1548, 15 juillet — Paris

[1] Maistre François de Renes advocat a Loches , ou nom et comme procureur de Bonaventure Fortier, vefve de feu maistre Estienne Martineau en son vivant tresaurier extraordinaire de l’artillerie du Roy executeresse du testament et ordonnance de derniere volunte dud. deffunct fondé de procuration transcripte vers la fin de ces presentes, confesse avoir eu et receu de honnorable homme maistre Ythier Liger, procureur en parlement a ce present, la somme de cent une livres dix solz tournois par led. Liger receue de la vefve feu maistre Jehan Bezard qu’il dict estre tant pour le reste de la moictie des despens esquelz led. deffunct a esté condampné envers la communaulte d’entre elle et icelluy deffunct Bezard, son mary, montant lad. moictie LXXIX livres XV solz sept deniers tournois, que pour le reste de la moictie des sommes de cent cinquante escuz dix solz et deux cens quarante livres tournois d’aultre, sauf l’erreur de calcul lad. somme de cent une livre dix solz tournois ainsi [2] receue par led. Liger de ladicte vefve Bezard a esté payee, comptee et nombree aud. de Renes oud. nom, presens les notaires, en cinq doubles ducatz, huict ducatz simples, dix escuz d’or soleil et le reste en testons et monnoye, le tout ayant de present cours. Dont etc. quicte etc. et promect acquicter etc. Promectant etc. Obligeant oud. nom etc. Renonçant etc. Ensuict la teneur de lad. procuration : A tous ceulx qui ces presentes lettres verront, le bailly de Bloys , salut. Sçavoir faisons que, par devant Jehan Pichot, clerc, notaire et tabellion a Court-lez-Cheverny du seel royal estably aux contractz de la chastellenye dud. Bloys , vint et fut presente personnellement honneste femme Bonaventure Fortier, vefve de noble personne Estienne Martineau en son vivant, tresaurier extraordinaire de l’artillerye, ou nom et comme executeresse du testament et ordonnance de derniere volunte dud. deffunct Martineau, son mary, laquelle oudict nom, congnut et confessa [3] avoir faict, constitué, esleu, ordonné et estably son certain et bien amé procureur general et messsaiger especial honnorable homme maistre François de Renes, auquel elle a donné et donne plain povoir, puissance, auctorité et mandement especial de recevoir pour elle en lad. qualite tout le reste des sommes qu’ilz restent a payer des louaiges des maisons saisies sur feu maistre Jehan Berard, en son vivant general des monnoyes et des despens taxez et jugez contre led. feu Berard et sa vefve et heritiers, ensemble pour recevoir certain reste a payer de la somme de deux [om.] quatre livres d’une part et cent cinquante d’aultre, pour lesquelles sommes lesdictes maisons avoient esté saisies en vertu des actes de la court de Parlement, et de icelles establyr commissaire Jehan Villot, cordonnier et pour d’icelles sommes avoir payement, poursuyvre pour elle en lad. qualite tant la vefve et heritiers dud. Berard que aultres qu’il apartiendra et d’en bailler une quictance ou quictances, telles que au cas apartiendra, et generallement de faire et ordonner sur les choses desusd. et chacunes d’icelles, leurs circonstances et deppendances quelzconques comme bons procureurs et loyaulx peulvent et doibvent faire et comme feroit et faire pourroit lad. constituante en lad. qualite si presente en propre personne y estoit jaçoit ce que le cas requist mandement plus especial, promectant lad. constituante [4] oud. nom par sa foy en la main dud. juré qu’elle aura et tiendra ferme et estable a tousjours tout ce que par led. procureur sera faict, ordonné et estably, soubz l’obligation d’elle et de tous ses biens quelzconques presens et advenir, lesquelz elle a pour ce soubzmis et soubzmect a la jurisdiction et contraincte de nostre court de Bloys et a toutes aultres. Ce fut faict et passé es presences de discrecte personne maistre Jullyan Dardon, prebstre, et Jaques Huart demeurans aud. Court, tesmoings a ce appellez. En tesmoing de ce, du seel royal dessusd. a lad. rellation dud. juré, le tiers jour de juillet V^c XLVIII et ainsi signé Pichot et sellé de cire verd sur double queue. Faict et passé l’an mil cinq cens quarante huict le jeudi douziesme jour de juillet.
[Signé] Jamart, Cothereau