Tours : 1596, 9 septembre

[Acte]

[Analyse]

Testament de Marie Berthereau, veuve de Helie Coullon, de Saint-Pierre-des-Corps.

[Transcription]†
Jhesus Maria
Saichent tous, que le neufiesme jour de septembre mil Vc IIIIxx seize, en la Court du roy nostre Sire a Tours par devant François Goussart, notaire juré en icelle, fut presente en sa personne et deument soubzmis etc. honneste femme Marie Berthereau, veuve de feu Hellie Coullon, demeurante près la porte de la Tour Feu Hugon, paroisse Saint-Pierre-des-Corps, laquelle estant en bonne santé corporelle, grâae a Dieu et considerant en elle qu'il n'y a rien sy certain que la mort, ne sy incertain que l'heure d'icelle, et ne voullant decedder de ce monde en l'autre intestate et disposer d'aucuns biens temporelz que Dieu par sa grace luy a prestez en ce mortel monde, nous requerant a ceste fin en rediger par escript son testament et ordonnance de dernière vollonté, ce qui a esté faict ainsy qu'elle l'a nommé et comme s'ensuict :
Premierement, recommande son ame a Dieu la priant, par les merites de la mort et passion de son filz nostre Seigneur Jhesucrist, mettre et colloquer sa paouvre ame avec ses esleuz en son Sainct Paradis, et luy pardonner ses faultes.
Item, prie la glorieuse Vierge Marie, Mere de Dieu, avocate des paouvres pecheurs, monsieur sainct Gatien, monsieur saint Martin, madame sainte Anne, madame sainte Marguerite et [2] generallement toute la court celleste de Paradis, d'estre intercesseurs pour elle envers Dieu.
Item, quand il aura pleu faire son commandement de la separation de l'ame d'avec le corps, ordonne sond. corps estre ensepulturé près le lieu et endroict ou led. feu Coullon son mary a esté ensepulturé en l'eglise de Saint-Pierre-des-Corps, pres la porte.
Item, ordonne que sond. corps, soit porté processionnellement, la croix levée, par Monsieur le Curé et chappelains jusques en lad. eglise Saint-Pierre-des-Corps.
Item, ordonne que les quatre ordres des mendiens de ceste ville, ensemble, le convent des Bonshommes du Plessis-du-Parc, lez Tours soient sebmonds d'assister a son convois, pour ce leur soit paié ce qu'il apartiendra et que lesd. convens conduiront sond. corps jusques en lad. eglise Saint-Pierre-des-Corps.
Item, ordonne avoir tous les sacremens de Nostre Mere Saincte-Eglise catholique romayne a sa fin et que on y ayt le soing de les luy faire administrer a temps sans trop attendre.
Item, ordonne, pour son service, trois grandes messes avec vigilles et letanies qui se diront par trois jours consecutifz, assavoir : une grande messe, vigille et letanie par chacun jour.
Item, ordonne que, auparavant que de [3] mettre son corps en sa fosse, soit chanté haultement en lad. eglise Saint-Pierre-des-Corps, vigilles de mors et que lesd. vigilles de mors soient commancees en portant led. corps en lad. eglise et continués lorsqu'ilz seront arrivez en icelle eglise.
Item, ordonne estre dict en lad. eglise Saint-Pierre-des-Corps, incontinant après sont deces, ung tranctain de basse messe, qui sont treante messes basse, qui sera une messe basse par chacun jour a son intention.
Item, ordonne estre dict en icelle eglise vingt autres messes basses par vingt jours consecutifz après led. trentin achevé et pareillement une messe basse par chacun jour a l'entention de ses amis vivans et trespassez et d'elle.
Item, ordonne estre dict aud. couvent des Bonshommes, ung grande messe a diacre et soubzdiacre et une au convent des Cordelliers ; une autre au Convent des Jacobins et autre au Convent des Carmes ; et pour chacune d'icelles messes soit paié vingt sols et une grande messe a Nostre Dame de Consollation et en soit paié aussy XX sols.
Item, pour son luminaire, ordonne six torches d'une livre piece ; dix [4] cierge de chacun ung quarteron et ungs seau de trois livres, le tout cire.
Item, ordonne que tous les paouvres mandians qui assisteront a son enterrement, leur soit donné par charité et aulmosne, a chacun deux solz ; et ou il ne se trouveroit aud. enterrement sy grande quanté (sic) de paouvres que la somme de cinquante livres ne soit toute emploiee, elle veult et ordonne que le surplus desd. cinquante livres soit donné aux paouvres qui assisteront au bout de l'an et dernier service.
Item, ordonne estre donné a la boueste de Nostre-Dame de lad.

[page manquante]

Liger, maître tailleur d'habitz demeurans aud. Tours, tesmoings. Declare lad. testatrice ne savoir signer.
[Signé] V. Garnychard, C. Liger, Riollan, Goussart.
Le present testament a esté revocqué par autre passé par devant le mesme notaire le XXVIe avril 1605.