Furent presens honnorable homme Claude Chevallon marchant libraire bourgeois de Paris tant en son nom que comme soy faisant fort de Claude Pauverelle niepce de feu Perrecte Pauverelle en son vivant premiere femme dud. Claude Chevallon d’une part, et Jehan Yvernail [= Yvernel] marchant libraire demeurant a Paris pour luy et en son nom d’autre part. Lesquelles parties de leur bon gre sans contraincte confesserent avoir fait entre eulx les traicté, promesse, accord, convenances et aultres choses qui s’ensuyvent pour raison et a cause du mariage qui au plaisir de notre seigneur sera le jourduy fait et solempnizé en face de saincte esglise, c'est assavoir : led. Claude Chevallon avoir promis, sera tenu et promect donner et bailler par loy et nom de mariage lad. Claude sa niepce aud. Jehan Yvernail, qui a promis et promect la prendre a sa femme et espouse si Dieu et saincte Esglise s’y accordent. En faveur duquel mariage led. Claude Chevallon a payé et baillé content aud. Jehan Yvernail la somme de cent livres tournois avecques une robbe de drap noir a usaige de femme doublee de demye ostade a poignetz de satin, ung corset et ung chapperon aussi de drap noir, que pour ce led. Yvernail en confesse avoir eu et receu dud. Claude Chevallon, dont il quicte etc. Et en ce faisant a donné et donne led. Jehan Yvernail lad. Claude sa femme future de la somme de cinquante livres tournois pour une foys payer et iceulx avoir et prandre sitost que douaire aura lieu. Et lesquelz cinquante livres tournois etc. par exprez que lad. Claude sa femme future les ayt et preigne incontinant que douaire aura lieu, afin qu’elle ne demeure dispourveu, sur tous et chacuns les biens meubles et heritaiges qui advyendront et escherront à la part et portion des heritiers dud. Jehan Yvernail apres partaige fait entre elle et ses heritiers qui seront sans recourt. Car ainsi etc. Promectant etc. Obligeant etc. Renoncant etc. Fait le dimanche XXVI^e jour d’avril l’an mil V^c XXVIII apres pasques.