Lettre de Jean de La Curée adressée à Jean Coustely, maire de Tours 
et à monsieur de Tourtay, pour leur assurer qu’il ne fait pas acte de sédition.
Messyeurs de Coustely et Tourtay, je vous envoye une copye de une lettre qu’il a pleu a monseigneur monsyeur de Monpensyer nous envoyer, a celle fyn que vous congnoyssyez que, quelque bruyct des armes que nous avons prynses, ce n’est aucunement pour sedition, ne n’y a aucune volonté de tendre a diversité de religion. Monsyeur Coustely, vous scaves, en la charge que vous aves, le commendement qui vous a esté fayct des maiestés du roy et de la reine, et, d’aultant que je suys adverty que quelque mutyns seditieulx sont partys de vostre vylle, vous estant amy, je vous ay bien voulu escryre ce mot pour le desyr que j’ay de guarder mes amys et avoyr justice des ennemys de nostre race, desque de laquelle nous sommes encores quatre freres, quy avons trouvé cinq cens gentishommes qui supplyront le roy de nous fayre justice. Et, pour le support d’icelle, ou il playra a la maiesté du roy leur commander, y employeront tous leurs vyes. Croyes tous, sur mon honeur, que il ne pretendent ryen dyminuer du privileyge de nostre religion, mays plustost la nous mayntenyr, pour l’obeissance qu’il portent a la maiesté du roy en cest endroyet. Monsyeur Coustely, je vous presente mes plus affectionnees recommendations, supplyant le createur vous donner, en santé, bonne et longue vye. De Villedieu, ce vingt et cinquiesme de aoust.
Vostre bon voysin et amy,
[Signé] Jehan de La Curee.
[Au dos] Apportees par François Lenez, natif de Villedieu, serviteur du sieur de La Fosse, frere du feu sieur de La Curée.
[Suscription] Messieurs Coustely, mere de la ville de Tours .
