De par le roy.

Tres chers et bien amez, chacun peult assez savoir les infiniz maulx et dommaiges innumerables que noz bons et loyaulx subgectz ont par ci devant portez et portent a l'occasion des guerres et divisions qui ont esté menes et suscitees en notre royaume depuys certain temps ença, par l'esleu empereur et roy d'Angleterre et autres leurs adherans et alliez noz ennemys et adversaires, lesquelz innicquement et a mauvaise et dampnee querelle par plusieurs endroictz et coustez ont envahy, travaillé et insulté notredit royaume, païs, terres, seigneuries, subgectz et pour icelluy butiner, deppartir et dissipper entre eulx a la ruyne, destruction et desolacion extresme de nosdits païs et subgectz. A quoy, graces et louenges soient a Dieu notre createur, avons tousiours resisté de sorte qu'ilz n'y ont gueres gaigné jacoit ce que ce soient deux des plus puissans et plus redoubtables potentaz qui soient en la chretienté. Et voyant qu'ilz continuent et perseverent en leur dampné et obstiné propox, sans vouloir entendre a aucun traicté de paix ou tresve, sinon qu'elle fust si avantageuse et honnorable pour eulx qu'elle seroit honteuse, dommaigeable et vituperable a nons et a toute la nacion francoyse, que pour riens ne vouldrions permectre, considerans en oultre que le vray obgect de nosdits ennemys est d'occupper l'Ytallie et en icelle eulx fortiffier pour par apres grever et tenir en subgection et servitude iceulx noz royaumes, païs, seigneuries et subgectz et en disposer a leur voulenté, ce qu'ilz pourvoient aisement et facillement faire si l'on ne obvioit a leursdites entreprinses. Et a ceste cause, apres avoir bien pensé en ceste matiere, et eu mené advis et deliberation sur ce avec les gens de notre conseil, n'avons trouvé meilleur moyen pour rompre tous les dessaincts et entencions de nosdits ennemys et leursdits adherans que de faire l'entreprinse de la conqueste et reduction en noz mains et obeissance de notre duché et estat de Millan et seigneurie d'Ast et Guenes , que iceulx noz ennemys tiennent et occuppent tirannicquement sur nous ou ilz se fortiffient. En quoy faisant nous divertissons la guerre qui est en notredit royaume et la regectons sur nosdits ennemys deument advertiz et acertenez que si promptement nous ne faisons ladite entreprinse, nous perdons entierement tous noz amys, considerez et alliez depar dela, qui nous peuvent ayder a la conqueste, desesperons et mectons en totalle ruyne et perdiction noz bons et loyaulx et tres affectionnez subgectz et serviteurs que avons de par dela, et les laissons tumber a la mercy et discrection de nosdits ennemys a notre vergoigne, sans le peril et inconvenient qui s'en peult avenir a notredit royaume. Pour laquelle entreprinse mectre a execution avons dressé une puissante armee pour a l'ayde de notre createur, faire ladite conqueste en laquelle avons deliberé aller en personne, apres avoir donné provision par toutes les frontieres de notredit royaume. Et pour resister a nosdits ennemys, qui n'est pas seullement souffisante pour deffendre iceulx noz royaume et subgectz, mais pour a ung besoing offendre nozdits ennemys, et pour ce qu'il nous a semblé que pourriez trouver estrange de nous en aller hors notredit royaume, le laissant en l'affaire de guerre qu'il est, sans enctendre les choses ainsi quelles passent, nous vous avons bien voulu advertir et faire entendre des choses dessusdites qui sont veritables et les causes et raisons qui nous mennent de faire ledit voyaige et entreprinse qui est comme sect notredit createur a bonne fin pour le bien, repox et seureté de notredit royaume, païs et seigneuries et subgectz et les garder des perilz et inconveniens ou ilz seroient en dangier de tumber. Et pour faire cesser la guerre qui y est et faire recliner le faict d'icelle sur nosdits ennemys, que autrement ne se peult faire actendu l'obstinacion et pertinacité d'eulx, vous advisans que povez hardiment croire que si congnoissions que notredite absence portast preiudice a nosdits royaume et subgectz, pour riens ne le vouldrions faire mais qui plus est si l'affaire survenoit en icelluy notre royaume tel qu'il requist notre presence quelque part que feussions, laisserions toutes entreprinses pour y venir et le secourir comme de tout notre cueur et sur toutes choses le desirons. Et d'autre part, affin que vous et autres noz bons et loyaulx serviteurs officiers et subgectz puissent avoir recours en tous leurs besoings et affaires, nous laissons par deça notre tres chere et tres amee dame et mere garnye et acompaignee de bons, grans et notables personnaiges experimentez, tant pour la guerre, justice que finances, pour pourveoir a toutes choses qui pourront venir et occurrer durant notre absence, selon que le besoing sera, et que les cas se y offreront, comme regente et gouvernante pour nous, en notredit royaume, pais et seigneuries, durant notredite absence en ce present voyaige, laquelle se y saura bien conduire et acquicter au bien de notredit royaume, repox et soullaigement de nosdits subgectz, pour le bon et singulier zelle et desir que savons qu'elle y a, vous prians au demeurant que s'il seurvenoit quelque affaire, ou il fut besoing faire office de bons et loyaulx subgectz, vous le vueillez faire et comme telz vous y acquictez, ainsi que avons parfaicte esperance. Et vous nous trouverez tousiours prest et deliberé de vous traicter en tous voz affaires, en toute grace, faveur et doulceur. Et pareillement vous prions que pendant que serons en notredit voyaige et excercité, vous vueillez faire faire en voz eglises et paroisses, processions et prieres a Dieu le createur, la glorieuse Vierge Marie, et les [...] saincts, qu'ilz nous donnent grace de faire chose qui soit a son honneur et au bien , utillité et conservation de notredit royaume, païs, seigneuries et subgectz qui est la chose que plus singulierement desirons. Et vous nous ferez service tres grant et agreable que jamais ne sera mys par nous en obly. Donné a Fontaine Bleault , le III^me jour d'aoust, M V^c XXIII.

[Signé] FRANCOYS

.

Gedoyn.

[Au dos] A noz tres chers et bien amez, les eschevins, bourgeois et habitans de notre bonne ville et cité de Bourges .