Jhesus, Maria In nomine Domini, amen. Je, Jehan Pénigault, prestre, chanoine prebendé en l'eglise de Tours , faist et ordonne mon testament et dereniere volunté en la maniere qui s’ensuyt.
Premierement,
Je recommande mon ame a Dieu, a la benoiste glorieuse Vierge Marie, a monsieur sainct Michel l'ange et a tous les sainctz et sainctes de Paradis.
Je esliz ma sepulture en ladite eglise de Tours , emprès la chappelle Sainct-Gilles, aupres feu Maistre Bertrand Lopin.
Je vieulx que mes funerailles soient faictes honorablement comme acoustumé pour un chanoine, avecques luminaire acoustumé et que soit dit et celebré cent messes en lad. eglise. ||
Je vieulx qu'il soit distribué a messieurs qui assisteront a mes funérailles chacun cinq solz, a chacun des vicaires trois solz, a chacun des chapelains, marilliers clers et habituez chacun deux solz six deniers. Je vieulx qu'il y aient pareille distribution au sepme et bout de l'an.
Item, affin que je soye es prieres de lad. eglise, je donne a messieurs de lad. eglise cent cinquante escuz souleil vallant troys cens livres tournois, lesquieulx je baille contans à mesd. seigneurs, à la charge de me faire ung anniversaire solempnel chacun an en ladite eglise, auquel sera prins pour oraison « Inclina Deus qui nos patrem et matrem et fidelibus ». || Item, je vieulx que mes debtes congneues par mon serviteur Jehan Guy soient paiees, ainsi que il sait que je doy, et de ce a luy seul luy en donne la charge et vieulx que lui soit baillé de mes biens pour ce faire.
Item, je donne a maitre Louis Cornu, chanoine d'Amboise , tous les meubles qui sont en la petite chambre des Quartes, lesquieulx sont en partie de son partaige de sa feue grant mere, excepté le grant chaslit que je vieulx qui soit baillé a l'aumosne que a faict faire feu maistre Estienne Lopin aux faulxbourgs de Saint-Pierre-des-Corps .
Item, je donne a Jehan Guy, mon serviteur, tous les biens meubles qui sont en la grant chambre desd. Quartes. Et touchant ma vesselle d’estain, broches, cuves, chandeliers, chaudrons, ecuelles, pots || de fer et autres utancilles de cuisine qui sont aud. lieu, je les donne aud. Cornu et a Jehan Guy a chacun par moitié, affin qui prient Dieu pour moy.
Item, je donne a Thomas Saullaye, sa fame et a ma fillule Katherine, fille dudict Saulaye, ma partie du bestial acorné estant ou lieu des Cartes, affin qui prient Dieu pour moy. Et vieulx qui soit baillé et délivré aud. Saullaye la moictié de tout le bestial estant aux Cartes, de ce que luy appartient de son droit de mestayer et laboureur et de ce qui est de tous le temps passé de ce qu’il a esté tenu a moy jusques ce jourduy.
Item, touchant le reste || du bestial estant au lieu des Cartes, je le donne a mon dit serviteur Jehan Guy pour mestre avecques le sien quil a aud. lieu des Quartes, et vieulx que ce petit debrebial [troupeau de brebis ; sous la forme « brebial » dans Godefroy] qu’il a a La Bosselière lui soit baillé et delivré.
Item, je donne les ornements qui sont audit lieu des Cartes, c'est assavoir trois toilles [voir note], une chasuble, une aube, ung amict, ung missel, un calice d'estaing, deux choppines, ung corporalier de velours cramoisi, je vieulx que demourent aud. lieu des Cartes pour servir en la chappelle, pour y servir le temps avenir, et pour demourer es prieres et suffrages qui y seront faiz.
Item, je donne à Mery Marchant, mon mestaier de La Bosseliere une || couchete, chaslict et couverture estant en la grant chambre de La Bosseliere, et luy donne six livres tournois qui [qu’il] me doit de temps passé de blé que je luy ai presté et le quicte de ce qu’il m’a deu le temps passé jusques a sejourduy. Et vieulx que son droit de bestial et son droit de laboureur lui soit delivré afin qu'il prie Dieu pour moy.
Item, je donne a messire Mace Davonneau dix livres tournois prins sur le reste de mes meubles et luy donne une couchete garnye de couvertures, deux draps et le chalit où couche la chambrière, afin qui [qu’il] prie Dieu pour moy, le reste de mes meubles. ||
Item, je donne a Jehan Ranart [Ravart] deux septiers de froment et deux septiers de seigle ou la valleur prins sur le reste de mes meubles, affin qui prie Dieu pour moy.
Item, je donne a Marie, fille de Jehan Guy, une de mes robbes longues tannees qui n’est poinct fourrée et six escuelles d'estain, deux platz et ung broc, le tout d’estain estans a La Bosselière, afin qu'elle prie Dieu pour moy.
Item, je donne a l'aumosne de l'eglise de Tours mon lit où je couche, garny de couete, coussin, courtepointe avec une paire de draps et la couverture, le ciel avecques deux tresdoux pour l'usaige des pauvres. ||
Item, je vieulx, si Dieu fait son commandement de moy au lieu des Cartes, que je soye porté par huit chappelains depuis led. lieu des Cartes jusques au port de Rochecorbon , ausquieulx je donne chacun dix solz tournois. Item, je donne au curé de Rochecorbon ou vicaire pour dire et chanter le respond de Subvenite avecques les versez et oraisons de Inclina Deus qui nos patrem et matrem et fidelibus et faire station davant lad. eglise de Rochecorbon et conduire mon corps jusques aud. port, la somme de cent solz t. C’est assavoir, soixante solz tournois au curé ou vicaire et quarante solz a la fabrique dud. lieu. ||
Item, je donne au colliege de l'eglise de Tours la somme de dix livres tournois pour venir en procession au davant de mon corps jusques au port de la Tour Feu Hugon, distribuez a la distribution de messes.
Item, je donne a chacun chappelain qui porteront mon corps depuis le port de la Tour Feu Hugon jusques a lad. eglise de Tours , deux solz six deniers a chacun desd. huit chappellains.
Item, je donne à Martin Gitrais et à Marie sa femme deux septiers de ble froment et seigle affin qu’il prie Dieu pour moy.
Item, je donne trois nappes, une || chasuble, un corporalier garny de corporaulx, une petite paix d'argent doré, une paire de choppines d'estain, le tout estant en ma chappelle de ceste ville de Tours en ma maison [om. pour] estre baillé a ma cure de Nostre-Dame de Cormeuil, et de ce je donne charge a messire Marc Dumiau et à Jehan Guy de les baillez.
Item, touchant les receptes et mises faictes par Jehan Guy, mon serviteur, je les aprouve et alloue par ce present mon testament. Je vieulx qu’il demoure quicté et dechargé de tout ce dont il a eu charge et administration de mes biens, sans que aulcunement luy en puisse estre faict demande ne question || a luy, ne aux siens par mes parents et heritiers ne aultres en quelque façon que ce soit. Et davantaiges, pour les bons et agreables services qu’il m'a faictz a mes necessites et affaires depuis vingt quatre ans quil m'a servi, et oultre les choses que je luy ay donnees cy davant, je luy donne six septiers de blé froment et seigle par moictié, et une pippe de vin, ou la valleur dud. blé ou dud. vin pour et en recompense de ses dicts services et pour en demourer quicte envers luy, et aussi qui [qu’il] prie Dieu pour mon ame et face prier.
Item, je eslis mes executeurs de ce present mon testament et derreniere volenté, || maistre Jehan de La Vergne [Delavergne], prebstre, boursier du pain, mon nepveu maistre Guillaume Durant et si leur plaise appeler mondit serviteur Jehan Guy, auxquieulx et chacun d’eulx, seul et pour le tout, les prie en prendre la charge, et vieulx que mesd. executeurs facent vendre tout le reste de mes biens meubles tant aux Cartes que a La Bosseliere et en ma maison de ceste ville de Tours , comme blé, vins, foins et pailles et tout ce que me poura estre deu aux bourses, tant a la grant bourse que a la bourse du pain, a la prevosté et agende et anniversaire, tant ce que me pourra estre deu et appartiendra a cause de ma chanonie et prebendes et aultres debtes que me pouront estre deues en quelque maniere que ce soit avecques tous || les restes de mes meubles sans rien exceptez. Je vieulx que l'argent et aultres meubles soient mis entre les mains de mesd. executeurs et quant les dits meubles seront venduz, qu’ilz en mectent tout l'argent ensemble et que le contenu de ce present mon testament soit acomply en la maniere comme si dessus est dit et declairé. Et du reste dud. argent qui se trouvera, si se trouve six vingt livres tournois, je les donne aux seize vicaires de lad. eglise de Tours pour employer en acquest, a la charge de me faire deux anniversaires en leur chappelle par chacun an, ausquieulx sera prins comme oraison Inclina Deus qui nos patrem et matrem et fidelium et que led argent soit baillé aud. vicaires par mesd. executeurs. Et se lad. somme de six vingt livres ne se trouve pour faire faire lesd. deux anniversaires, je vieulx que le surplus du || reste leur soit baillé pour en faire ung par chacun an au jour de mon obit.
Item, je vieulx que, si se trouve de l'argent oultre lad. somme de six vingt livres tournois pour bailler ausd. vicaires a la charge dessusd., je vieulx que le reste soit baillé a messieurs de lad. eglise pour estre employé en l'augmentation de mon anniversaire jusques a cent livres, et le reste a mes parens.
Je vieulx et entends que ce present mon testament, les articles ci davant les deux derreniers soient premièrement accomplis, et vieux que premierement, mes executeurs soient payés et satisfaicts || de leurs peines et vacations. Et vieulx que mon nepveu Guillaume Durant ait pour sa peine la somme de vingt livres tournois et que les autres soient contentés a leur gré et volonté. Touchant la somme de cent escuz souleil que jé presté a Benardin Chaudot [Chandot], mon nepveu, laquelle somme je lui avois presté pour l'expedition de ses bulles du prieuré de Lesignem, de laquelle je luy ay baillé il m'en doit encore de reste trente huit escuz souleil vallant la somme de soixante seze livres, je vieulx qui [qu’il] les rende et que soit contrainct et qui [qu’il] soit baillé a mesd. executeurs, ensamble ma pancion de quarante cinq livres qui [qu’il] me doit par chacun an et le tout pour acomplir ce presen testament.
Item, je ordonne que mes serviteurs dhomestiques dessus nommés, messieurs Macé Davonneau, || Jehan Guy et autres qui pourraient estre, soient habillés en deul et que leur soit baillé et delivré des habillements a mes despens, robbes, chausses et bonnets.
Item, je vieulx que soit baillé un coffre de noyer qui est en mon estude de sus la rue, a maistre Lois Cornu, lequel coffre est a luy, et une douzaine de tranchoirs d'estain qu’il m'a baillez, lesquieuls sont marques en mon nom.
Item, je donne a Françoise Gorionne ma chambrière, la somme de cent solz oultre ses gaiges si elle est demourant avecques moy alors de mon deces, prins sur le reste de mes meubles.
Et revocque tout autre testament que je pouroye avoir faict paravant ce jour. ||
Item, je vieulx vivre et mourir en la foy catholique, chretien vray et repentant et requiers avoir tous les sacremens de saincte eglise. En tesmoing de verité, jé signe, viij.e jour de feuvrier l’an mil cinq cens dix sept. Ainsi signé : J. Penigault.
Le sabmedi treziesme jour de feuvrier l'an mil cinq cens dix sept, ce present testament a esté faict signer par ledit testateur a sa requeste du seing manuel de Estienne Viau, notaire juré des contractz royaulx de Tours requerant a la garde du scel royal estably ausd. contractz, mestre et apouser ledit scel a ce present mon testament. Fait es presence de venerable personne maistre Sociou, marillier en l’eglise de Tours et Mathieu de La Barre [Delabarre], marillier de l'eglise paroissiale de Sainct Estienne dud. Tours . Ainsi signé J. Penigault, Sociou, Viau et De La Barre.

Le XVIII^eme jour de septembre l'an mil cinq cens dix huict aud. Tours led. maistre Jehan Penigault a dict et declairé que depuis ced. present son testament faict et passé, il a consideré, veu la grant espace de temps qu’il a esté, est et pourra estre en malladie, aussi qu’il a plusieurs pauvres parens, que son anniversaire est suffisament fondé et s’est arresté et arreste a lad. fondation qu’il en a cy davant faict par sond. testament sans autre employemant et au regard de ce qu’il a par cy davant dit par sond. testament, qu’il vouloit la somme de cens livres tournois y estre employer, l'a revocqué et revocque, voullant que tout le surplus sorte son plain et entier effect et soit totalement fait et acomply.
Tesmoings lesd. messieurs Mace Davonneau, prebstre, et Alixis Jusquin, clerc.
Ainsi signé : Viau.

Toile : il s’agit probablement de nappes d’autel ; cf. Godefroy, Dictionnaire s. n. Analyse, transcription et notes de Florence Chaix-Merceron. Réf. Florence Merceron, Las chanoines du chapitre de Tours au XVIe siècle (Mémoire de maîtrise préparé sous la direction du Professeur Robert Sauzet et présenté devant l’Université de Tours), Tours, 1982, 359 p.