[Analyse enrichie] Testament de Jehan Boutiller, prêtre.

Ou nom de la tressaincte et indivisible Trinité, le Pere, le Filz et le Saint-Esprit, amen. Saichent tous, presens et avenir que j’ay, Jehan Boutiller, prebstre, chanoine de l’esglise cathedralle d’Agen en Agenoys et cure de Braye, sieur d’Aubigny, par la grace de Dieu, mon createur, sain de pensee, estant en mon bon sens, ferme et continuel propox, considerant et actendant la fragilite d’umaine creature qui chacun jour se adminuise en traictant homme et femme a sa fin, et qu’il n’est chouse plus certaine que la mort, ne chose plus incertaine que l’eure d’icelle, et que a la mort toute humaine creature est sy subgecte, que uneffois luy convient payer son tributh de nature, duquel le terme est indéterminable en la disposition, volunte et ordonnance de Dieu nostre Pere createur, voullant et considérant et desirant de tout mon cueur pourvoir au salut et remede de mon ame ou la grace de Dieu mon Pere et createur, et non deceder intestat de ce ciecle en l’austre mais comme vray catholicque, a la louange, grace et honneur de Dieu mon Père omnipotent, foys et ordonne mon testament et derniere volunte des biens temporelz qu’il a pleu à Nostre Seigneur de sa grace me donner et prester en ceste presente, mortelle et transitoire vie cestuy monde, dispose et ordonne en la forme et manière qui s’enssuit :
Premierement, pour ce que l’ame de homme et de femme est a preferer a toutes choses terriennes, je recommande mon ame au tresglorieulx roy de Paradis, mon benoist pere createur et redempteur, a la benoiste glorieuse Vierge Marie, sa mere, de Paradis tresoriere, a monseigneur saint Michel, ange archange, a monseigneur saint Jehan Baptiste, a madame saincte Barbe et a toute la benoiste celestielle compaignie de Paradis ; en leur suppliant et requerant tres humblement et devotement que ma pouvre et dolente ame quant elle departira d’avecques de mon corps et charongne, ilz vueillent estre garant [1b] et deffence contre la tresorible et espovantable face de l’ennemi, prince des tenebres d’Enffer, [supra linea] a qui je renonce et promest vouloir vivre et mourir en la saincte foy catholique ; et la recepvoir et conduire en la compagnie des sainctes ames bien eurees en la grant joye de Paradis ; et apres que mad. ame sera departye d’avec mon corps, pouvre et miserable charongne, je vueil et ordonne mond. corps estre ensepulturé en nostre mere Saincte Eglise, comme bon vray crestien et loyal catholicque : c’est ascavoir en l’esglise parochialle de monsieur Sainct-Vincent de Tours , se Dieu faict son commandement de moy et que decede en cested. ville de Tours , pres le lieu ou est enterré feue mon ayeulle et grant mère Guillemette Boutillere ;
Item, je vieulx et ordonne que toutes et chacunes mes debtes soient loyaument paiees et acquictees ;
Item, pour l’ordonnance de mon luminaire, je le remectz a discression et ordonnance de mes executeurs cy apres nommez ;
Itemje vueil et ordonne que au jour de mon obit, que Dieu, par sa grace aura faict son commandement de moy, que les religieulx des quatre ordres mendiens de ceste ville de Tours assistent et soient en procession, a conduire mon corps jusques a lad. eglise ; et vieulx que a chacun desd. ordres soit pour ce donné la somme de 10 s.t., une foiz paiez ;
Item, que au jour de mond. obit soit celebré en ladite eglise Saint-Vincent, pour le salut de mon ame, vigilles de mors et la letanye avec les oraisons acoustumees, avec vespres de mors au soir et pour ce faire leur donne la somme de une foiz paiez, et remects le paiement a la volunte de mes executeurs de ce qu’il en peult escheoir ; et que les chappelains de lad. église soient aportez mon corps jusques a lad eglise et que pour ce leur soit donné, a chacun xii d.t. une foiz paiez.
Item, que au jour de mond. obit soit dit et celebré troys grans messes dont l’une sera du Saint Esprit, l’autre de Nostre-Dame et l’autre des trespassez ; esquelles deux premieres grans messes sera fait commemoration de madame sainte Barbe ; avec ce, qu’il soit dit et celebré en lad. eglise Saint-Vincent, ou ailleurs en lad. ville de Tours , a l’ordonnance de mesd. executeurs, led jour, le nombre de cinquante messes basses dont en aura dix messes dictes a l’honneur et service de Madame sainte Barbe, et a la affin (sic) de chacune desd. messes, qui seront celebrees en lad. eglise ou ailleurs a l’ordonnance de mesd. executeurs, soit fait commemoracion des trespassez.
[2b] Item veil et ordonne qu’il soit fait et celebré autel et pareil service les jours de mon sepme et bout de l’an, sauf la letanye et qu’il soit dit, oultre la vigille d’avant de chacun desd. jours, vespres de mors, au soir et jour d’avant ;
Item, je veil et ordonne que au jour de mond. obit soit donné aux hospitaux et aumosnes de Saint-Gacien, Saint-Martin, Saint-Jullien, Saint-Esperit, Saint-Jehan-des-Pons et Saint-Pierre-des-Corps, affin qu’ils soient tenuz a prier Dieu pour le salut de mon ame, a chacun la somme de V s.t., une fois paiez ;
Item, a XIII pouvres, ou nom des treze apostres, de nostre Sauveur, Jesus-Christ, le jour de mond. obit soit donné a chacun la somme de XIII d.t. une foiz paiez.
Item, a l’euvre de l’eglise de Saint-Vincent, je donne, affin d’estre participant aux bien fait et service d’icelle LXX s.t. une foiz paiez ;
Item, a l’euvre de Saint-Gacien, pour semblable cause X s., une foiz paiez ;
Item, plus je veil et ordonne, par cest present mon testament et ordonnance de dernière volunte que, apres mon deces, ma niepce, Andree Savary, fille de [Boutillier avait d’abord écrit : honnorable] noble homme Christophle Savary et de Jehanne Boutillier sa femme, ma seur, soit ma propre heritière, seulle et pour le tout selon la coustume de ce pays de Touraine de tous et chacuns mes biens meubles et immeubles, presens et avenir et en deboute, par ces presentes, tous autres qui y pourroient pretendre avoir et demander aucun droit pour certains plusieurs et agreables services qu’elle, sesd. père et mere m’ont fait par cy davant et qu’espere qu’ilz me facent le temps avenir ; a la charge de parfaire et acomplir par elle, prealablement, ced. present mon testament ; de paier et acquicter toutes et chacunes mes debtes loyaument deues et congneues jusques lesquelz. j’ord… desquelles je veulx [supra linea :] les creanciers d’icelles estre creuz par serment jusques a la somme de XX s.t. et au-dessoubz. Et dès a present pour lors et dès lors comme a present, ou cas, et non autrement, baille la possession et saisine d’iceulx biens reelle et actuelle pour en faire et disposer a sa plaine volunte hault et bas comme sa propre chose
Item, je eslis pour acomplir ce present mond. testament mes executeurs honnorables personnes led. Christophle Savary, venerable et discrete personne maistre Jehan Bretheau, prieur et curé de lad. eglise de Saint-Vincent, et Martin Heron, pelletier, mon serviteur, ausquelz ou aux deux des troys, au cas qu’un d’iceulx n’y peult vacquer, prye et supplye que leur plaisir soit [2b] en prandre le festz et charge, quant mestier sera et pour ce faire, des a present pour lors et des lors que Dieu aura fait son commandement de moy, leur livre et baille la totalle possession de mes biens presens et avenir jusques a l’acomplissement d’icelluy ;
Item, je veil et ordonne que aud. Martin Heron, soit donné et baillé, tant par les mains de mad. niepce et heritière cy-dessus nommée ou mesd. executeurs, la somme de vingt l.t., une foiz paiez, que lui donne en faveur et contemplacion et pour aucunement le recompenser [pour] plusieurs agréables services qu’il m’a faitz par cy davant et aussi pour la paine et sallaire qu’il aura et prandra a l’acomplissement et parfait de ce présent (mond.) testament ; Et revocque tous autres testamens faiz paravant cestuy et veulx que cestuy vaille, tiengne et sorte son plain effect et vertu selon sa forme et teneur ;
Aussi vieulx, oultre et par expres que si aucuns de mes heritiers tant freres que seurs et autres, voulloient aller au contraire de ce present mond. testament et empescher l’acomplissement d’icelluy et mesmement de lad. donnaison faicte cy-dessus a mad. niepce, qu’ilz soient privez et des lors comme a present d’abondant, oud. cas les prive et destitue d’estre mes heritiers et veulx que mad. niepce fille dud. Savary en joysse totallement et non autres, en faisant et acomplissant par elle lesd. choses, dessusd. et non autrement ;
Et supplie et requiers a la garde du seel royal de Tours que a plus grande confirmacion des choses dessusd. il lui plaise mectre et apposer ausd. presentes led seel royal estably et dont l’on use aux contractz royaulx de Tours , quant mestier sera. Et nous garde etc.
En tesmoing de verite j’ay signé ce present mon testament et ordonnance de dernière vollunté et fait signer, pour plus grande aprobacion du seing manuel de Jacques Foussedouaire, notaire juré desd. contractz cy mis a ma requeste es presences de Robinet Saffetan, cousturier et Michau Brusle, coustelier demourans aud. Tours , tesmoings.