1532, 16 mai — Tours

[f° 55] Le jeudi XVI^e jour de may l’an M V^c trente deux, en la court du roy notre sire a Tours en droit, par devant nous personnellement estably et deuement soubzmis, Estienne Hubert, dit Gaultier, maistre charpentier, demourant es forsbourgs dudit Tours , en la paroisse Saint Estienne, tant pour luy en son propre et privé nom que pour au nom et soy faisant fort de Jehan de Procteny aussi maistre charpentier son gendre, d’une part, et de Jehan Morier, Robin Sicart, Heliot Queuloux, tous marchans noutonniers pardessus demourans a Rochecorbon d’aultre part, lesquels Jehan Morier, Robin Sicart et Herbert Queuloux, et chacun d’eulx seul et pour le tout sans division de partie^(a) ont promis, promectent, doyvent, seront tenuz charegez en leurs challans sur la riviere de Loire au port du bout des forsbourgs dudit Tours en la paroisse Saint-Pierre-des-Corps , le bois et charpenterie ainsi d’un pavillon carré ainsi que lesdits Estienne Hubert et Jehan de Procteny l’ont faic taillee ou faict faire et tailler pres Saint-Jehan-des-Choux en la la chappelle Saint-Jehan-des-Choux, duquel lieu lesdits charpentiers le feront charroier, arriver audit port. Et icelle charpenterie lesdits noutennyers^(b) voictureront ou feront voicturer, mener et conduire par ladite riviere de Loire en leursdits challans bien seurement a leurs propres coustz et despens^(c) jusques au port de Saint Dié ⁽¹⁾ au dessus de Blois au lieu que lesdits charpentiers leurs monstreront ou feront monster. Et Illec deschairger ladite charpenterie, toutes les pieces ainsi que lesdites leurs seront baillées^(d) en lieu aisé, convenable, et la charger en chareste pour mener a Chambort pour l’ediffice du roy nostredit seigneur^(e) et le plus toust, bref que faire pourront sans chommer ne aultres chouses [f° 55 v°] faire pour le pris et somme de quatre vingts dix livres t. monnaie courante. Laquelle somme de IIII^xx l. t. ledit Estienne Hubert, tant pour luy que pour ledit Jehan de Procteny a promis, promect, doit et sera tenu paier ausdits noutonnyers avant que chairger, en chairgeant, voicturant et quandt ilz auront deschairgé par parties, ainsi qu’ilz en auront besoing par necessité. Et par deffault de tout faire et accomplir par chacune desdites parties tous coustz etc. A demander etc. Et quant a tout etc. Obligeant etc. Renoncant par especial lesdits noutonnyers au benefice de division. Fidem, etc. Presens, Pierre Poitevyn couvreur, Jacques Abraham, clerc, tesmoing, etc., et Gacian François maistre des oeuvres de massonneries, charpenteries et couvertures pour le roy notredit sire en Touraine . Tesmoing, etc. Constat en gloze : par chascun d’eulx sont pour le tour sans division de partie lesdits noutonnyerz, bien et seurement a leurs propres coustz et despens, toutes les pieces ainsi quelles leur seront baillees pour l’ediffice du roy notre sire audit lieu.

[Signé] E. Viau

Le XIX^e jour des mois et an dessusdits ledit Estienne Hubert a baillé et paié content ausdits Heliot Queuloux et Robin Sicart, la somme de douze livres dix solz t. sur le contenu cy-dessus. Dont, etc. Quictebt, etc. Presens Jehan de Fontenay, notaire en court laye et Jacques Abraham, clerc tesmoings. [Signé] E. Viau
Le XXVI^e jour des mois et an dessusdits lesdits Morier et Sicart ont receu content dudit Estienne Hubert la somme de trente deux livres t. sur le contenu cy-dessus. Presens de Fontenay et Jehan de Berry, tesmoings.
Le VIII^e jour de juin ensuivant audit an lesdits Morier et Sicart ont confessé avoir receu dudit Estienne Hubert la somme de vingt livres t. sur le contenu cy-dessus. Presens Michau Grégoire, ouvrier en soie, et Martin Morier habitant paroisse de Nozillé.
[en marge, f°55] Le XIX^e jour dudit mois de juing en suivant audit an, lesdits Morier, Sicart et Queuloux ont confessé et confessent avoir eu et receu dudit Estienne Hubert la somme de dix-sept livres dix solz et sur le contenu cy-dessus dont en quictent etc. Présent Pierre Collasson, marchant, Jacques Abraham, clerc, tesmoing faict. [Signé] E. Viau
Le mardy second jour de juillet ensuivant, audit an, lesdits Morier, Robin Sicart ont confessé avoir eu et receu dudit Estienne Hubert la somme de huit livres faisant le reste et son parfait paiement de ladite somme de quatre vingt dix livres [...] pour les voictures et coustz cydessus. Dont, etc. Quictent, etc. Présens Jacques Abrahan et Philippes Foucault, clercs demeurants audit Tours . tesmoings, etc. [Signé] E. Viau

Notes :

(a) d’eulx seul et pour le tout sans division de partie, dans l’interligne supérieur. — (b) lesdits noutennyers, dans l’interligne supérieur. — (c) bien seurement a leurs propres coustz et despens, dans l’interligne supérieur.  — (d) toutes les pieces ainsi que lesdites leurs seront baillées, dans l’interligne supérieur. — (e) pour l’ediffice du roy nostredit seigneur, dans l’interligne supérieur. (1) Saint-Dyé-sur-Loire , commune, dép. Loir-et-Cher , arr. Blois , canton de Chambord .