Collège d’Autun.
Venerables et discrectes personnes maistres Mathieu Prallus, principal, Bonnet Fillon proviseur, Pierre Butaud, Flory Dervieu, théologiens, Jehan Rochepaille, Anthoine Dallier, Jehan Vilard, Pierre Greslier, Jehan Darengeon, decretistes, Jehan Duverger, Nicolas Chastegnyer, Gilbert Darnyeres, artiens, en leurs noms et encores led. Chastegnyer ou nom et comme soy disant procureur et faisant fort de me Claude Pessonnet, decretiste, tous bourciers du college maistre Pierre Bertrand, cardinal, dict d'Ostun, fondé en l'université de Paris , faisans et representans quant a present la plusgrande et sayne partie des bourciers dud. college, confessent avoir baillé a tiltre de loyer du jour de Noel prochain venant jusques a sept ans lors prochains ensuyvans finiz et acompliz, et promectent oud. nom garentir etc. a maistre Mathieu Primet, cousturier demeurant a Paris a ce presnt preneur aud. tiltre et pour led. temps, une chambre basse, cellier et cave assize a Paris , rue Sainct-Andry-des-Ars, ou pend pour enseigne L'ymage Sainct-Estienne, ausd. bailleurs esd. noms appartenans a cause dud. college, que a tenu et occupé, que tient et occupe a present Estienne Chastegnier, huissier de la chancellerie de Paris , ensemble, tout ce que tient et occupe a present led. Chasteygner, pour de tout ce que dict est, joyrs par led. preneur aud. tiltre durant lesd. sept annees ainsi que en a joy par cy devant et joyst a present led Chastenyer; cest bail et prinse faictz moyennant le pris et somme de dix huict livres tournois que de loyer par chascuns desd. sept ans led. preneur en sera tenu, promect et gaige rendre et payer ausd. bailleurs esd. noms leur procureur et receveur dud. college ou au porteur etc., aux quatre termes, premier terme de payement escheant au jour de Pasques prochain venant, et ainsi etc. Lesquelles choses baillees led. preneur sera tenu garnyr de biens meubles exploictables pour la seureté dud. loyer et icelles entretenir de menues reparations durant led. temps, sans dimynution dud. loyer. Et lesd. bailleurs esd. noms le tiendront cloz et couvert en icelles aux us etc. Et ne pourra led. preneur transporter ce present marché partie ne portion d'icelluy a aultre, sans le consentement desd. bailleurs. Et aussi est ce faict a la charge expresse que lesd. bailleurs pourront faire avaller leurs vins, boys, tirer leurs fustailles et mectre leurs provisions par la trappe et allee estant esd. choses cy dessus baillees es caves estans des appartenances dud. college que lesd. bailleurs tiennent et occuppent et qui ne sont comprinses en ces presens bail et prinse. Et a esté accordé que led. preneur et Jehanne Gambe, sa femme, et le survyvant d'eulx deux joyront durant led. temps desd. choses baillees, sans ce que les heritiers du predecedé y puissent aulcune chose pretendre ni demander. Et si led. preneur ou sa femme decedoient tous deux pendant led. temps et auparavant iceluy expiré, en ce cas, lesd. bailleurs oud. nom, pourront, si bon leur semble, remectre lesd. choses baillees en leurs mains, ou les bailler a tel aultre que bon leur semblera de leur auctorité privee, sans sommation, figure de procès, ny aultre sollempnité de justice y garder, sans ce que les heritiers dud. preneur et sa femme y puissent pretendre ne demander aulcun droict. Car ainsi etc. Promectent etc. Obligent etc. noms etc. Renoncent etc. Faict et passé double, l'an mil cinq cens quarente sept, c'est assavoir, par lesd. Praslus, Fillon, Dervieu, Rochepaille, Villart, Greslier, Derangeon, Du Verger et maistre Nicollas Chasteygner esd. noms et Primet, preneur, le jeudy quinze, par led. Butault le mardi vingt septiesme jours de septembre et par lesd. Daillier et Dervieres, le mardi quatriesme jour d'octobre.
Signé en la minute: G. Cadier