[1] Au nom du Pere, Filz et Saint-Esprit.
Saichent tous, que le 5 decembre 1569, […] par davant Pierre Goussart, […] notaire a Tours , venerable et discret maitre Jacques Hubert, chanoyne prebendé en l'eglise de Tours , prieur du prieuré conventuel Monseigneur Saint-Guingalloys de Chateau-du-Loir ⁽¹⁾, a declaré que son vouloir […] estoit de faire son testament, et pour le recepvoir avoit mandé nous notaire, led. Hubert etant sain de pensee et entendement, graces a Dieu, comme il disoit, et ainsi est aparu ausd. notaire […] desirant ordonner du salut de son ame et d'aucuns bien temporelz que notre Seigneur Jhesus-Christ, par sa grace luy a prestez et envoyez en ce mortel monde, considerant en luy [etc.] d'icelle, et que a toute creature humaine, par le decours du temps, approche de jour en jour la fin de sa vye ; partant, voullant obvier au cas perilleux et de fortune, qui de jour en jour survient, pendant que sens et raison gouvernent sa pensee, et entendement, de son propre mouvement, sans contraincte a fait et ordonné sond. testament en la forme et maniere qui s'ensuict, en revoquant tous autres... cestuy, lequel il veult, ordonne qu'il soit executé et sorte son plain et entier effect [2] – Premierement, voulant et desirant vivre et mourir en l'obeissance et union de Nostre Mere Saincte Eglise antienne, catholique et romaine, en laquelle, des sa naissance, il a esté institué et norry, receu et avoué le nom de chrestien, prins et constitué la perception des saincts sacremens, jusques a present et comme bon catholique, recommande son ame a Dieu le createur, le suppliant lui donner a son trespas bonne congnoissance de Luy, ferme foy et confidence en luy, le confermer par son Sainct Esprit, et par le merite de la mort et passion de son filz Jhesus-Christ vray Dieu et homme, Saulveur du monde, lors, recepvant son ame et usant de sa grace et misericorde, ne le punir selon ses pechez mais luy pardonner et aussi la recommander a la benoiste Vierge Marie, a Monseigneur saint Michel l'Ange, Monseigneur saint Jehan-Baptiste, Monseigneur saint Pierre, Monseigneur saint Paul, Monseigneur saint Estienne, Monseigneur saint Morisse, Monseigneur saint Jacques, Monseigneur saint Gatien, Monseigneur saint Martin, a Madame sainte Katherine, et generallement a tous saincts et sainctes de Paradis, [les] suplians bien humblement la court celeste d'estre intercesseurs pour son ame envers Dieu qui [qu'il] luy plaise luy faire pardon et la recepvoir en son benoist royaulme, de Paradis, avec les bienheurez Item, que, quant il aura plus a Dieu de prandre son ame, la separant du corps, ordonne icellui son corps estre inhumé en l'Eglise de Tours , priant Messeigneurs les doyen et chappitre de lad. Eglise permettre [3] qu'il soit inhumé en icelle eglise, davant et au plus prest (sic) de l'autel Notre-Dame dict L'autel des vicaires⁽²⁾ estant soubz le Crucifix ; et soit mis et apposé sur sa fosse la tombe par luy destinee pour ce faire, estant de present en lad. eglise. Et, pour ce faire l'a donné et donne aux bourses de l’œuvre et du Cierge, a chacune, 10 écus d'or soleil qui sont 20 écus, une foiz paiez, pour aider a faire des ornemens pour les trespassez. – Plus, donne et delaisse a lad. bourse du Cierge, son grand calice, choppines, boueste a mectre pain a chanter, avec la paix ; le tout d'argent ; ensemble 2 chasubles, l'une de velours cramoisi, l'autre de satin broché d'or avecques les nappes aulbes, estolles, et fanons pour aider a la fondation qu'il a intention de faire comme sera dict cy apres.
Item, […] ses debtes estre paiees par tout ou elle se trouverons estre deues.
Item, led. testateur, meu de devotion, desirant l'augmentation du service divin en Nostre Mere Saincte Eglise, a fondé, ordonné et et estably estre dict a perpetuité en lad. Eglise de Tours , chacun an, le 21^e jour de novembre, la feste de la Presentation Nostre-Dame⁽³⁾, comme une feste de Cinq chandelliers, plus une messe basse, aussi a perpetuité chacun jour, a l'autel Nostre-Dame sur sa sepulture, a l'heure de parson⁽⁴⁾, ou aultre heure le plus commode ainsi qu'il plaira a Messeigneurs, et leur plaira ordonner ; et auront ceulx qui diront lesd. messes basses, chacun jour, troys solz, a la charge que au lavabo de lad. messe, ilz diront De Profundis avecques les oraisons des trespassez ; et, pour la fondation de ce que dessus il a donné et donne a messieurs de chappitre […] de Tours , presens et successeurs a perpetuité, a l'hutililité et profict de luer Grand Bourse, que que s'ensuit : Savoir est, 200 ecus et une chesne d'or prisee 60 escuz ou environ, a luy deubz par François Lichany, justement et loyallement par cedulle et causes contenues en icelle, d'une part ; – 90 l.t. aussi a luy deue par led. Lichany pour du bled par aultre cedulle ; – plus les 200 écus a luy deubz par lesd. Sieurs de Chappitre et qui ont par eulx esté paiez pour le retraict feodal sur la seigneurie de La Follye⁽⁵⁾, comme appert par obligation passee par nous, notaire soubzsigné. Et la somme de 50 ou 60 ecus a luy deubz par messieurs de la ville de Tours et a eulx prestez et baillez comme pareillement il dit aparoir par la promesse desd. sieurs de ville ; lesquelles promesses, cedulles et obligation dessusd., il ordonne estre baillees et mises es mains desd. seigneurs de Chappitre pour recepvoir et recouvrer, poursuivre et prochasser lesd. sommes dessusd., pour les mettre en acquest, a l'hutillité dessusd. se luy mesme, testateur ne les baille et delivre ausd. sieurs ; sur le revenu desd. acquetz, mesd. sieurs de l'Eglise prandront pour paier lesd. [5] messes, la somme de 60 l.t. chacun an à la charge de fornir d'ornemens apres que ceulx qu'il a donnez comme cy dessus apert seront usez et le reste dud. revenu sera distributé a ceux qui assisteront au service de lad. feste de Presentation ; savoir est : – a Messeigneurs, les deux parts dud. reste du revenu ; sur l'aultre tiers sera prins le luminaire et sonnerie et du reste sera distribué la moictié aux soubz chantre supletier⁽⁶⁾ [et] penitencier pourveu qu'ilz ne soient chanoines prebendez les diacres, les Bataille⁽⁷⁾, vicaires gaigiers marillers et bastonniers⁽⁸⁾ et le reste se distribuera aux chappelains et habituez de lad. eglise, comprins les campanniers et portier et cinq solz qui seront baillez par led. grand boursier chacun ans aux enfans de cueur qui diront led. jour, apres leur messe, sur sa sepulture ung subvenite pour leur avoir a desjeuner, sans que lesd. cinq solz soient baillez au maitre desd. enfans.
Item, il prie les quatres mandiens et les mynimes du Plessis-lez-Tours assister et conduire son corps jusques au lieu de sa sepulture et pour ce faire leur donne une foiz paiez a chacun convent 100 s.t. a la charge de dire et cellebrez a chacun desd. conventz ung service solennel, savoir est : vigilles de mortz a neuf pseaulmes [6] et neuf leczon avecques grand messe a diacre et soubzdiacre ou assisterons ses executeurs se leur plaist d'en prendre la poyne.
Item, il prie Messieurs les religieulx du Couvent Saint-Jullien […] de Tours assister a lad. conduicte de sond. corps et dire et cellebrer en leur eglise vigilles de mors et une grand messe a diacre et soubzdiacre et pour ce […] leur donne 10 l.t. une foiz paiez ; et aussi dire sur son corps ung Subvenite, comme les autres couvents.
Item, il prie Messieurs de Marmoutier aussi pareillement assister et conduire sond. corps avec la croix et nombre compectant, dire pareillement vigilles de mors et grand messe en leur eglise a diacre et soubz diacre et pour ce […] la somme de 10 ecus d'or a eulx paiable le plus tost que faire ce pourra.
Item, il veult et ordonne sond. corps estre porté en terre par 8 chapellains de lad. eglise de Tours , a chacun desquels soit pour ce paié 5 s.t.
Item, soyt baillé et distribué a Messieurs qui porterons le pesle, assisterons au corps avec lesd. chappelains et a ceulx qui conduiront le dueil, a chacun , 5 s.t.
[7] Item, veult […] avoir pareil luminaire que ont accoustumé d'avoir les chanoines de lad. eglise de Tours qui servira aux deux premiers services et, au tiers service qui est le bout de l'an sera faict 6 cierges de chacun 3 livres de cire qui serviront aud. tiers service, et que ceux qui porterons les torches et potz aient chacun pour chacun service 2 s. 6 d.t.
Item il prye Messieurs de l'Eglise Saint-Martin de Tours ou il a este par ci devant chanoyne faire ung service en leur eglise pour le salut de son ame et pour ce […] leur donne 20 ecus sol par une fois paiez qu'ilz distribueront ainsi qu'il leur plaira.
Item, il veult […] estre dict et cellebré en lad. eglise de Tours 3 services consecutifz l'un apres l'autre et le plus tost que faire se pourra ; aud. service il veult estre dict et cellebré 100 messes basses a chacun d'iceulx, qui sont 300 messes ; et que a ce premier service soit distribué a chacun de Messieurs les chanoines prebendez 18 s.t. ; aux soubzchantre supletier penitencier, pouveu qu'ilz ne soient chanoines prebendez, a chacun 7 s. 6 d.t. ; aux deux diacres [8] les Batailles, chanoines de La Bezoche⁽⁹⁾, vicaires gaigiers marilliers clercs et bastonnier pareille somme de 7 s. 6 d.t. ; aux chappelains et habituez, a chacun quatre solz ; – et, aux deux autres services sera distribué a chacun de Messieurs les chanoines prebandez qui assisterons a chacun desd. services, chascun ung teston et aud. soubzchantre supletier et penitencier les deux diacres, vicaires gagiers marilliers clercs et bastonnier a chacun 4 s.t. ; aux chappelains et habituez a chacun 2 s.t. à chacun desd. deux derniers services.
Item, veult et ordonne que Messire Martin Galon prebstre, son chappelain, joysse, sa vie durant de la maison estant en la rue de La Bezoche, acquise par led. testateur des heritiers feu Messire Clement Douzille, prebstre, en son vivant croppier⁽¹⁰⁾ de l'eglise dud. Tours  ; et ce suivant le don qu'il en a faict aud. Martin Galon à sad. vye seulement le contract duquel don il a confirmé par ce present son testament et davantaige veult […] que icelui Galon joisse à sa vie comme dessus du jardin acquis par led. testateur de feu Bertheran Larcher, dict Labbé situé en la paroisse Saint-Pierre-des-Corps a la charge de paier et continuer par icellui Galon durant sa vie, chacun an le 21^e novembre a Messieurs de La Bezoche […] 25 s.t. qu'il donne ausd. de La Bezoche a la charge [9] d'eux et leurs successeurs, a perpetuité, dire et cellebrer lad. feste de la Presentation Notre-Dame led. 21^e novembre chacun an, comme Messieurs de l'eglise de Tours et dire le Salu la vigille de lad. feste, apres complies, et apres led. Salv, Subvenite ; et aussi apres la grand messe dud. jour, le prebstre tout revestu, sera dict le respond ne recorderis, le tout avec les oraisons des trespassez, lesquelz 25 s.t. il a dès a present constituez et assignez sur lesd. maison et jardrin dessusd. Et, après le deces dud. Galon, demoureront lesd. maison de La Bezoche et jardin, acquis dud. feu Larcher a perpetuité a la Chappelle Saint-Nicolas⁽¹¹⁾ affectee a la prebende que tient de present led. testateur [marge : et de laquelle chappelle est de present chappelain maitre Estienne Hubert, chanoine de Champigny et, a ceste fin a fait don et legz desd. maison et jardin a icelle chappelle, a la charge de payer et continuer par les chappellains d'icelle chappelle chacun an lesd. 25 s.t. de rente ausd. sieurs de La Bezoche ; et led. don fait aud. Galon pour l'inciter a prier Dieu pour l'ame dud. testateur et pour le recompenser des services, merites et secours que led. Galon luy a faitz et espere qu'il luy fera cy apres.
Item, a donné et donne au prieur de Chateau-du-Loir la somme de 100 l.t., une foiz paiee pour mectre en acquest au proffict du couvent, a la charge de dire, chacun an [10] a tel jour qu'il deceddera, vigille de mors et grand messe ; et oultre, leur donne son calice, qu'il a eu de feu Monseigneur De Brillach, aultrefoiz prieur dud. Chasteau-du-Loir  ; led. calice pour servir au prieur et religieulx dud. Chasteau-du-Loir , a faire le divyn service.
Item, led. testateur, voullant recongnoistre les services, merites et secours receuz par Nicollas Riboton, ci devant son serviteur, et de present, sellier demeurant a Amboise , lui donne et remect la somme de 25 l.t. qu'il luy doibt, pour cause de prest, et veult que l'obligation que led. Riboton luy en peult avoir faite, soit rendue aud. Riboton, comme neulle ; et oultre, luy donne 2 pippes⁽¹²⁾ de vin, l'une blanc et l'autre cleret, qui luy serons baillees et par luy prinses en sa clouzerie de Maulny⁽¹³⁾, paroisse Saint-Martin-le-Beau .
Item, donne et remectz, pour semblables causes que dessus a Clement Nicollas, aussi ci-devant son serviteur 10 ecus pistoletz qu'il luy doibt, aussi pour causes de prest, et, en ce faisant, que l'obligation ; si aucune se treuve soit rendue aud. Nicollas, et oultre, luy donne et veult qu'il soit baillé une pippe de vin.
Plus, veult et ordonne qu'il soit baillé a Martin Jouault (?) de present son serviteur [11] la somme de 10 ecus sol pour les services, secours et merites a luy faitz et en oultre soit payé de ses services et led. don pour luy faire aprendre mestier et ses services luy soient paiez a raison de 10 l.t. par an⁽¹⁴⁾.
Item donne et veult qu'il soit baillé pour mesmes causes a Marye [le nom de famille est resté en blanc], de present sa servante, pareille somme et 10 ecus soleil, en oultre et par dessus ce qu'il pourra estre deu de ses services dhomestiques.
Item, pour semblables causes remectz et donne a Anthoine Debeyne, aussi ci-devant son serviteur, la somme de 50 l.t. qui paiee a esté par led. testateur pour l'appentissage dud. Debeyne. Et, oultre, lui donne et veult qu'il soit baillé et paié la somme de dix l.t.
Item, icellui testateur, voullant recongnoistre les services, merites et secours receuz de Vincent Ysabeau, sergent royal et René Gravereul qui ont esté par ci-devant ses serviteurs et dhomestiques, leur donne pour eulx, ensemblement, savoir est – 20 écus que led. Ysabeau luy doibt pour cause de prest et pour laquelle led. Ysabeau luy avoit par ci-devant baillé gaiges, lesquelz gaiges lui auroient et ont esté depuis renduz par || [12] luy testateur, sans avoir paié lesd. vingt escuz ; – plus […] 20 écus, pou ung cheval qu'il a baillé aud. Ysabeau – plus la somme de 25 ecus pour la valleur d'ung aultre cheval par led. testateur vendu a maitre François Pean par ci-devant ; lequel Pean lui doibt lad. somme – plus la somme de 75 l.t. ou aultre somme telle qu'elle est deue aud. testateur par les heritiers de feu maitre Michel Delavergne, ensemble les fraiz faictz aux despens dud. testateur pour la poursuite de lad. somme. – Plus la somme de 263 l.t. a luy deue par [prénom resté en blanc] Bauldoyn, marchand demeurant a Parçay en Anjou , de compte faict par led. Bauldoyn avec led. testateur comme boursier du Cierge – Et la somme de 400 l. deue par [prénom resté en blanc] Ruer et pour raison de laquelle y a saisie de biens et quelques autres poursuittes pour le recouvrement ; les fraiz et despens desquelles poursuittes pareillement, il leur donne ; et pour desd. choses ainsi par luy donnees ausd. Ysabeau et Gravereul les avoir, prandre et recepvoir poursuir et recouvrer par [13] eulx et a leur profit et a ceste fin led. testateur ordonne et veulx que les obligations, pappiers, et enseignemens qui en font ou ferons mention, leur soit delivrez et mis es mains.
Item, il veulx et ordonne estre payé a l'aulmosne de l'Eglise de Tours , la somme de 60 l.t. en deniers ou en meubles.
Item, veult et ordonne que ausd. Ysabeau et Gravereul, Gallon, Martin [un trait] ses serviteurs, leur soit baillé a chacun 3 aulnes de drap noir pour en faire robbe, une paire de chausses, soulliers, propoinct et bonnet, pour avoir souvenance de prier Dieu pour son ame et de celles de ses parens et amis trespassez ; led. drap de 70 solz l'aulne, ou meilleur se mestier est, en oultre et par dessus ce que cy-dessus leur a ordonné.
Item, a nommé et esleu pour executeurs du present son testament, monsieur maître François Foyon⁽¹⁵⁾, chanoine prebendé en l'eglise de Tours , et lesd. Ysabeau et Gravereul, lesquelz il prie d'en prendre la poyne et, pour leur poyne et sallaire, leur estre baillé à chacun une couppe d'argent d'un marc chacune et ausquels et a chacun d'eulx il a donné et donne tout [14] pouvoir, et puissance sur tous et chacuns ses biens meubles et, ou sesd. meubles ne souffizoient, sur ses immeubles, pour iceulx meubles les vendre, et faire vendre, ensemble sesd. immeubles, comme vignes, prez, terres, maisons et autres choses ou il n'y a desd. meubles a suffire, et ce jusques a l'entiere execution d'icelluy son testament, qu'il veult et entend qu'il soit entierement et deuement parfait, execute et accomply ; et le reste, qui restera de ses biens, tant patrimoniaulx acquestz et de meubles, le present son testament accomply, serons et apartiendrons a ses heritiers ; touteffois ou sesd. heritiers vouldroient empescher en aulcune maniere lad. execution, du present son testament, il a donné et donne des a présent par ces presentes comme pour lors dud. empeschement survenant a mesd. sieurs de lad. eglise de Tours son lieu et clozerie qu'il a a Maulny, paroisse Saint-Martin-le-Beau, tant en maisons, exstancilles, vignes, terres et prez a perpetuité, pour la fondation d'un diacre ou soubzdiacre pour subvenir aux deux fondez par defunct monsieur maitre Clement Bataille, qui auront sur le revenu [15] dud. Maulny pareille distribution que lesd. fondez par led. deffunct Bataille et le reste, se reste y a demourera ausd. sieurs au profict de leur Grand Bourse ; demourant neanlmoings les fondations dons et legz par luy faictes en leur effect et valleur, sans que pour raison du present article ilz en soient aucunement changez ne diminuez.
Item, donne a Pierre Nyverd, aussi son serviteur, la somme de 10 l.t. pour prier Dieu pour son asme.
Et derechef led. testateur a suplié et suplie lesd. Foyon, Ysabeau, et Gravereul prester tout faveur aider à ses paouvres heritiers pour le soustenement de leurs droictz se confians en eulx de ce faire.
Faict et passé en la maison dud. testateur led. present testament quy n'a esté subgeré, ains par luy dicte et nommé ; et auquel a esté leu et releu par deux foiz, tousjours persistans icellui, disant que son intention est et estoit qu'il soit executé et sorte effect.
Item, icellui testateur a dict que son intention a esté et est que ses fondations cy-dessus, soient executees et sortent effect et tellement que se ainsi avenoit que les sommes de deniers desd. Lichany(16), Messieurs de la ville et autres par luy leguées ausd. sieurs prenoient long traict au recouvrement d'icelles, il entend que pareilles [16] et semblables sommes qui se pourroient ainsi prendre long traict, ou ne feussent bien asseurees estre baillees ausd. sieurs de chappitre et par eulx prinses sur ses biens et plus clairs deniers qui en pourront provenir, retournans lesd. sommes qui serons receues a sesd. hoirs ou l'une de celles qui ainsi serons deues.
Item, a dit et ordonné qu'il entend et veult que se aucunes desd. obligations ou promesses se trouvoyent par devers luy dud. Vincent Ysabeau, soient et demeurent neulles et comme telles luy soient rendues d'aultant⁽¹⁷⁾ que led. Ysabeau l'en a satisfaict et tenu compte.
Faict, leu et receu, comme dict est ; presens honnorables hommes Jehan Millet, maître ouvrier en soyes de paroisse Saint-Pierre-des-Corps , Jehannost Coudelou, maitre appothicaire demeurant aud. Tours , temoins.
[Signé] J. Hubert ; Jeh. Millet ; Coudelou ; P. Goussart.

1. Réau, Louis, Iconographie de l'art chrétien, s.v. Saint Guénolé de Landévennec (3 mars). Un saint de l'Ouest. Bibliographie : Charles (R.), Saint Guingalois, ses reliques, son culte et son prieuré à Château-du-Loir , Le Mans, 1874. — 2. boursier du Cierge. — 3. Présentation Notre-Dame (21.XI) Vie des Saints, t. XIII. Fête célébrée en Avignon dès 1372, et c'est en 1585 que Sixte Quint ordonna qu'elle fut recitée dans toute l'Eglise, mais déjà publie par Paul III. 4. Parson : cf. Godefroy, Dictionnaire de l'ancienne langue française et de tous ses dialectes du IXe au XVe siècle : s. m. « Son de cloche : que nuls regartiers ne regartières ne allassent contre les denrees pour les achater a regart hors du marché, de ceulx qui estoient jà envoyez pour les aporter a vendre es villes, et qu'ils ne les achatassent es dites villes quant aportées y seroient, jusques à l'heure du Parson du prince (1454, Etablissement de Jehan III, duc de Bretagne , in Morice, I, 1165) » Faut-il faire remonter à parçon « portion, partage, distribution ». — 5. Cf. Minutes Goussart, s.v. La Follie, commune de Crotelles . — 6. Suppletarius : m ecclesia Turonensi ; Qui vices alterius supplet, vulgo soupleter et corrupte soupelletier, teste LeBeuf, ni ejus Adversariis (Du Cange). — 7. → bataille. — 8. Revoir l'ensemble de ces termes. Cf. Doucet, Les institutions de la France au XVI^e siècle, p. 738 sqq. Marguillier : clercs ou laïcs ; conservent les ornements, exécutent les sonneries, pour la police de l'église habitués : cf. ibid, p. 742 : prêtres attachés au service de l’Église, sans fonction définie. — 9. Cf. sur le chapitre de La Bazoche, Carré de Busserolle, tome VI, p. 256 sqq. — 10. Croupier : confidentiaire [...]. — 11. Chapelle Saint-Nicolas (Carré de Busserolle, tome VI, p. 237), il en existe 3 de ce nom dans l'église de Tours  : Saint-Nicolas (sans doute celle-ci); Saint-Nicolas-du-Bois; Saint-Nicolas-de-la-Recette. — 12. pippe : unité de mesure. — 13. Mauny / Mosny : hameau, commune de Saint-Martin-le-Beau , 17 hab. ; Carré de Busserolle (tome IV, p. 218) ne mentionne aucun propriétaire, aucun titre. — 14. 6 deniers une obole par jour environ ! — 15. Fryon. — 16. Lichany, cf. p. 4 supra. — 17. D'autant que valeur de « comme, puisque », cf. Index du Richard.