Lettre d’Anne de Montmorency-Fosseux, capitaine de la garnison placée dans le chateau de Tours 
, adressée à Monsieur de la Valière, maire de Tours , lui demandant le paiement de sa commission pour l’entretien de ses soldats.
Monsieur, j’ay receu la vostre pour responce a laquelle je me suis enquis et ay envoié vers celles pour scavoir nouvelles certaines dont mon homme n’est point encore de retour. Je ne fauldray, s’il m’apporte nouvelles quy meritent le vous mander, a vous envoyer homme exprez. Au reste, je vous prie, monsieur, vouloir me tenir la main au paiement de la commission que le feu roy m’a baillee pour la garnison du chasteau de ceste ville et entretenement des soldatz. J’ay esté constraint y faire desia beaucoup d’advance, mesme qu’il ne m’est ordonné que trois escuz ung tiers pour chacun; je ne les puis tenir qu’a cinq escuz pour mois et encor par priere. Et, d’aultant que ie scay que y pouvez beaucoup a me faire paier pour entretenement de ladite garnison, je vous prie encor ung coup m’y tenir la main, et en aultre endroit ou j’auray moien vous le recognoistre, je le feray avec aultant d’affection que je vous baise bien humblement les mains prie Dieu vous donner, monsieur, en bonne santé, longue et hereuse vie. De Montrichard , ce XX aoust 1589.
Votre tres affectionné allyé a vous servir.
[Signé] De Montmorency.
Vostre homme vous pourra fere entendre de bouche ce que je luy ay dict.
[Suscription] A monsieur, monsieur de la Valiere, maire de la ville de Tours , a Tours .
