Faict par brevet Par devant Anthoine Becquerel et Guillaume Cothereau clercs, notaires du Roy nostre sire en son Chastellet de Paris, furent presens en leurs personnes honorable homme Falco Aubert, mareschal des logis de la Royne, estant de present logé a Saint-Germain-des-Prez-lez-Paris en l’hostel de feu venerable noble et scientificque personne maistre Leon Aubert, son frere, en son vivant docteur regent en la faculte de theologie en l’Universite de Paris siz aud. Saint-Germain pour luy et en son nom d’une part, et honorable homme maistre Marin Sigur, procureur en la court de Parlement d’aultre part, disans lesd. parties qu’elles estoient et sont en proces par devant Messieurs des Requestes sur unes lettres royaulx obtenues par led. Falco Aubert avec maistre Francoys Aubert, son frere, affin de rescision et cassation de contract de partaige faict entre eulx et led. deffunct maistre Leon Aubert, leur frere, avec deffunct maistre Jehan Parent, en son vivant aussi procureur en lad. court et Perrette Aubert, sa femme, seur desd. Aubertz et a present femme dud. Sigur, au moys de juillet mil cinq cens quarante troys, pour raison des biens et successions de leurs feuz pere et mere et aultres leurs predecesseurs ; auquel proces elles auroient proceddé par plusieurs et diverses assignations, escript et produict d’une part et d’aultre. Pour mectre fin auquel proces, mouvoir paix et amyctie entre lesd. parties qui sont freres et seur et eviter a fraiz, elles ont de [2] et sur ce que dict est, circonstances et deppendences, traicté, chevy, composé, paciffié et accordé en la forme et maniere qui s’ensuyt : c’est assavoir que, suyvant la volunte et ordonnance testamentaire dud. deffunct maistre Leon Aubert, portee par son testament passé par devant lesd. notaires soubzsignez le quatriesme jour du present moys d’aoust et moyennant le legs porté par icelluy testament faict aud. Falco Aubert de la somme de cinq cens livres tournois, lequel icelluy Falco Aubert estant dedans la huictaine portee par led. testament auroit dès le dix-huictiesme jour du present moys accepté et encores l’accepte par ces presentes, Et s’est icelluy Falco Aubert desisté et departy, s’en desiste et depart par ces presentes dud. proces, circonstances et deppendences et en tant que besoing seroit, a ceddé, quicté, transporté et delaissé, cedde, quicte, transporte et delaisse ausd. Sigur et sa femme, ce acceptant par led. Sigur tant pour luy que pour sad. femme, tous et chascuns les droictz, noms, raisons et actions tant rescisoires et rescindés que aultres qu’il a et pourroit avoir et pretendre a cause et par le moyen dud. contraict de partaige ; lequel contraict de partaige lesd. parties on voullu et consenty, veullent et consentent par cesd. presentes sortir son plain et entier effect et que icelles parties soient et demeurent hors de court et de proces, sans aulcuns despens, dommaiges et interestz d’une part et d’aultre. Et a ceste fin leur seront leurs sacz et pieces renduz et pour ce faire ont constitué et constituent procureurs par procuration a part, sauf et sans prejudice toutesfoiz aud. Falco Aubert, au cas qu’il ne se trouveroit biens suffisans après les debtes et charges predecentes payees, pour luy payer led. legs de cinq cens livres tournoiz, selon que led. feu Aubert l’a ordonné par sond. testament, de pouvoir rentrer et poursuyr sesd. droictz et actions tout ainsy qu’il eust peu faire [3] auparavant le present contraict et ausd. Sigur et sa femme, de leurs droictz, exceptions et deffences au contraire. Sur laquelle somme de cinq cens livres tournois, led. Aubert a confessé avoir receu dud. Sigur, comme executeur dud. testament, la somme de six vingtz quinze livres : c’est assavoir XXXVI l. V solz pour draps de layne venduz et delivrez aud. Falco Aubert pour faire habitz de deuil, comme il a dict, par Jehan et Claude Desprez, drappiers a Paris ; de laquelle somme led. Sigur est respondant et d’icelle en promect acquicter led. Falco et la payer pour luy ausd. Desprez ; item, cinquante livres tournois en meubles que led. Sigur a venduz et delivrez aud. Falco et qu’il confesse avoir en sa possession et le reste, montant quarante huict livres quinze solz tournois, payez et nombrez par led. Sigur aud. nom aud. Falco, presens les notaires, en XXI d’or soleil a XLVI s.t. piece et le reste en douzains, le tout revenant a la somme de VI^xx XV l.t. de laquelle led. Falco se tient pour content. Quictans etc. Promectans etc. Obligeans chascun en droict soy etc. Renonçans etc. Faict et passé double l’an mil cinq cens cinquante six, le vendredy XXI^e jour d’aoust ; et a esté notiffié ausd. parties ces presentes estre subgectes a insinuation, suyvant l’edict du Roy.
[Signé et paraphé] A. Becquerel, G. Cothereau.

[Acte suivant, fragment] Faict brevet aux recongnoissans Guillaume Pasquier, maistre pothier d’estain a Paris et Michelle Le Cuintier (?) sa femme de luy auctorisee, confessent qu’ilz sont a present detempteurs et proprietaires de certaines portions de maison deux maisons assises a Paris , rue de Montorgueil ou pend pour enseigne l’Imaige Saincte-Barbe, tenant d’une part a la veufve m[aistr]e Jehan Riviere et a la vefve Nicolas Solye et d’autre part a Monsieur Aubert, notaire, abboutissant d’un bout sur lad. rue et d’autre bout a lad. vefve Riviere ; et l’autre maison ou pend pour enseigne La Corne de Daim, tenant d’une part a Grand-Jehan Belot et d’autre part aux heritiers de feu Jehan Desmaretz, abboutissant par derriere aud. Belot et ausd. heritiers et d’autre bout a lad. rue ; et que, sur lesd. portions et generallement sur tous et chascuns leurs biens meubles et immeubles presens et advenir Robert Motins (?) brodeur du Roy et Jehanne Moulinier sa femme, a cause d’elle ont droict de prendre […]