Lettre close de Charles VIII adressée aux habitants de Tours 
pour les informer de la prise de Saint-Omer, de Coucy et de Ploermel en Bretagne .
De par le Roy
Tres chiers et bien amez, nous avons receu unes lectres que le sieur Desguerdes nous a escriptes, par lesquelles il nous fait savoir la prinse de la ville de Saint Omer , laquelle est de present en noz mains et en notre obeissance, ainsi que pourrez veoir par le double desdites lectres que vous envoyons cy-dedans encloz et, pource que ce sont tres bonnes nouvelles et grandement a l’avantaige de nous et de nostre royaume, nous vous en advertissons voulentiers et esperons que, a l’aide de Dieu, de vous et de nos aultres bons et loyaulx serviteurs et subgectz, noz affaires de tous costez prospereront de bien en mieulx et que ceulx qui ont entreprins et veullent entreprendre sur nous et nostre auctorité n’y gaigneront riens et qu’ilz ne viendront pas audessus de ce qu’ilz cuidoient faire.
Nous vous envoyons aussi le double d’unes lectres que nostre cousin le comte de Candalle et les seneschaulx qui sont avecques lui ont aujourduy escriptes de devant Nantron ou est le sieur d’Albret, par lesquelles vous pourrez congnoistre la necessité en quoy est ledit sieur d’Albret et le double d’un memoire touchant la response que leur avons faicte et, la chose parachevee, le vous ferons incontinant savoir, avec de noz autres nouvelles. Donné à Laval , le IIe jour de juing.
Depuis nos lectres escriptes, nous avons eu nouvelles de la prinse de Coucy et de Plermel en Bretaigne , ainsi que sembleblement pourrez veoir par le double des lectres que nous en ont esté escriptes que aussi vous envoions.
[Signé] Charles
[Signé] Parent.
[Suscription] A noz tres chiers et bien amez les gens d’eglise, nobles, bourgois, manans et habitans de nostre ville de Tours .
