[1] Aujourd'huy, en la presence des notaires soubzsignez, venerables et discrectes personnes maistres Pasquier Brouet, prebstre, superieur des escolliers de la Compagnie de Jhesus en la ville de Paris , et Jacques Morel de lad. Compagnie et demourant en l'hostel de Clermont, rue de La Harpe devant le collège de Narbonne, ont dict, actesté, certiffié et pour verité affermé qu'ilz ont bonne et certaine congnoissance, assavoir : led. Brouet depuys troys ans en ça et led. Morel dès six ans a, de noble personne maistre Joseph de La Tour, lors escollier estudiant en l'Université de Paris , et qu'ilz ont tousjours veu et congneu led. De La Tour bien vivant et bien sentant de la foy et deffenseur d'icelle contre les hereticques ou suspectz d'heresie et le dient sçavoir, assavoir :
— led. Brouet par ce qu'il a congneu led. De La Tour tel, dès led. temps pour les propos tenuz par entre eulx en devisant de la Saincte Escripture, et aussi qu'il est certain et memoratif que led. maistre Joseph de La Tour avoit quelques foiz reprins en publicq maistre Guillaume Postel, faisant icelluy Postel sa lecture au college des Lombars, pour raison de quelques propos entre aultres qui furent tenuz et alleguez par led. Postel contre nostre Sainct-Pere le pappe, pour l'avoir oyr dire aud. De La Tour qui s'en complaignoit, de craincte qu'il avoit que les auditeurs dud. Postel, ou aultres au moyen de ce, feissent deplaisir aud. De La Tour lequel pria led. sieur m^e Pasquier Brouet et que [2] depuys il en parla aud. Postel et luy remonstra la reprinse que aulcuns de ses auditeurs estoient scandalisez dud. Postel pour avoir proferé lesd. paroles contre nostre Sainct-Pere le pappe ; et que par led. Postel luy fut respondu que il ne s'en soucioit poinct et qu'il auroit patience, ou telles semblables parolle ;
— et led. Morel pour avoir veu des led. temps de six ans et congneu led. De La Tour avoir tousjours les festes et dimanches receu son createur et le plus souvent aller qu'il se hastoit pour recevoir son createur au convent des chartreulx a Paris et qu'il communicquoit le plus souvent avec monsieur maistre Picart, doyen de Sainct-Germain-de-l'Auxerroys, de la Saincte Escripture, comme vray catholicque et ecclesiasticque et que après avoir oy le plus souvent la predication dud. sieur Picart, qui se faisoit de huict a neuf heures en l'esglise de Sainct-Germain-de-l'Auxerrois, led. De La Tour s'en alloit sur sa beste en toute diligence pour recepvoir son createur aud. convent des chartreulx et que par cela il a congneu qu'il estoit vray chrestien. Dont et desquelles choses led. maistre Joseph De La Tour, a ce present, a requis lettres ausd. notaires etc. Ce fut faict, requi et octroyé l'an mil V^c LV, le dimanche XXVIII^e jour de juillet.
[Signé] Cothereau, Lenormant, Pasquier Brouet, J. Morel.