29/7/1551 — Paris

Par devant etc. fut presente en sa personne honneste femme Philippes Clement, vefve de feu Anthoine Pasquier, en son vivant archer de la garde du corps du roy, bourgeois de Paris , gisant au lict, mallade, toutesvoyes sayne de pensee et de bon et ferme propos, memoire et entendement, comme de prime face il aparoit aux notaires soubz signez, disant que par cy-devant elle a faict son testament et ordonnance de derniere volunte qui est signé de sa main dacté du neufiesme jour d’avril dernier passé, faict es presences de Andry Constant et Jullian Rabache par lequel, entre aultres choses, elle a esleu ses executeurs maistre Estienne Pasquier, licencié es loix, son filz, et honneste femme Jehanne Clement, sa seur, vefve de feu Michel Clement, en son vivant, marchant et bourgeois de Paris . Lequel testament ainsi qu’il est escript, que lad. testarresse dict avoir par devers elle lad. Philippes Clement a ratiffié et coroboré et eu pour agreable ; et en augmentant et adjoustant a icelluy etc. faict et ordonne ce qui s’ensuit : c’est asssavoyr que lad. Philippes Clement a declairé et declaire combien que, par led. testament lesd. maistre Estienne Pasquier, son filz, et Jehanne Clement, sa seur soient esleuz ses executeurs, qu’elle veult neantmoins et entend que honorable homme maistre Philippes Boissellet, notaire ou Chastellet de Paris ayt la charge et administration de l’execution de sond. testament, avec sond. filz et sad. seur et que sesd. executeurs esleuz par sond. testament ne puissent riens faire ne administrer en l’execution dud. testament sans le conseil, advis et deliberation dud. Boissellet en quelque maniere que ce soit. Et lequel Boissellet lad. Philippes Clement a esleu, nommé et ordonné son executeur avec lesd. Estienne Pasquier et Jehanne Clement declairant par lad. testarresse qu’elle veult que led. Boissellet en ayt la principalle charge, donnant povoir ausd. Boissellet, maistre Estienne Pasquier et Jehanne Clement d’accomplir led. testament et le contenu en ces presentes selon sa forme et teneur. Item, lad. testarresse donne, legue et laisse a Annecte Emery, sa chambriere, une robbe noire, la queue doublee de serge drappee et ce oultre les sallaires de lad. Annecte.
Item, donne et laisse [3] a Katherine Daurmiette, sa chambriere, la meilleure de ses cottes noire et ce oultre les sallaires de lad. Daurmiette.
Item, lad. Philippes Clement donne et laisse a Katherine Bournays une coste noire doublee de drapt moir, a ce qu’elle ayt a prier Dieu pour l’ame de lad. testarresse.
Item, lad. Philippes Clement donne, legue et laisse a Mathurine Galicher ung chapperon de drapt noir.
Item, donne a Katherine, fille de Jehan Lemaire, bonnettier devant sa maison, une autre cocte.
Item, donne, legue et laisse a Jehanne Bally, ung septier de ble et ung muy de vin, a ce les dessusd. soient tenues de prier Dieu pour l’ame de lad. testarresse. Et veult que le contenu en ces presentes et oud. testament vaille et sorte son effect. Promectans etc. Obligeans etc. Renonçans etc. Faict et passé l’an mil cinq cens cinquante ung, le mercredi vingt-neufiesme jour de juillet. Multipple.
[Signé] Lenormant, G. Cothereau