Le X^e jour de novembre l’an mil IIII^c LXXIII fut marché fait entre Guillaume Guenon et Jehan Pourceau, armeuriers demourans a Tours d’une part et Jehan De La Vau et Jehan Chaudot, charpentiers d’autre part tel qui s’ensuit. C’est assavoir que lesditz charpentiers ce chacun d’eulx pour le tout ont promis et promectent faire ausditz Guenon et Pourceau en leur maison qu’ils font de present ediffier audit Tours en la rue de Malyentias et ou lieu ou sera advisé estre le plus prouffitable une viz a huit pens pareille en façon et grosseur de marches qu’est celle de la maison dicelle Boutilliere ou ilz demeurent appartenant a Guillette Boutilliere et plus large que la viz dicelle Boutilliere de troys doyz par le plus estroit endroit. Item et faire ou noyau de ladite viz ung tien main ront. Item faire que le dessus dudit noyau passe oultre la derreniere marche autant que fait celuy de la viz de ladite Boutilliere et y faire pareil garde sol huisserie clouaison fournir de soliveaux pour faire la clouaison de dessus faire les passes et de tout boys et linsoars qui y appartiennent et rendre faicte bien et deuement au dit des ouvriers c’est assavoir la serche de ladite viz dedans la chandeleur prouche venir et toute ladite viz et besoigne dessusdit parfaicte et acomplir dedans la my caresme pourche apres ensuivant pour le pris et somme de trente livres tournois sur laquelle somme lesditz Guenon et Pourceau ont paié et avancé ausit charpentiers en notre presence six livres tournois dont etc et le surplus qui est XXIIII livres iceulx Guenon et Pourceau promectent paier ausditz charpentiers ou a l’un deulx. C’est assavoir X livres ainsi que lesditz charpentiers feront admener le boys de ladite viz et qu’ilz y besoigneront et le surplus qui est XIIII livres si tost et tout incontinent que ladite besoigne sera faicte et acomplie. Obligeant lesdites parties l’une a l’autre mesmement lesditz charpentiers chacun pour le tout eulx leurs hoirs etc renonçant etc foy etc tant en court laye que de l’eglise. Presents ace Jehan Roul le jeune et Rochart Esserton, tesmoings.
[Signé] Jaloignes J.

Le XXVII^e de mars LXXIII, Jehan Chaudot a receu de Guillaume Guenon la somme de XXV sous IX deniers que ledit Guenon et Jehan Pourceau devoient audit Chaudot et Jehan De La Vau, son compaignon de reste de XXX livres pour la besoigne declairee en ce present contrat de laquelle comme de XXV sous IX deniers ensemble de toute ladite somme de XXX livres ledit Chaudot s’est tenu pour content et bien paié, quicte etc. Presents Guillaume De La Forest et Pierre Rouxeau, tesmoings.