, quand les habitans d’icelles s’oublyent de leur debvoir, comme nous n’en voyons que trop d’examples en ceste sayson deplorable, neantmoings la fidellité que vous nous avez conservee, l’affection qu'avez faict paroistre a nostre service et l’asseurance que nous avons que vous plus vivement continurez a l’advenir en la mesme fidelité et affection, nous fera tousjours trouver bon tout ce qui sera pour la decoration et forteresse de vostre ville; c’est pourquoy nous aurons bien agreable que faciez fortiffier nostredite ville selon le plant que nous avez envoyé, vous aiant pour cest effect accordé la levee de deniers que desirez estre faicte sur vous pour y employer. Vous assurant que, non seulement en ceste occasion, mais en tout aultre qui vous concernera, nous serons bien ayses de vous faire paroistre la bonne volonté que nous vous portons pour le désir qu’avons de vous gratiffier en recongnoissance de votre fidellité et affection. Donné a Espernon le 22 jour d’avril 1591.
[Signé] Henry
[Signé] Potier

[Suscription] A noz chers et bien amez les maire, eschevins, manans et habilans de nostre ville de Tours.