: [1557]

[Acte]

[Analyse]

Demande formulée auprès du du grand conseil du roi, au nom du corps de ville de Loches, d'augmenter les effectifs armés de Claude de La Ferté, prévôt provincial du connétable et des maréchaux de France en Touraine, en place depuis 1556, de six archers et d'un lieutenant, pour l'aider à assurer sa mission de justice aux environs de Loches, Châtillon-sur-Indre, Buzançais et Preuilly-sur-Claise.

[Transcription]Au roy,
Sire, il y a ung an ce qu'il vous pleut pourvoir Claude de La Ferté, seigneur d'Onzains, de l'office de prevost provincial de messieurs les connestable et mareschaulx de France en vostre pays et duché de Touraine avec seullement deux lieutenans, ung greffier et douze archiers. Et pour ce, sire, que faisant ses chevauchees, il a trouvé ledit pays estoy grandement couvert et environné de plusieurs bois, forestz et buissons ; et mesmement, du costé et es environs de Loches, Chastillon(1), Buzancoys(2), Montrichard et Prully(3). Et que de ce costé la, se retirent journellement gens vaccabons, brigans, homicidiaires et volleurs, dont il a a soy povoir fait faire justice et execucions de ceulx qu'il a pu aprehander. Comme de ce appert par les sentences donnees contre lesdits delinquans par ledit De la Ferté et sesdits lieutenans, et par les proces verbaux et actes de ses chevauchees. Lesquelz il a de present a sa suyte de la court pour les presenter a monsieur le connestable ou monsieur le garde des seaulx ou des mains de tel maistre des requestes qu'il vous plaira ordonner, suyvant les edictz, ordonnances sur ce faictzes pour en faire rapport. Au moyen de quoy, pour le peu de nombre d'archiers par vous a luy ordonnez, luy est impossible de pouvoir bonnement satisfaire a cinq sieges royaulx particulliers ressortissans a vostre siege presidial de Tours, sans avoir creut et augmentacion qu'il vous plaira augmenter d'un lieutenant et six archier, l'un desquelz luy servira de greffier avec telz et semblables gaiges qu'avez ordonné a ceulx qui sont de present soubz sa charge. Lesquelz lieutenant et archiers augmentez, feront residance au siege de Loches, comme le requierent et demandent les manans et habitans du ressort et dellegacion dudit Loches, soubz telle et semblable obeissance et nomminacion dudit prevost que les autres ses lieutenans et archiers par vous a luy ordonnez. Ainsi signé C. Delaferté.

Apres avoir veu le consentement du pays, y sera pourveu comme de raison. Faict au conseil privé du roy tenu a Villers Costeretz(4), le sixiesme jour d'avril l'an mil cinq cens cinquante six avant Pasques(5). Au rapport de monseigneur l'evesque de Nevers(6), maistre des requestes de l'hostel dudit seigneur. Ainsi signé Hurault.

Collacion faicte a l'original d ela presente par moy, Jehan Lehoux, greffier ordonné par le roy au prevost provincial de messieurs les connestable et mareschaulx de France, estably par le roy ou pays et duché de Touraine, le neufiesme jour de juing l'an mil cinq cens cinquante sept.
[Signé] Lehoux(1) Châtillon-sur-Indre, dép. de l'Indre. (2) Buzançais, dép. de l'Indre. (3) Preuilly-sur-Claise, dép. d'Indre-et-Loire. (4) Villers-Cotterêts, dép. de l'Aisne. (5) 1557 (n. s.). (6) Jacques-II Spifame, seigneur de Brou. (7) Probablement Jean Hurault, président du grand conseil.