Honnorable homme Claude Chevallon marchant libraire jure en l’Université et bourgeoys de Paris confesse en ensuyvant l’adjournement et poursuyte en matiere de retrait lignager pour luy faicte a la requeste de honnorable homme Phillebert Regnault marchant boulenger aussi bourgeoys de Paris affin d'avoyr par rectraict lignagier et propriete de lygnage huict livre tournoys de rente par ledict Chevallon des le mardy tiers jour de juillet derrenier passé de honnorable homme maistre Jehan Despogny procureur ou chastellet de Paris raichetez et que icelluy Despogny comme ayant droict par transport de Paquies Perier marchant chandellier de suif et feue Jacqueline Poyreau jadis sa femme avoyt droict de prandre et percepvoyr chacun an aux quatre termes en l’an a Paris acoustumez sur plusieurs corps dhostelz et leurs appartenances assis a Paris en la rue Sainct Jacques ou pent pour enseigne Le Rouet de partie desquelz led. Chevallon est detenteur et proprietaire pour voyr eu et receu dudict Philbert Regnault a ce present la somme de cent quatres livres treize solz IX deniers tournoys qui paiez baillez comptez et nombrez luy ont este reaulment et de faict presens les notaires soubscriptz en or bon et de poix et monnoye blanche le tout de present ayant cours/ Cest assavoyr quatre vingtz seize livres tournoys pour le remboursement et sort principal du rachapt desd. huit livres tournoys de rente faisant partie et portion de soixante et quinze libres tournois derente a quoy led. Jacques perrier bailla despiecha lesd. lieux a feu Guy Perier son frere huit livres tournois pour les ventes par led. Chevallon paiez a frere Jehan Chopin prebstre religieulx et chambrier de lesglise et abbaye Saincte Genevieve au Mont de Paris pour le rachapt desd. huit livres tournoys de rente quinze deniers tournois pour la saisine escripte au doz du brevet dud. rachapt signee Chopin et douze solz six deniers tournois pour les fraiz des lectres et […] de laquelle somme de cens quatre livres treize sols neufs deniers tournois pour les causes que dessus led. Chevallon se tient pour content et en quicte led. Regnault et tous aultres, et partant a led. Chevallon baillé et rendu aud. Regnault presens lesd. notaires led. brevet et rachapt diceulx huit livres tournois de rente ensuivant, deux tiltres nouveaulx passez pour raison dicelle lun par Ysabeau vefve de feu Guy Perier et lautre par Jehan Le Sage avec lacquisition faicte par led. Despogny desd. Perier et sa femme diceulx huit livres tournois de rente. Promectant etc. Obligeant etc. Renoncant etc. Faict et passe le lundy VI^e jour d'aoust V^c XXI.