[fol. 3] Le XIXe jour d'avril l'an mil Vc vingt cinq apres Pasques, en la court du roy nostre sire a Tours 
, etc. Personnellement establiz Mathieu Chairsalle, imprymeur demourant audit Tours , d'une part, et Jehan Bodineau, libraire demourant a Bloys , d'autre part. Soubzmectans, etc. Lesquelz ont congneu et confessé en ladite court avoir fait et font entreulx les marchez et obligacions qui s'ensuivent. C'est assavoir que ledit Chairsalle a promis et promect de faire audit Bodineau le nombre de six cens paires de heures a l'usage de Chartres , bonnes et loyales, et marchandes, et bien imprimees au long ainsy que celles que ledit Chairsalle a fait par cy-devant audit usaige. Et sy ledit Chairsalle en fait plus de six cens et jusques a l'extinuacion de XX rames [fol. 3, v°] de papier, ledit Chaisalle sera tenu les bailler audit Bodineau sy les veult prandre. Et la ou il ne les vouldra, ledit Chairsalle en pourra faire son prouffict. Ledit nombre d'heures rendre en la ville de Bloys , en la maison d'icelluy Bodineau, et aux despens d'icelluy Bodineau dedans la Penthecouste ou quinze jours apres. Ce present marché fait pour le pris, somme et au fure de dix-sept solz six deniers tournoys pour la faczon de chacune rame, et jusques a l'extinuacion de seize rames. La somme que se montra ladite besongne, au fure que dessus, ledit Bodineau a promis et promect, doit et sera tenu de rendre et paier audit Chairsalle, ou a son certain commandement, a la livraison desdites heures. Et est dit que ledit Chairsalle ne fera ou fera faire d'autres heures audit usaige durant ledit temps que les heures qu'il a vendues audit Bodineau jusques apres la vendicion et livraison desdites heures. Et s'il en fait d'avantaige oultre le nombre de vingt rames, l'oultre plus sera confisqué audit Bodineau. Et a paié ledit Bodineau audit Chairsalle le papier servant a faire ladite besongne jusques ausdites seize rames dont ledit Chairsalle s'est tenu pour contant. Et sera tenu ledit Bodineau a bailler audit Chairsalle ung escu quant il commencera ladite besongne. Et a ce tenir, etc. Obligent lesdites parties l'un a l'autre, etc. Renoncant, etc. Foy, etc. Presens Jehan Blanchart, courroyeurs, et André Tryollet, demourant audit Tours , tesmoings, etc.
[Signé] Foussedouaire
